పాలకుర్తి, వెలుగు: కాంగ్రెస్ ప్రభుత్వం నిర్లక్ష్యం తోనే రైతుల పంటలు ఎండి పోతున్నాయని మాజీ మంత్రి ఎర్రబెల్లి దయాకర్రావు ఆరోపించారు. జనగామ జిల్లా దేవరుప్పుల, కొడకండ్ల, పాలకుర్తి మండలాల్లోని పలు గ్రామాల్లో ఆయన సోమవారం ఎండిపోయిన పంట పొలాలను పరిశీలించారు. అధికారులతో మాట్లాడి తక్షణమే దేవాదుల నీటిని విడుదల చేయాలని కోరారు. గత పదేండ్లలో రైతులకు ఎప్పుడూ ఈ పరిస్థితి రాలేదని, ఎలాంటి పరిస్థితి ఉన్నా సాగునీరు తీసుకొచ్చానని చెప్పారు. ప్రైవేటుగా ప్రొక్లైనర్లు తీసుకొచ్చి కాలువలు తవ్వి చెరువులు నింపానని గుర్తు చేశారు.
ఇప్పుడు ఈ ప్రాంతం పూర్తిగా ఎడారిగా మారిపోయిందని అన్నారు. ధర్మసాగర్ రిజర్వాయర్లో నీళ్ళు ఉన్నాయని ప్రభుత్వం కో ఆర్డినేషన్ లేక పోవడం వల్లే వాటిని ఇటువైపు తీసుకు రాలేక పోతున్నారని అన్నారు. తాను రాజకీయాల కోసం ఇక్కడికి రాలేదని పంటలు ఎండిపోతున్నాయని రైతులు ఆందోళన చెందుతుంటే దైర్యం చెప్పేందుకు వచ్చానని అన్నారు. ఈ సందర్బంగా ఇరిగేషన్ ఆఫీసర్లకు ఫోన్ చేసి సకాలంలో రైతులకు సాగునీరు అందించేలా చర్యలు తీసుకోవాలని కోరారు.
