జైపూర్: రాజస్థాన్లో ఆసక్తికర ఘటన జరిగింది. తన భూమికి పరిహారం కోరుతూ సజీవ దహనానికి యత్నించిన ఓ రైతుకు ఆ రాష్ట్ర పోలీసులు షాకిచ్చారు. ఆయనకు ఏకంగా రూ.9.91 లక్షల జరిమానా విధించారు. ఈమేరకు ఆదివారం నోటీసులు అందజేశారు. వారంలోగా స్పందించకుంటే చట్టపరమైన చర్యలు తీసుకుంటామని వార్నింగ్ ఇచ్చారు. తమ భూమిని తీసుకుంటున్న శ్రీ సిమెంట్కంపెనీ నుంచి పరిహారం కోరుతూ ఝన్ఝును జిల్లాకు చెందిన రైతు విద్యాధర్యాదవ్తన కుటుంబ సభ్యులతో ఈ నెల 10 న ఆందోళనకు దిగాడు.
నడిరోడ్డుపై చితి పేర్చుకొని, సజీవ దహనానికి యత్నించాడు. విషయం తెలుసుకున్న పోలీసులు, అక్కడికి చేరుకొని అడ్డుకున్నారు. అయితే, విద్యాధర్సజీవ దహనాన్ని అడ్డుకునేందుకు ఏఎస్పీ, ఇద్దరు డీఎస్పీలు సహా 99 మంది పోలీసులతోపాటు పలు వాహనాలు మోహరించాల్సి వచ్చిందని రాజస్థాన్ప్రభుత్వం పేర్కొంది.
దీంతో రాష్ట్ర ఖజానాపై 9.91 లక్షల భారం పడిందని తెలిపింది. ఈ మొత్తాన్ని ఎస్పీ కార్యాలయం అకౌంట్స్ బ్రాంచ్లో జమ చేయాలంటూ రైతు విద్యాధర్ యాదవ్కు నోటీసులు జారీచేసింది. చెల్లించకుంటే చర్యలు తీసుకుంటామని హెచ్చరించింది. కాగా, రైతు ఆందోళన తర్వాత సదరు కంపెనీ 3 కోట్ల పరిహారం ఇచ్చేందుకు ఒప్పుకున్నా.. పోలీసుల నోటీసుతో రైతు కుటుంబం ఖంగుతిన్నది.
