భద్రాద్రి కొత్తగూడెం, వెలుగు: ప్రైవేట్ స్కూళ్లు, కాలేజీలు ప్రభుత్వ నిబంధనలను పక్కకు పెట్టి ఇష్టారాజ్యంగా ఎగ్జామ్ ఫీజులు వసూలు చేస్తున్నాయనే ఆరోపణలు వస్తున్నాయి. ప్రైవేట్ స్కూల్స్, కాలేజీల యాజమాన్యాలతో కుమ్ముక్కై అధికారులు ఈ విషయం తమ దృష్టికి రాలేదని తప్పించుకుంటున్నారని పేరెంట్స్ విమర్శిస్తున్నారు. ఇదిలాఉంటే జిల్లాలోని పలు జూనియర్, ఒకేషనల్ కాలేజీలకు ప్రభుత్వం నుంచి ఇంకా గుర్తింపు రాలేదు. ఎగ్జామ్ ఫీజు డేట్ దగ్గర పడుతుండడంతో ఆయా కాలేజీల్లో చదువుతున్న విద్యార్థులు అయోమయానికి గురవుతున్నారు. గుర్తింపు వస్తుందని కాలేజీ యాజమాన్యాలు చెబుతున్నా పేరెంట్స్ మాత్రం తమ పిల్లల భవిష్యత్ ఏమిటని ఆందోళన చెందుతున్నారు.
అడ్డగోలుగా ఎగ్జామ్ ఫీజుల వసూళ్లు..
పదో తరగతి పబ్లిక్ ఎగ్జామ్ ఫీజు రూ. 125 వసూలు చేయాల్సి ఉంది. ఇందుకు విరుద్ధంగా ప్రైవేట్ స్కూల్స్లో రూ. 500 నుంచి రూ. 1000 వరకు వసూలు చేస్తున్నారు. ఇంటర్ ఎగ్జామ్ ఫీజు రూ. 500 నుంచి రూ.710 వరకు వసూలు చేయాల్సి ఉండగా, ప్రైవేట్ జూనియర్ కాలేజీల్లో రూ.1500 నుంచి రూ.2 వేల వరకు వసూలు చేస్తున్నారని పేరెంట్స్ వాపోతున్నారు. ఈ విషయమై ఎవరైనా నిలదీస్తే ప్రాక్టికల్స్, ఇంటర్నల్స్ మార్కుల్లో కోత విధిస్తామని పరోక్షంగా హెచ్చరిస్తున్నారు. అధికారులకు చెప్పుకున్నా తమకేమి కాదంటూ ప్రైవేట్ జూనియర్, ఒకేషనల్ కాలేజీ నిర్వాహకులు చెబుతున్నారు.
అయోమయంలో స్టూడెంట్లు..
జిల్లాలో దాదాపు 35 ప్రైవేట్ జూనియర్, ఒకేషనల్ కాలేజీలున్నాయి. ఇందులో ఐదు కాలేజీలకు ప్రభుత్వం నుంచి గుర్తింపు రాలేదు. గుర్తింపు ఉంటేనే ఎగ్జామ్ ఫీజు చెల్లించాల్సి ఉంటుంది. ఇన్టైంలో గుర్తింపు రాకపోతే ఆ కాలేజీల్లో చదువుతున్న స్టూడెంట్లు ఈ విద్యా సంవత్సరం నష్టపోయే ప్రమాదం ఉందని విద్యార్థి సంఘాల నాయకులు చెబుతున్నారు. కొత్తగూడెంలోని మదీన ఒకేషనల్ జూనియర్ కాలేజ్, భద్రాచలంలోని ఆర్ఆర్కే జూనియర్ కాలేజ్, లక్ష్మీదేవిపల్లి మండలంలోని పులిపాటి ఒకేషనల్ జూనియర్ కాలేజ్, చండ్రుగొండలోని ఎస్కేఎం జూనియర్ కాలేజ్, జూలూరుపాడులోని సాధన కాలేజీలకు ప్రభుత్వం నుంచి గుర్తింపు రాలేదు. ఫైర్ సర్టిఫికెట్ లేకపోవడం, నిబంధనల ప్రకారం బిల్డింగ్ లేదనే కారణాలతో ఈ కాలేజీలకు గుర్తింపు ఇవ్వలేదు. దీంతో వందలాది మంది స్టూడెంట్ల భవిష్యత్తు ఆగమ్య గోచరంగా మారే ప్రమాదం ఉంది. ఇక ఈ కాలేజీల యాజమాన్యాలు ఎగ్జామ్ ఫీజును ఇప్పటికే కలెక్ట్ చేసి తమ దగ్గర పెట్టుకున్నాయి. ఎగ్జామ్ ఫీజు వసూలు చేయకపోతే తప్పుడు ప్రచారం జరుగుతుందనే ఉద్దేశంతో ఎగ్జామ్ ఫీజును వసూలు చేయడం గమనార్హం. ఇన్టైంలో గుర్తింపు తెచ్చుకోవడంలో కాలేజీ యాజమాన్యాలు విఫలమయ్యాయని విద్యార్థి సంఘాల నాయకులు అంటున్నారు. కనీసం లేట్ ఫీజు గడువు ముగిసే వరకైనా గుర్తింపు వచ్చేలా చూడాలని విద్యార్థి సంఘాల నాయకులు డిమాండ్ చేస్తున్నారు. విద్యార్థుల భవిష్యత్తో ఆటలాడుకుంటే ఆందోళన చేస్తామని వారు హెచ్చరిస్తున్నారు.
ప్రభుత్వం సానుకూలంగా ఉంది..
జిల్లాలోని 5 జూనియర్, ఒకేషనల్ కాలేజీలకు గుర్తింపు రాలేదు. ఈ కాలేజీలకు త్వరలో గుర్తింపు వచ్చే అవకాశం ఉంది. ఫైన్తో వచ్చే నెల 12 వరకు ఫీజు కట్టేందుకు అవకాశం ఉంది. అధికంగా ఫీజులు వసూలు చేస్తున్న కాలేజీలపై ఫిర్యాదు చేస్తే చర్యలు తీసుకుంటాం. - సులోచనారాణి, ఇంటర్మీడియట్ నోడల్ ఆఫీసర్
ఆ స్కూళ్లపై చర్యలు తీసుకుంటాం
ప్రైవేట్ స్కూల్స్ లోఎగ్జామ్ ఫీజును అధికంగా వసూలు చేస్తే కఠిన చర్యలు తీసుకుంటాం. ఎగ్జామ్ ఫీజు ఎక్కువగా వసూలు చేస్తున్నారని ఇప్పటి వరకు ఎవరూ ఫిర్యాదు చేయలేదు. ఫిర్యాదు చేస్తే ఆయా స్కూల్స్పై చర్యలు తీసుకుంటాం. - సోమశేఖర శర్మ, డీఈవో
