- తొలుత అన్నారం, సుందిళ్ల బ్యారేజీలపై సీడబ్ల్యూపీఆర్ఎస్ బృందం స్టడీ
- ఆ తర్వాత మేడిగడ్డ బ్యారేజీ వద్ద పరీక్షలు
- రెండు రోజుల తర్వాత ఎన్జీఆర్ఐ, సీఎస్ఎంఆర్ఎస్ నిపుణులు కూడా
- మేడిగడ్డ ఎగువన జియోట్యూబ్స్ ఏర్పాటుకు నిర్ణయం
- 15 రోజుల్లో పనులు పూర్తి చేసేలా రాష్ట్ర సర్కారు కసరత్తు
హైదరాబాద్, వెలుగు: పుణె నుంచి వస్తున్న సెంట్రల్ వాటర్ అండ్ పవర్ రీసెర్చ్ సెంటర్(సీడబ్ల్యూపీఆర్ఎస్)కు చెందిన నిపుణులు కాళేశ్వరం బ్యారేజీలను బుధవారం పరిశీలించనున్నారు. సీడబ్ల్యూపీఆర్ఎస్కు చెందిన ముగ్గురు టెక్నికల్ నిపుణులు బ్యారేజీలను పరిశీలిస్తారని అధికారులు చెప్పారు. అక్కడ ఎన్డీటీ (నాన్ డిస్ట్రక్టివ్ టెస్ట్స్)తో పాటు జియోఫిజికల్, జియో టెక్నికల్ టెస్టులు చేస్తారని వెల్లడించారు. ఫ్లడ్కు తగ్గట్టు ఇప్పుడున్న సిమెంట్ బ్లాకులు, బ్యారేజీలోని నిర్మాణాలు తట్టుకుంటాయా? లేదా? అని పరీక్షిస్తారని చెప్పారు. తొలుత అన్నారం, సుందిళ్ల బ్యారేజీలను పరిశీలించి, ఆ తర్వాత మేడిగడ్డ బ్యారేజీ వద్ద టెస్ట్లు చేస్తారని అధికారులు చెప్తున్నారు. మరోవైపు నేషనల్ జియోఫిజికల్ రీసెర్చ్ ఇన్స్టిట్యూట్ (ఎన్జీఆర్ఐ), ఢిల్లీకి చెందిన సెంట్రల్ సాయిల్ అండ్ మెటీరియల్ రీసెర్చ్ స్టేషన్ (సీఎస్ఎంఆర్ఎస్)ల నిపుణులు రెండు రోజుల తర్వాత బ్యారేజీల వద్ద టెస్టులు చేస్తారని, దానికి సంబంధించిన ప్రజెంటేషన్ ఇస్తారని పేర్కొంటున్నారు. కాగా, మూడు బ్యారేజీల వద్ద రిపేర్ల పనులు, ఖర్చులను నిర్మాణ సంస్థలే భరించనున్నట్టు అధికారులు చెప్తున్నారు.
