ఖమ్మం, వెలుగు : ఖమ్మం వ్యవసాయ మార్కెట్ లో కమీషన్దారుల, ట్రేడర్ల చేతుల్లో రైతులు తీవ్రంగా నష్టపోతున్నారు. అమాయక రైతులను, గిరిజనులను టార్గెట్ చేసుకొని వ్యాపారులు మోసాలకు పాల్పడుతున్నారు. పంటను అమ్మినందుకు రూల్స్ ప్రకారం 2 శాతం కమీషన్ తీసుకోవాల్సిన కమీషన్దారులు 6శాతం వరకూ వసూల్ చేస్తున్నారు. తూకం అయిన తర్వాత రైతులకు ఇవ్వాల్సిన తక్ పట్టీ కూడా ఇవ్వడం లేదు. కేవలం తెల్ల కాగితాల మీదే లెక్కలు రాసి రైతుల చేతుల్లో పెడుతున్నారు. ధాన్యం కొనుగోలు తర్వాత మార్కెట్ ఆఫీసులో సబ్మిట్ చేయాల్సిన తక్ పట్టీ డూప్లికేట్ కాపీలో 2 శాతం చొప్పన కమీషన్ తీసుకున్నట్టుగా లెక్క మారుస్తున్నారు. అయితే వ్యవసాయ మార్కెట్లో క్షేత్ర స్థాయిలో పనిచేస్తున్న అధికారులకు తెలిసే ఈ దందా నడుస్తోందనే ఆరోపణలున్నాయి.
రైతులకు తీవ్ర నష్టం..
కొంతమంది రైతులు పంట పెట్టుబడి కోసం కమీషన్దారుల నుంచి అప్పు తీసుకుంటారు. పంట అమ్మే టైంలో కమీషన్దారులు బాకీని వసూలు చేసుకుంటారు. దానికి వడ్డీ తీసుకుంటూనే, మరోవైపు ఎక్కువ మొత్తం కమీషన్ వసూలు చేస్తుండడంతో రైతులు తెలియకుండానే నష్టపోతున్నారు. మార్కెట్లో కటింగ్ బిల్లు వ్యాపారం పేరుతో కొంత మంది చేస్తున్న దందానే దీనికంతటికీ కారణమని తెలుస్తోంది. పంట అమ్ముకుని వెళ్లే సమయంలో రైతులకు మొత్తం డబ్బులను కమీషన్దారులు చెల్లించాలి. అయితే ఛాంబర్ ఆఫ్ కామర్స్ బైలా ప్రకారం పంటను కొన్న ట్రేడర్ ఆ పంట కమీషన్దారుడికి 13 రోజులుల్లోపు డబ్బులు చెల్లించాలి. కానీ ట్రేడర్లు డబ్బులు చెల్లించడంలో ఆలస్యం చేస్తూ కటింగ్ బిల్ వ్యాపారుల సంస్కృతిని తీసుకువచ్చారు. పంటను అమ్మిచ్చిన రోజే కమీషన్దారుడికి డబ్బులు రావాలంటే ఒకటిన్నర శాతం చొప్పున కట్ చేసుకొని ఇస్తున్నారు. దీంతో కమీషన్ దారులు తమకు నష్టంరాకుండా ఆ మొత్తాన్ని రైతుల పైనే భారం మోపుతూ.. అర శాతం నుంచి ఒకటిన్నర శాతం వరకు కలుపుతూ రైతుల నుంచి కటింగ్ బిల్లు వసూలు చేస్తున్నారు.
తెల్లకాగితాల పైనే రూ.కోట్ల వ్యాపారం ..
మార్కెట్లో తెల్ల కాగితాల మీదే రోజూ రూ.కోట్ల వ్యాపారం నడుస్తోంది. అధికారికంగా సరైన బిల్లులు రైతులకు అందడం లేదు. రైతుల నుంచి 6 శాతం కమీషన్ వసూలు చేసే వ్యాపారులు 20 మందికి పైగా ఉన్నారు. లైసెన్స్ ఉన్న కమీషన్దారులు 410 మంది దాకా ఉండగా.. అనధికారికంగా మరో 200 మంది వరకు కమీషన్ వ్యాపారం చేస్తున్నారు. వీరిలో చాలామంది పంటను రికార్డు ప్రకారం కటింగ్ బిల్లు వ్యాపారుల పేర్లపై నమోదు చేయిస్తున్నారు. ఈ సమయంలో రోజూ జరిగే లావాదేవీలను కేవలం తెల్లకాగితాలు, ఆఫీసుల్లోని బుక్కుల్లో మాత్రమే నామమాత్రంగా నమోదు చేస్తూ, రూ.కోట్లలో అనధికారిక క్యాష్ ట్రాన్సాక్షన్ నడిపిస్తున్నారు. ఇలా మార్కెట్లో జీరో వ్యాపారానికి తెరలేస్తోంది. పత్తి మార్కెట్లో 10 శాతం వరకు జీరో దందా నడుస్తుండగా, మిర్చి మార్కెట్లో మాత్రం 50 శాతం వరకు ఈ రకంగా జీరో సరుకు మార్కెట్ నుంచి బయటకు వెళ్తోందన్న ఆరోపణలున్నాయి.
