హైదరాబాద్, వెలుగు: ఎంఎస్ఎంఈలకు ఫైనాన్సింగ్ చేసే పూణేకు చెందిన నాన్-బ్యాంకింగ్ ఫైనాన్షియల్ కంపెనీ (ఎన్బీఎఫ్సీ) ఎలక్ట్రానికా ఫైనాన్స్ లిమిటెడ్ (ఈఈఎల్) తెలంగాణలో అడుగుపెట్టింది. వరంగల్, సూర్యాపేటలో ఏడు శాఖలను ప్రారంభించింది. ప్రతి జిల్లాలోనూ బ్రాంచ్లను ఏర్పాటు చేస్తామని, మరికొన్ని నెలల్లో వీటి సంఖ్యను 50కి చేరుస్తామని తెలిపింది. ఇప్పటికే గుజరాత్, రాజస్థాన్ మధ్యప్రదేశ్ మార్కెట్‌‌‌‌లలో తమ లోన్ప్రొడక్టులను అందిస్తోంది. తెలంగాణలో తనఖా అప్పులు (లోన్ ఎగైనెస్ట్ ప్రాపర్టీ) ఇస్తామని తెలిపింది. ఇక్కడ మార్కెట్లో అవకాశాలను గురించి ఎలక్ట్రానికా ఫైనాన్స్ సీఈఓ శిల్పా పోఫాలే మాట్లాడుతూ “తెలంగాణలో దాదాపు 2.6 మిలియన్ల ఎంఎస్ఎంఈలు ఉన్నాయి.
వీటిలో 56 శాతం గ్రామీణ ప్రాంతాల్లో ఉన్నాయి. మొదటిసారి అప్పు తీసుకునే వాళ్లకు మేం ప్రాధాన్యం ఇస్తాం. మా సగటు లోన్ సైజు రూ.ఐదు లక్షల వరకు ఉంటుంది. కస్టమర్ ప్రొఫైల్ ఆధారంగా వడ్డీరేటును నిర్ణయిస్తాం. ఉదాహరణకు, నల్గొండ చేనేత కార్మికులు, సూర్యాపేట (ప్రధాన పత్తి ఉత్పత్తి జిల్లా), ఎర్ర మిర్చి (కామారెడ్డి), వరి/పత్తి (కరీంనగర్) వ్యవసాయ ఉత్పత్తిదారులు, చేనేత బొమ్మల కార్మికులు (నిర్మల్) లాంటి వారికి సకాలంలో వర్కింగ్ క్యాపిటల్ దొరకడం కీలకం. మేం ఇలాంటి వాళ్ల అవసరాలు తీరుస్తాం. హైదరాబాద్లోనూ మాకు వందలాది మంది కస్టమర్లు ఉన్నారు" అని అన్నారు. కంపెనీ భారతదేశం అంతటా 175 కంటే ఎక్కువ శాఖలను ఏర్పాటు చేసింది. వచ్చే ఐదేళ్లలో ఈ సంఖ్యను 500 శాఖలకు తీసుకెళ్లాలని లక్ష్యంగా పెట్టుకుంది. సిబ్బందిని రెట్టింపు చేయనుంది.
