గద్వాల, వెలుగు: ఎన్నికల్లో ఓట్ల కోసం కొత్త రకం వేషగాళ్లు వస్తున్నారని, వాళ్ల మాటలు నమ్మితే మోసపోతామని బీఆర్ఎస్ అభ్యర్థి, ఎమ్మెల్యే బండ్ల కృష్ణమోహన్ రెడ్డి అన్నారు. మంగళవారం మండలంలోని పలు గ్రామాల్లో ప్రచారం చేసిన అనంతరం గద్వాలలో భారీ ర్యాలీ నిర్వహించారు. ఈ సందర్భంగా మాట్లాడుతూ బీఆర్ఎస్ పాలనలో ప్రతి ఇంటికి సంక్షేమ పథకాలు అందాయన్నారు.
కాంగ్రెస్ పాలనలో ప్రజలు అష్టకష్టాలు పడ్డారని, మళ్లీ ఆ కష్టాలను కొని తెచ్చుకోవద్దన్నారు. కేసీఆర్ వ్యవసాయాన్ని పండుగ చేశారన్నారు. తాను లోకల్ అని, ఇక్కడే పుట్టాను ఇక్కడే పెరిగాను ఇక్కడి మట్టిలోనే కలుస్తానని ఆయన ఎమోషనల్ అయ్యారు. అభివృద్ధి కావాలో, అవినీతిపరులు కావాలో ప్రజలు నిర్ణయించుకోవాలన్నారు. అలంపూర్ వారిని బయటకు పంపి గద్వాల పౌరుషాన్ని నిలబెట్టాలన్నారు. ఐదేళ్లలో ఎంతో అభివృద్ధి చేశానని మరొకసారి ఆశీర్వదిస్తే మరింత అభివృద్ధి చేస్తానన్నారు. కార్యక్రమంలో నాయకులు, కార్యకర్తలు పాల్గొన్నారు.
