- పనుల విలువపై అంచనా వేసిన ఇరిగేషన్ శాఖ
- తొలుత కడెం, లోయర్, మిడ్మానేరులో పూడికతీత టెండర్లకు నోటిఫికేషన్
హైదరాబాద్, వెలుగు: రాష్ట్ర ప్రభుత్వం ప్రతిష్టాత్మకంగా తీసుకున్న నదుల పూడికతీతతో వచ్చే రాబడి/ఖర్చుపై ఇరిగేషన్ శాఖ అంచనాలను రూపొందించింది. పైలెట్ప్రాజెక్టుగా కడెం, లోయర్మానేరు, మిడ్మానేరు డ్యామ్లలో పూడికను తీయాలని సర్కారు నిర్ణయించిన సంగతి తెలిసిందే. ఈ నేపథ్యంలో ఆ మూడు ప్రాజెక్టుల్లో పూడికతీత పనుల విలువ రూ.1,439.55 కోట్లు అని అంచనా వేసింది. ఆ పనుల కోసం ఈ టెండర్లను పిలుస్తూ కరీంనగర్ ఎస్ఈ నోటిఫికేషన్ జారీ చేశారు. ఈ నెల 4న టెండర్లను ప్రారంభించగా.. టెండర్లు దాఖలు చేసేందుకు 21వరకు గడువిచ్చారు.
ఈ నెల 20 మధ్యాహ్నం 3 గంటల వరకు టెండర్ అప్లికేషన్లు అందుబాటులో ఉంటాయని తెలిపారు. 20 ఏండ్ల టైం బాండ్తో ఆయా నదుల్లో పూడికతీత పనులను చేపట్టాల్సి ఉంటుందని పేర్కొన్నారు. మొత్తంగా మూడు ప్రాజెక్టుల్లోనూ 4.26 కోట్ల టన్నుల పూడికను తీయనున్నట్టు అధికారులు చెప్తున్నారు. పనుల విలువకు అంచనా కట్టిన సొమ్మును ప్రభుత్వానికి సదరు సంస్థలు జమ చేయాల్సి ఉంటుందని పేర్కొంటున్నారు. ఈ 20 ఏండ్ల కాలంలో పూడికను తీయడం ద్వారా సదరు సంస్థలు ఆదాయాన్ని సమకూర్చుకోవచ్చని అంటున్నారు.
కడెంలోనే ఎక్కువ పూడిక..
మూడింట్లో కడెం ప్రాజెక్టులోనే భారీగా పూడికపేరుకుపోయినట్టు అధికారులు చెప్తున్నారు. దాదాపు 70 శాతం మేర ప్రాజెక్టులో పూడిక ఉందంటున్నారు. ఈ పూడికతోనే ప్రాజెక్టుకు ముప్పు ఏర్పడుతున్నదని పేర్కొంటున్నారు. ఈ క్రమంలో పూడికను తీస్తే ఆ ప్రాజెక్టు కింద ఉన్న 68 వేల ఎకరాలకు నీళ్లివ్వొచ్చని అధికారులు భావిస్తున్నారు. ప్రస్తుతం పూడిక సమస్యతో పూర్తిస్థాయిలో ఆయకట్టుకు నీరు అందడం లేదు. ఇటీవల వచ్చిన వరదలకు గేటు కొట్టుకుపోవడంతో రూ.10 కోట్లతో కాంగ్రెస్ సర్కారు రిపేర్లు చేయించింది.
దీంతో ఈ యాసంగికి ప్రాజెక్టు కింద ఉన్న 42 డిస్ట్రిబ్యూటరీల ద్వారా 16 వేల ఎకరాలకు నీళ్లివ్వనున్నారు. లోయర్ మానేరు, మిడ్ మానేరు డ్యామ్లలోనూ పూడిక ఉన్నా.. తీవ్రత మాత్రం అంతగా లేదని చెప్తున్నారు. పైలెట్ ప్రాజెక్టుగానే వాటిని తీసుకున్నామని, వచ్చే ఫలితాల ఆధారంగా ఇతర ప్రాజెక్టుల్లోనూ పూడికతీతను చేపట్టనున్నట్టు అధికారులు పేర్కొన్నారు.
