- కల్లు దుకాణ లైసెన్స్ కోసం రూ.90 వేలు డిమాండ్
జడ్చర్ల టౌన్, వెలుగు : కల్లు దుకాణ లైసెన్స్ ఇవ్వడానికి వ్యాపారి నుంచి లంచం తీసుకుంటూ ఎక్సైజ్ సీఐ ఏసీబీ ఆఫీసర్లకు దొరికాడు. మహబూబ్నగర్ ఏసీబీ డీఎస్పీ శ్రీకృష్ణ కథనం ప్రకారం..జిల్లాలోని భూత్పూర్ మండలం పోతులమడుగుకు చెందిన తిరుపతయ్య గౌడ్ 20 ఏండ్ల నుంచి కల్లు వ్యాపారం చేస్తున్నాడు. ఆయన కొడుకులైన శ్రీకాంత్, శ్రీహరి పేరిట కల్లు దుకాణ లైసెన్స్ కోసం ఈ నెల 17న జిల్లా కేంద్రంలోని ఈఎస్ ఆఫీస్లో అప్లికేషన్ పెట్టుకున్నాడు. ఎంక్వైరీలో భాగంగా ఆఫీసర్లు జడ్చర్ల సీఐని కలవాలని చెప్పగా, 18న తిరుపతయ్య జడ్చర్ల ఎక్సైజ్ సీఐ బాలాజీని కలిశాడు. అయితే, ఉన్నతాధికారులకు రిపోర్ట్ పంపాలంటే రూ.90 వేలు ఇవ్వాలని సీఐ డిమాండ్ చేశాడు.
మరుసటి రోజు తిరుపతయ్య వచ్చి డబ్బులు తగ్గించుకోవాలని కోరగా, అర్జంట్గా కొన్ని డబ్బులు ఇవ్వాలని చెప్పడంతో తిరపతయ్య రూ.25 వేలు ఇచ్చాడు. మిగతా రూ.65 వేలు ఈ నెల 22న ఇవ్వాలని సీఐ చెప్పడంతో బాధితుడు ఏసీబీని ఆశ్రయించాడు. వారి సూచన మేరకు సోమవారం తిరుపతయ్య రూ.65 వేలు సీఐకి ఇవ్వగా ఏసీబీ అధికారులు రెడ్హ్యాండెడ్గా పట్టుకున్నారు. విచారణ తర్వాత మంగళవారం నాంపల్లి ఏసీబీ స్పెషల్ కోర్టులో ప్రొడ్యూస్ చేస్తామని డీఎస్పీ తెలిపారు.
