ఇస్లామాబాద్: షాంఘై కో ఆపరేషన్ ఆర్గనైజేషన్ (ఎస్సీవో) కాన్క్లేవ్లో పాల్గొనేందుకు విదేశీ వ్యవహారాల శాఖ మంత్రి జైశంకర్ మంగళవారం పాకిస్తాన్ చేరుకున్నారు. ఇస్లామాబాద్ శివారులోని నూర్ ఖాన్ ఎయిర్బేస్లో దిగిన ఆయనకు అక్కడి అధికారులు స్వాగతం పలికారు. అనంతరం పాకిస్తాన్ ప్రధానమంత్రి షెహబాజ్ షరీఫ్ ను జైశంకర్ కలిశారు. షేక్ హ్యాండ్ ఇచ్చి కాసేపు ముచ్చటించారు.
ఎస్సీవో సభ్యదేశాల ప్రతినిధుల కోసం షెహబాజ్ షరీఫ్ తన నివాసంలో మంగళవారం రాత్రి విందు ఏర్పాటు చేశారు. దీనికి జైశంకర్తో పాటు ఆయా దేశాల ప్రతినిధులు హాజరయ్యారు. బుధవారం, గురువారం ఎస్సీవో సదస్సు జరగనున్నది. వాణిజ్యం, ఆర్థిక అంశాలే ఎజెండాగా ఏడాదికోసారి ఎస్సీవో సదస్సు నిర్వహిస్తారు. ఇండియా బృందానికి జైశంకర్ నేతృత్వం వహిస్తారు. మరోవైపు ఈ సదస్సులో చైనా, రష్యా ప్రధానులు కూడా పాల్గొననున్నారు.
