- ఫెయిలైన స్టూడెంట్లకు ఫేక్ సర్టిఫికేట్లు
- ఒక్కో సర్టిఫికేట్ కు రూ.50 వేల నుంచి లక్ష వసూలు
- ఉన్నత చదువుల కోసం విదేశాలకు వెళ్లిన ఆరుగురు స్టూడెంట్స్
- ధర్మసాగర్ మండలానికి చెందిన ఇద్దరు యువకుల అరెస్ట్
హనుమకొండ, ధర్మసాగర్, వెలుగు: డిగ్రీ, పీజీ పరీక్షల్లో ఫెయిల్ అయిన, మధ్యలో చదువు ఆపేసిన స్టూడెంట్లకు ఫేక్ సర్టిఫికేట్లు అమ్ముతున్న ఇద్దరు యువకులను వరంగల్ టాస్క్ ఫోర్స్ పోలీసులు అరెస్ట్ చేశారు. వారి దగ్గర రెండు స్మార్ట్ ఫోన్లు, ఫేక్ సర్టిఫికేట్ల జిరాక్స్కాపీలు స్వాధీనం చేసుకున్నారు. ధర్మసాగర్ మండలం మల్లక్ పల్లి కి చెందిన నరిశెట్టి పున్నంచందర్, నారాయణగిరికి చెందిన బుద్దె దిలీప్ దగ్గరి బంధువులు. వీరిలో పున్నంచందర్కు ఇదివరకే ఫేక్ సర్టిఫికేట్ల గ్యాంగ్ తో సంబంధం ఉంది. అతని మీద కేపీహెచ్బీ పీఎస్లో కేసు ఉంది. ఇటీవల పున్నంచందర్ఢిల్లీలోని నోయిడాకు చెందిన సన్ షైన్ ఎడ్యుకేషన్ కన్సల్టెన్సీ నిర్వాహకుడు అమాన్ షేక్ ను కలిసి ఫేక్ సర్టిఫికేట్ల దందా మొదలుపెట్టాడు.
ధర్మసాగర్ మండలంలో ఫెయిల్ అయిన, చదువు మానేసిన వారి వివరాలను దిలీప్ సేకరించేవాడు. ఒక్కో సర్టిఫికేట్ రూ.50 వేలు నుంచి రూ.లక్ష వరకు వసూలు చేసేవారు. అమాన్ షేక్ వివిధ యూనివర్సిటీల పేరున తయారు చేయించిన ఫేక్ సర్టిఫికేట్లను పున్నం చందర్ డబ్బులు ఇచ్చిన వారికి ఇచ్చేవారు. ధర్మసాగర్ మండలంలో ఏడుగురి నుంచి పున్నం చందర్, దిలీప్ డబ్బులు వసూలు చేశారు. వారిలో నకిలీ సర్టిఫికేట్లు తీసుకున్న ఆరుగురు దేశం దాటి వెళ్లిపోయారు. ఉన్నత చదువులకోసం నలుగురు యూకే, ఒకరు ఆస్ట్రేలియా, ఒకరు అమెరికా వెళ్లినట్లు పోలీసులు గుర్తించారు. వీరిద్దరిని వరంగల్ టాస్క్ ఫోర్స్ పోలీసులు సోమవారం అదుపులోకి తీసుకుని ధర్మసాగర్ పోలీసులకు అప్పగించారు. కాగా ఢిల్లీకి చెందిన అమాన్ షేక్ పరారీలో ఉన్నట్లు పోలీసులు తెలిపారు.
