రాజ్కోట్ : ఇండియాతో మూడో టెస్ట్‌‌ను ఫ్రెష్‌‌గా మొదలుపెట్టేందుకు ఇంగ్లండ్‌ రెడీ అవుతోంది. ఇందులో భాగంగా వారం రోజుల పాటు అబుదాబిలో ఆహ్లాదంగా గడిపిన టీమ్‌ సోమవారం సాయంత్రం రాజ్కోట్ చేరుకుంది. రెండు, మూడో టెస్ట్‌‌కు మధ్య 10 రోజుల గ్యాప్‌ రావడంతో ఇంగ్లిష్‌ ప్లేయర్లందరూ ఫ్యామిలీస్‌‌తో కలిసి అబుదాబి వెళ్లారు. కాసేపు ఆటను పక్కనబెట్టిన వాళ్లంతా వివిధ ప్రాంతాలు తిరుగుతూ హాయిగా గడిపారు.
సిరీస్‌ మొదలుకావడానికి ముందు కూడా ఇంగ్లిష్‌ టీమ్‌ అబుదాబిలో చాలా రోజులు గడిపింది. ఇండియా స్పిన్నర్లను ఎలా ఎదుర్కోవాలన్న దానిపై అక్కడే స్కెచ్‌‌లు వేసింది. హైదరాబాద్‌ టెస్ట్‌‌లో దాన్ని సమర్థంగా అమలు చేసి సక్సెస్‌ కూడా అయ్యింది. ఇప్పుడు కూడా మూడో టెస్ట్‌‌కు సంబంధించిన ప్రిపరేషన్స్‌‌ను ఇంగ్లిష్‌ మేనేజ్‌‌మెంట్‌ పూర్తి చేసినట్లు సమాచారం. రాజ్కోట్ చేరుకున్న టీమ్‌ మంగళవారం ఉదయం సౌరాష్ట్ర క్రికెట్ స్టేడియంలో ప్రాక్టీస్‌ చేయనుంది. దీనికి సంబంధించిన ఏర్పాట్లను అసోసియేషన్‌ పూర్తి చేసింది. మధ్యాహ్నం నుంచి టీమిండియా ప్రాక్టీస్‌ మొదలుపెట్టనుంది.
