సుమన్ బాబు హీరోగా నటిస్తూ, దర్శక నిర్మాతగా రూపొందిస్తున్న చిత్రం ‘ఎర్రచీర’. కారుణ్య చౌదరి హీరోయిన్. నటుడు రాజేంద్ర ప్రసాద్ మనవరాలు బేబీ సాయి తేజస్విని ముఖ్య పాత్ర పోషిస్తోంది. డిసెంబర్ 20న సినిమా రిలీజ్ కానుంది. గురువారం ఈ చిత్రం నుంచి ‘తొలిముద్దు’ అనే పాటను విడుదల చేశారు.
ఈ సందర్భంగా నిర్వహించిన కార్యక్రమానికి అతిథిగా హాజరైన దర్శకుడు వీర శంకర్ సినిమా విజయం సాధించాలని విష్ చేశారు. సుమన్ బాబు మాట్లాడుతూ ‘హారర్, మదర్ సెంటిమెంట్, యాక్షన్‌‌తో కూడిన ఈ సినిమాలో అన్ని ఎలిమెంట్స్ ఉంటాయి.
ఇలాంటి సీరియస్ సబ్జెక్ట్‌‌లో భార్యాభర్తల మధ్య ఓ రొమాంటిక్ సాంగ్ కూడా ఉండాలని భావించాం. మా ఆలోచనకు తగినట్లే జయసూర్య మంచి లిరిక్స్ ఇచ్చారు. అలాగే ప్రమోద్ ఆకట్టుకునేలా కంపోజ్ చేశారు.
ఈ పాటలో సెట్ వర్క్ ఆకర్షణగా నిలుస్తుంది’ అని చెప్పాడు. ఈ కథలో మదర్ సెంటిమెంట్ ఆకట్టుకునేలా ఉంటుందని హీరోయిన్ కారుణ్య చౌదరి చెప్పింది. సంగీత దర్శకుడు ప్రమోద్, లిరిక్ రైటర్ జయసూర్య కార్యక్రమంలో పాల్గొన్నారు.
