- అడ్డుకున్న కొత్తగూడెం పట్టణ ప్రజలు
- పట్టణ నడిబొడ్డున రూ.కోటి విలువ చేసే స్థలంపై కబ్జాదారుల కన్ను
- లీడర్ల అండదండలతో
- పలుమార్లు ఆక్రమణకు యత్నం
- ల్యాండ్ రక్షణకు చర్యలు చేపట్టాలని స్థానికుల విజ్ఞప్తి
భద్రాద్రికొత్తగూడెం, వెలుగు : జిల్లా కేంద్రమైన కొత్తగూడెం పట్టణం నడిబొడ్డున ఉన్న రూ.కోటికి పైగా విలువైన సర్కార్ ల్యాండ్పై కబ్జాదారుల కన్ను పడింది. కొందరు పొలిటికల్లీడర్ల అండదండలతో ల్యాండ్ను ఆక్రమించుకునేందుకు స్కెచ్ వేశారు. గతంలో కబ్జాకు యత్నించడంతో ఆఫీసర్లు ఆ ల్యాండ్ చుట్టూ ఫెన్సింగ్ వేశారు. ప్రస్తుతం ఆ ఆఫీసర్లు మారడం, భూమి విలువ పెరగడంతో తప్పుడు డాక్యుమెంట్స్ తో కబ్జాదారులు మరోసారి ఆ ల్యాండ్ను ఆక్రమించుకునేందుకు రెండు రోజుల కింద ప్రయత్నించారు. వారిని స్థానికులు అడ్డుకుని ఆఫీసర్ల దృష్టికి తీసుకెళ్లారు.
ఇదీ పరిస్థితి..
కొత్తగూడెం పట్టణంలోని 2వ వార్డులో 400గజాల గవర్నమెంట్ ల్యాండ్ ఉంది. దానిని ఆక్రమించుకునేందుకు కొందరు కొంత కాలంగా ప్రయత్నిస్తున్నారు. 2017లో కొందరు కబ్జా చేసేందుకు చూడగా అప్పటి ఎమ్మెల్యే జలగం వెంకట్రావ్ అడ్డుకున్నారు. ఆ స్థలంలో అంగన్వాడీతో పాటు అర్బన్ హెల్త్ సెంటర్ ఏర్పాటుకు ప్లాన్ చేశారు. దీంతో అక్రమార్కులు వెనుకడుగు వేశారు. రెండేండ్ల కిందట మరోసారి అధికారం అడ్డుపెట్టుకొని కొందరు ఆ ల్యాండ్ను ఆక్రమించుకునేందుకు స్కెచ్ వేశారు. కానీ మున్సిపల్ వైస్ చైర్మన్ దామోదర్ కలెక్టర్, మున్సిపల్కమిషనర్తో మాట్లాడి అక్కడ గవర్నమెంట్ల్యాండ్ అని స్పష్టంగా తెలిసేలా, కబ్జాదారులకు హెచ్చరికలు జారీ చేస్తూ బోర్డు పెట్టించారు.
ఇదే టైంలో ఆ ల్యాండ్ చుట్టూ మున్సిపాలిటీ ఆధ్వర్యంలో ఫెన్సింగ్ వేశారు. కానీ కొన్ని రోజులకే అక్కడ పెట్టిన బోర్డును గుర్తుతెలియని వ్యక్తులు తీసేశారు. ఇటీవల ల్యాండ్ రేట్లు పెరుగుతుండడంతో అక్రమార్కుల కన్ను ఆ ల్యాండ్పై మరోసారి పడింది. దాదాపు రూ. కోటికి పైగా ల్యాండ్ విలువ ఉండడంతో అక్రమార్కులు తప్పుడు డాక్యుమెంట్లు సృష్టించి కబ్జాకు ప్లాన్ చేశారు. కొంతమంది రాజకీయ నేతల అండదండలతో ఆక్రమించుకునేందుకు రెండు రోజుల కింద ఆ ల్యాండ్ను శుభ్రం చేసేందుకు అక్కడికి రాగా స్థానికులు అడ్డుకున్నారు. ఇరువర్గాల మధ్య వాగ్వాదం జరిగింది. ఈ క్రమంలో విలువైన ప్రభుత్వ భూమి పరిరక్షణపై కలెక్టర్ దృష్టి సారించాలని స్థానికులు కోరుతున్నారు.
ల్యాండ్ కబ్జా కాకుండా చూడాలి
కొత్తగూడెం పట్టణంలో ఇప్పటికే చాలా స్థలాలు కబ్జాకు గురవుతున్నాయి. 2వ వార్డులో రూ.కోటికి పైగా విలువైన గవర్నమెంట్ ల్యాండ్ ను కాపాడేందుకు మున్సిపల్, రెవెన్యూ ఆఫీసర్లు చర్యలు చేపట్టాలి. ఈ ల్యాండ్లో కమ్యూనిటీ హాల్ కడితే స్థానికులకు ఉపయోగంగా ఉంటుంది. – జి.కిషోర్, బస్తీ వాసి, కొత్తగూడెం
చర్యలు తీసుకుంటాం
గవర్నమెంట్ ల్యాండ్ను ఆక్రమించుకునేందుకు కొందరు యత్నించిన విషయం మాకు ఆలస్యంగా తెలిసింది. స్థానికులు ఇచ్చిన సమాచారంతో అక్కడికి వెళ్లి పరిశీలించాం. గతంలో మున్సిపల్ ఆఫీసర్లు పెట్టిన బోర్డును ఎవరో మాయం చేశారు. మరోసారి ఇక్కడ బోర్డు పెట్టి, భూమి కబ్జాకు గురికాకుండా చర్యలు చేపడుతాం. ప్రభుత్వ స్థలాలను ఆక్రమించుకునే వారిపై కఠిన చర్యలు తీసుకుంటాం. – శేషాంజన్ స్వామి, మున్సిపల్ కమిషనర్, కొత్తగూడెం
