అంతర్జాతీయ క్రికెట్ లో ప్రస్తుతం భారత క్రికెట్ జట్టుకు ఎలాంటి మ్యాచ్ లు లేవు. మరో నాలుగు వారాల పాటు ఖాళీగానే ఉండాల్సిన పరిస్థితి. దీంతో భారత క్రికెట్ అభిమానులకు నెల పాటు నిరాశ తప్పట్లేదు. అయితే మిగతా జట్లు మాత్రం ద్వైపాక్షిక సిరీస్ లతో బిజీ కానున్నాయి. బుధవారం (ఆగస్టు 21) ఒక్క రోజే రెండు అంతర్జాతీయ సిరీస్ లు జరగనున్నాయి. వీటిలో మూడు ఆసియా దేశాలున్నాయి. పాకిస్థాన్ తో బంగ్లాదేశ్.. ఇంగ్లాండ్ తో శ్రీలంక తలపడనున్నాయి.
పాకిస్థాన్ స్వదేశంలో రెండు టెస్టుల సిరీస్ కు ఆతిధ్యమిస్తుంది. రెండు టెస్టులు కూడా రావల్పిండిలోనే జరుగుతాయి. మ్యాచ్ లు ఉదయం 10:30 నిమిషాలకు జరుగుతాయి. మరోవైపు ఇంగ్లాండ్ తమ గడ్డపై మూడు మ్యాచ్ ల టెస్ట్ సిరీస్ కు వేదిక కానుంది. తొలి టెస్ట్ మ్యాచ్ నేడు ఓల్డ్ ట్రాఫర్డ్ లోని మాంచెస్టర్ లో జరగనుంది. భారత కాలమాన ప్రకారం మ్యాచ్ లు మధ్యాహ్నం 3:30 నిమిషాలకు జరుగుతాయి. వరల్డ్ టెస్ట్ ఛాంపియన్ షిప్ లో భాగంగా అన్ని జట్లకు ఈ మ్యాచ్ లు కీలకం కానున్నాయి. టెస్ట్ సిరీస్ గెలిచి పాయింట్ల పట్టికలో పైకి రావాలని అన్ని జట్లు భావిస్తున్నాయి.
లైవ్ స్ట్రీమింగ్ ఎందులో చూడాలంటే..?
పాకిస్తాన్, బంగ్లాదేశ్ టెస్ట్ సిరీస్ ఇండియాలో ప్రత్యక్ష ప్రసారం లేదు. కేవలం పాకిస్థాన్ లోనే ఈ మ్యాచ్ లైవ్ వస్తుంది. టెన్ స్పోర్ట్స్ హెచ్‌డి, ఎ స్పోర్ట్స్ హెచ్‌డి టీవీ ఛానెల్‌లలో ప్రత్యక్ష ప్రసారం చేయబడుతుంది. మరోవైపు ఇంగ్లండ్, శ్రీలంక టెస్ట్ సిరీస్ ఇండియాలో సోనీ స్పోర్ట్స్ టెన్ 5 SD, సోనీ స్పోర్ట్స్ టెన్ 5 HD టీవీ ఛానెల్‌లలో ప్రత్యక్ష ప్రసారం చేయబడుతుంది.
