- వాటితోని వచ్చేది లేదు..పోయేది లేదు..
- రేవంత్ రెడ్డితో కలిసి జనగామ జిల్లా ఎత్తేసేందుకు కడియం కుట్ర
జనగామ, వెలుగు : ‘ఎంపీ ఎన్నికల ఫలితాలను పెద్దగా పట్టించుకోవద్దు. వాటితో వచ్చేది లేదు. పోయేది లేదు’ అని మాజీ మంత్రి ఎర్రబెల్లి దయాకర్ రావు అన్నారు. సోమవారం జనగామ జిల్లా కేంద్రం శివారు యశ్వంతాపూర్లోని బీఆర్ఎస్ జిల్లా పార్టీ ఆఫీస్లో తెలంగాణ అవతరణ వేడుకల ముగింపు సందర్భంగా ఏర్పాటు చేసిన సమావేశంలో మాట్లాడారు. మాయ మాటలతో అధికారంలోకి వచ్చిన రేవంత్రెడ్డి ప్రభుత్వం మరో యేడాదిలో పడిపోయే చాన్స్ ఉందన్నారు.
తెలంగాణలో ప్రజలు కేసీఆర్పాలననే కోరుకుంటున్నారన్నారు. మహబూబ్నగర్లో ఎమ్మెల్సీ గెలిచామని, వరంగల్–నల్గొండ– ఖమ్మం గ్రాడ్యుయేట్ఎమ్మెల్సీ కూడా గెలువబోతున్నామని ధీమా వ్యక్తం చేశారు. సీఎం రేవంత్రెడ్డితో కలిసి స్టేషన్ఘన్పూర్ఎమ్మెల్యే కడియం శ్రీహరి జనగామ జిల్లాను ఎత్తేసేందుకు కుట్ర చేస్తున్నాడని ఆరోపించారు. జిల్లాను కాపాడుకునేందుకు మరో ఉద్యమానికి సిద్ధంగా ఉండాలన్నారు.
స్టేషన్ ఘన్పూర్లో ఉప ఎన్నిక వచ్చే అవకాశం ఉందని, కార్యకర్తలు రెడీగా ఉండాలన్నారు. జనగామ ఎమ్మెల్యే పల్లా రాజేశ్వర్ రెడ్డి మాట్లాడుతూ తనపై కాంగ్రెస్ లీడర్ఒత్తిడితో ఎన్నికల ఉల్లంఘన కేసు నమోదు చేశారన్నారు. పోలీసులు కాంగ్రెస్కు అనుకూలంగా వ్యవహరించి తన జోలికి వస్తే ఊరుకునేది లేదన్నారు. మాజీ ఎమ్మెల్యే రాజయ్య మాట్లాడుతూ కడియం నమ్మక ద్రోహి అన్నారు. జడ్పీ చైర్పర్సన్ గిరబోయిన భాగ్యలక్ష్మి, మున్సిపల్ చైర్పర్సన్ పోకల జమున, ఎడవెల్లి కృష్ణారెడ్డి, గద్దల నర్సింగరావు, ఇర్రి రమణారెడ్డి, గాంధీ నాయక్, వారాల రమేశ్, చెంచారపు పల్లవి, చిట్ల జయశ్రీ పాల్గొన్నారు.
