- ఐటీడీఏ పీవో రాహుల్
భద్రాచలం, వెలుగు : ఈనెల 9,10,11 తేదీల్లో భద్రాద్రికొత్తగూడెం జిల్లాలో నిర్వహించే ఏరు ఫెస్టివల్ ఏర్పాట్లు తుది దశకు చేరుకున్నాయని ఐటీడీఏ పీవో బి.రాహుల్తెలిపారు. గోదావరి కరకట్ట ప్రాంతంలో చేపడుతున్న ఫెస్టివల్ పనులను శనివారం ఆయన తనిఖీ చేశారు. గుడారాలు, ఆదివాసీల వంటలతో కూడిన డైనింగ్ రూం, స్టాల్స్, గోదావరిలో టూరిస్టులు ప్రయాణించే బోటు భద్రతను ఆయన పరిశీలించారు. ఈ సందర్భంగా ఆయన మాట్లాడుతూ టూరిస్టులకు అన్ని రకాల వసతి సౌకర్యాలు 90 శాతం పూర్తయ్యాయని తెలిపారు.
గుడారాలతో కూడిన విడిదికి సోలార్ లైటింగ్ ఏర్పాటు చేసినట్లు వివరించారు. టూరిస్టులు గోదావరి అందాలతో సెల్ఫీ దిగే పాయింట్ నిర్మాణ పనులను చూశారు. కల్చరల్ ప్రోగ్రాంలు నిర్వహించే వేదికను ఆఫీసర్లతో కలిసి పరిశీలించారు. వైటీసీలో స్టాల్స్ ఏర్పాట్లపై డిజైనర్తో కలిసి చర్చించారు. ఆదివాసీ మహిళా సంఘాలతో స్టాల్స్ నిర్వహించాల్సిన తీరుపై పలు సూచనలు చేశారు. ఈ కార్యక్రమంలో డీఆర్డీవో విద్యాచందన, డీఎం జీసీసీ సమ్మయ్య తదితరులు పాల్గొన్నారు.
