ఉద్యోగులకు ఈపీఎఫ్ఓ షాకిచ్చింది. పీఎఫ్ డిపాజిట్లపై వడ్డీ రేట్లను మరింత తగ్గించింది. ఈ ఏడాదైనా ఎక్కువ వడ్డీ ప్రకటిస్తుందని ఆశించిన పీఎఫ్ ఖాతాదారుల ఆశలపై నీళ్లు జల్లిన ఈపీఎఫ్ఓ.. 2021 – 22 ఆర్థిక సంవత్సరానికి వడ్డీ రేటు 8.1శాతంగా నిర్ణయించింది. గత ఫైనాన్షియల్ ఇయర్ తో పోలిస్తే ఈ మొత్తం 0.40 శాతం తక్కువ కావడం విశేషం. 1977 – 78 తర్వాత ఇంత తక్కువ వడ్డీ రేటు ప్రకటించడం ఇదే తొలిసారి. అప్పట్లో పీఎఫ్ మొత్తంపై 8శాతం వడ్డీ మాత్రమే ఇచ్చారు.
ఈపీఎఫ్ఓ 2016 –17, 2018 –19 ఆర్థిక సంవత్సరాల్లో 8.65శాతం చొప్పున వడ్డీ జమచేయగా.. 2013 – 14, 2014 – 15లో 8.75 శాతం చొప్పున ఇచ్చారు. 2015 – 16లో అత్యధికంగా 8.8 శాతం వడ్డీ జమ చేశారు. అయితే కోవిడ్ సంక్షోభ సమయంలో విత్‌డ్రాలు పెరగడం, చందాదారుల నుంచి జమయ్యే సొమ్ము తగ్గడంతో 2019 -20 ఆర్థిక సంవత్సరానికి ఈ వడ్డీని ఏడేళ్ల కనిష్ఠానికి తగ్గించారు. అప్పట్లో చందాదారులకు 8.5 శాతం వడ్డీ ఇచ్చారు. గతేడాది సైతం 8.5 శాతం వడ్డీ కొనసాగించారు. ఈపీఎఫ్ఓ నిర్ణయంపై కోట్లాది మంది ఉద్యోగులు అసంతృప్తి వ్యక్తం చేస్తున్నారు.
