వామ్మో.. ఇంత పోతే ఇంకేం మిగుల్తయ్.. హైదరాబాద్లో మిడిల్ క్లాస్ ఫ్యామిలీ ఖర్చు.. నెలకు ఎంతో తెలుసా..?

మన దేశంలోని మెట్రో నగరాల్లో ఒక మధ్య తరగతి కుటుంబం బతకాలంటే ఖర్చు నెలకు ఎంత అవుతుందనే ఆసక్తికర చర్చ మరోసారి తెరపైకొచ్చింది. తెలుగు రాష్ట్రాలకు చెందిన చాలామంది హైదరాబాద్, బెంగళూరు, చెన్నై నగరాల్లో ఎక్కువగా ఉద్యోగాలు చేస్తూ జీవనం సాగిస్తుంటారు. పొట్ట చేత్తో పట్టుకుని మెల్లగా ఎలాగోలా బతికేయాలని ఈ నగరాల బాట పట్టిన వాళ్లు కూడా లక్షల్లో ఉన్నారు. ఎంత సంపాదిస్తే.. ఎంత మిగులుతుందనే అంశం కాసేపు పక్కన పెడదాం. ఎంత సంపాదిస్తే మన దేశంలోని ప్రముఖ నగరాల్లో ఒక మధ్య తరగతి కుటుంబం ఉన్నంతలో సుఖంగా జీవిస్తుందనే ప్రశ్నకు ఒక సర్వే ఆసక్తికర విషయాలను వెల్లడించింది. 

హైదరాబాద్ నగరంలో మంత్లీ లివింగ్ కాస్ట్ అదేనండీ ఒక మధ్య తరగతి కుటుంబం చీకూచింతా లేకుండా బతకాలంటే నెలకు 30 వేలకు పైగానే ఖర్చవుతుందని తెలిసింది. రవాణా ఖర్చులు పెరగడం, నిత్యావసరాల ధరలు పెరగడం, పిల్లల స్కూల్ ఫీజులు తల్లిదండ్రులకు గుదిబండగా మారడం.. ఇలా పలు అంశాలు హైదరాబాద్ నగరంలో కాస్ట్ ఆఫ్ లివింగ్ పెరగడానికి కారణమయ్యాయి.

కరోనా సమయంలో అందరూ సొంతూళ్లు వెళ్లిపోవడంతో ఇంటి అద్దెలను భారీగా తగ్గించి టూలెట్ బోర్డులు పెట్టిన ఓనర్లు కరోనా తర్వాత మాత్రం ఇంటి అద్దెలను అమాంతం పెంచేశారు. ఇంటి అద్దెను ఆదాయంలా కంటే కూడా అప్పులు తీర్చే అవసరంగా ఇళ్ల ఓనర్లు చూస్తుండటమే ఇందుకు కారణం. కరోనాకు ముందు లక్షలు, కోట్లు పెట్టి ఇళ్లు కట్టారు. కరోనా కారణంగా అద్దెకు దిగే వాళ్లు లేకపోవడంతో ఇళ్ల ఓనర్లు కుదేలయ్యారు. ఆ అప్పుల నుంచి కోలుకుని మళ్లీ ఆదాయం పెంచుకునేందుకు ఇంటి అద్దెలను అమాంతం పెంచేశారు.

హైదరాబాద్ మెయిన్ సిటీలో 1బీహెచ్కే 10 వేల రూపాయలకు తక్కువ లేని పరిస్థితులున్నాయి. హైదరాబాద్ నగరంలో సింగిల్ బెడ్ రూం అద్దె 10 వేల నుంచి 20 వేల మధ్య ఉందంటే లివింగ్ కాస్ట్ ఎలా పెరిగిందో అర్థం చేసుకోవచ్చు. ఖర్చులు పెరిగినంత స్థాయిలో ప్రజల ఆదాయం పెరగదన్న విషయం అందరికీ తెలిసిందే. వ్యాపారాల్లో కాంపిటీషన్ పెరిగింది. ఉద్యోగుల పరిస్థితి మరీ దారుణం. ఉద్యోగాల్లో అయితే ఇంక్రిమెంట్ల మాట దేవుడెరుగు.. లేఆఫ్స్ పేరుతో జాబ్ ఎక్కడా పీకేస్తారో అనే భయం నెలకొంది.

ఐదారేళ్ల క్రితం ఉన్న అద్దెలు వేరు. ఇప్పుడు వేరు. ఇంటి అద్దెలు భారీగా పెరగడం కూడా హైదరాబాద్ నగరంలో లివింగ్ కాస్ట్ పెరగడానికి ప్రధాన కారణం. ఒక్క హైదరాబాద్ నగరంలోనే కాదు ముంబై, ఢిల్లీ, చెన్నై, బెంగళూరు, పుణె, కోల్కత్తా.. ఇలా మెట్రో నగరాలన్నింటిలో ఇదే పరిస్థితి. ముంబై, బెంగళూరు లాంటి నగరాల్లో అయితే నెలకు 35 వేల ఖర్చు దాటుతున్న పరిస్థితులున్నాయి.

లివింగ్ కాస్ట్ ఏ సిటీలో ఎలా ఉందో లుక్కేద్దాం..
* హైదరాబాద్- 31 వేల 253 రూపాయలు
* బెంగళూరు- 35 వేల 887 రూపాయలు
* చెన్నై- 29 వేల 342 రూపాయలు
* ముంబై- 33 వేల 321 రూపాయలు
* ఢిల్లీ- 33 వేల 308 రూపాయలు
* అహ్మదాబాద్- 31 వేల 48 రూపాయలు
* కోల్కత్తా -27 వేల 869 రూపాయలు
* లక్నో- 28 వేల 376 రూపాయలు
* జైపూర్- 27 వేల 813 రూపాయలు