చౌటుప్పల్, వెలుగు : ట్రిపుల్ ఆర్ భూసేకరణలో భాగంగా చేపట్టిన స్ట్రక్చర్వ్యాల్యూయేషన్ను రైతు అడ్డుకున్నారు. ఈ ఘటన యాదాద్రి జిల్లా చౌటుప్పల్ మండలం తంగెడపల్లిలో సోమవారం జరిగింది. ట్రిపుల్ ఆర్ కోసం చౌటుప్పల్ పరిధిలోని చౌటుప్పల్, వలిగొండ మండలాల్లో దాదాపు 780 ఎకరాలను సేకరిస్తున్నారు. ఇందులో భాగంగా ఇప్పటికే త్రీజీ నోటిఫికేషన్లు జారీ కావడంతో పాటు అక్టోబర్లో ల్యాండ్ రిజిస్ట్రేషన్ వ్యాల్యూ కూడా పెంచారు.
అక్టోబర్ 21 నుంచి నాలుగు రోజులు నిర్వహించిన అవార్డు మీటింగ్కు రైతులు గైర్హాజరైన సంగతి తెలిసిందే. కాగా పొలాల వద్ద ఉన్న కట్టడాలు, చెట్లు వంటివి లెక్కించి వాటి స్ట్రక్చర్ వ్యాల్యూయేషన్ చేయడానికి తంగెడపల్లిలో రైతు ఎల్లయ్య భూమి వద్దకు ఆర్అండ్బీ, రెవెన్యూ స్టాఫ్ వచ్చారు. భద్రత కోసం తమ వెంట పోలీసులను కూడా తీసుకొచ్చారు. దీంతో ఓ రైతు వారిని అడ్డుకొని ఎందుకొచ్చారని నిలదీశారు.
తాము వచ్చిన విషయాన్ని స్టాఫ్ వివరించడంతో, ఇచ్చిన హామీ ప్రకారం హయ్యర్ ఆఫీసర్లతో మాట్లాడించిన తర్వాతే లెక్కించాలని లేని పక్షంలో అవసరం లేదని తేల్చి చెప్పారు. స్టాఫ్ నచ్చజెప్పినా సదరు రైతు వినలేదు. దీంతో వారు తిరిగి వెళ్లిపోయారు. ఈ విషయంపై చౌటుప్పల్ ఆర్డీవో శేఖర్ రెడ్డి వివరణ కోరగా డివిజన్ పరిధిలో భూముల స్ట్రక్చర్ వాల్యుయేషన్ ఇప్పటికే పూర్తి చేశామని చెప్పారు. పెండింగ్లో ఉన్న ముగ్గురు రైతుల పొలాల్లోని కట్టడాలకు సంబంధించి స్టక్చర్ వ్యాల్యూయేషన్ చేయడానికి ఆఫీసర్లు వెళ్లారని తెలిపారు.