మేడిగడ్డ బ్యారేజీకి ఎగువన జియోట్యూబ్స్
మేడిగడ్డ బ్యారేజీకి ఎగువన వరదకు అడ్డుకట్టగా, పంప్హౌస్లకు నీటిని ఎత్తిపోసేలా జియోట్యూబ్స్తో ఓ తాత్కాలిక గోడను నిర్మించనున్నట్టు అధికారులు చెప్తున్నారు. మేడిగడ్డ బ్యారేజీకి ఎగువన 17 కిలోమీటర్ల దూరంలో కన్నెపల్లి పంప్ హౌస్ల హెడ్రెగ్యులేటర్ దగ్గర ఈ జియోట్యూబ్లను ఏర్పాటు చేస్తారని అంటున్నారు. 500 మీటర్ల పొడవున రెండున్నర మీటర్ల ఎత్తుతో వీటిని ఏర్పాటు చేస్తారని చెప్తున్నారు. ఆ ఎత్తు నుంచి నీళ్లను పంప్చేసుకునేందుకు అవకాశం ఉంటుందని అంటున్నారు. ఇక ఇటు అన్నారం, సుందిళ్ల బ్యారేజీల వద్ద కూడా పంప్హౌస్ల నుంచి నీళ్లు ఎత్తిపోసుకునేలా అన్నారం వద్ద 11 మీటర్లు, సుందిళ్ల వద్ద 9 మీటర్ల ఎత్తులో నీటిని నిల్వ ఉంచేలా ఏర్పాట్లు చేస్తున్నట్టు అధికారులు చెప్తున్నారు. ఈ జియోట్యూబ్లు అల్ట్రావయొలెట్ కిరణాలను కూడా తట్టుకుంటాయని తెలిపారు. దాదాపు 30 నుంచి 40 ఏండ్లపాటు మన్నుతాయని, ఓసారి వాడాక తిరిగి వాడుకోవడానికీ వీలుంటుందని స్పష్టం చేస్తున్నారు. అసోంలో బ్రహ్మపుత్ర నదికి వరదలు వచ్చినప్పుడు ఈ జియోట్యూబ్లను వాడినట్టు అధికారులు చెప్తున్నారు. వాటిని ఈఎన్సీ (ఓ అండ్ ఎం) నాగేందర్ రావు నేతృత్వంలోని ఇరిగేషన్ అధికారులు పరిశీలించారని తెలిపారు. దీంతో ఈ జియోట్యూబ్లనే మేడిగడ్డ బ్యారేజీకి ఎగువన ఏర్పాటు చేయనున్నట్టు చెప్తున్నారు. దీనికి సంబంధించి సంస్థ రెండు రోజుల్లో ప్రజెంటేషన్ ఇవ్వనుందని వెల్లడించారు.
15 రోజుల్లో పూర్తయ్యేలా
కాళేశ్వరంలోని బ్యారేజీల వద్ద రిపేర్లు, టెస్టులు వీలైనంత త్వరగా పూర్తి చేస్తామని అధికారులు స్పష్టం చేస్తున్నారు. 15 రోజుల్లో పనులను పూర్తి చేసేందుకు కసరత్తు చేస్తున్నట్టు చెప్తున్నారు. వాస్తవానికి అల్పపీడనం ప్రభావంతో రాష్ట్రంపై తుఫాన్ ఎఫెక్ట్ ఉంటుందని అంచనా వేసినా.. ఇప్పుడు ఆ ముప్పు తప్పిపోవడంతో ఆ టైంలోపు పనులను పూర్తి చేయొచ్చని భావిస్తున్నారు. వరదలతో పాడైపోయిన కన్నెపల్లి పంప్హౌస్లోని మోటర్లు, అన్నారంలోని రెండు మోటర్లనూ రిపేర్ చేసి సిద్ధం చేసినట్టు అధికారులు చెప్తున్నారు. మరోవైపు నేషనల్ డ్యామ్ సేఫ్టీ అథారిటీ (ఎన్డీఎస్ఏ) నిపుణుల కమిటీ సూచించిన చర్యలను చేపట్టడం, ఆ పనులను పర్యవేక్షించడం కోసం ఇప్పటికే ప్రభుత్వం కమిటీ వేసిన సంగతి తెలిసిందే. దానికి సంబంధించిన ఉత్తర్వులను ప్రభుత్వం జారీ చేసింది. ఈఎన్సీ (జనరల్) అనిల్ కుమార్ చైర్మన్గా కమిటీ వేశారు. ఈఎన్సీ (ఓ అండ్ఎం) నాగేందర్ రావు, సెంట్రల్ డిజైన్స్ ఆర్గనైజేషన్ (సీడీవో), రామగుండం సీఈలు సభ్యులుగా ఉండనున్నారు. ఈఎన్సీ (జనరల్) అవసరమనుకుంటే మరో ఇద్దరు టెక్నికల్ నిపుణులనూ కమిటీలో చేర్చుకునేందుకు అవకాశం ఇచ్చారు.
