- మద్దతు తెలిపిన మాజీ ఎమ్మెల్యే సురేందర్
- పొలం వేలం వేస్తామంటూ ఫ్లెక్సీల ఏర్పాటుపై ఆగ్రహం
లింగంపేట, వెలుగు: నిజామాబాద్ జిల్లా కోఆపరేటివ్ సెంట్రల్ బ్యాంక్(ఎన్డీసీసీబీ) అధికారుల తీరుకు నిరసనగా శుక్రవారం మండలంలోని పోల్కంపేట గ్రామానికి చెందిన రైతులు లింగంపేటలోని ఎన్డీసీసీ బ్యాంక్ఎదుట ధర్నా చేశారు. ఎల్లారెడ్డి మాజీ ఎమ్మెల్యే జాజాల సురేందర్ రైతులకు మద్దతుగా ధర్నాలో పాల్గొన్నారు.
మండలంలోని పోల్కంపేట గ్రామా నికి చెందిన రాజశేఖర్రెడ్డి అనే రైతు బ్యాంక్లో రుణం తీసుకుని సకాలంలో డబ్బు చెల్లించక పోవడంతో బ్యాంక్ అధికారులు వ్యవసాయ భూమిని వేలం వేస్తామని పొలంలో ఫ్లెక్సీ ఏర్పాటు చేసి ఎర్రజెండాలు పాతారు. దీంతో ఆగ్రహించిన పోల్కంపేట గ్రామ రైతులు, మండల బీఆర్ఎస్ నాయకులు బ్యాంక్ వద్దకు చేరుకుని ధర్నా చేశారు. బ్యాంక్ అధికారుల తీరును తీవ్రంగా నిరసించారు.
రైతులు అప్పు ఉంటే భూములను వేలం వేస్తారా?
మాజీ ఎమ్మెల్యే సురేందర్ మాట్లాడుతూ... రైతులకు అప్పు ఉన్నంత మాత్రాన భూములను వేలం వేస్తామంటూ ప్లెక్సీలు పెడతారా? రేపటి లోగా ఫ్లెక్సీలను తొలగించకపోతే ఆందోళన ఉదృతం చేస్తామన్నారు. సహకార సంఘాల్లో రైతులు తీసుకున్న దీర్ఘకాలిక రుణాలను రాష్ట్ర ప్రభుత్వం వెంటనే మాఫీ చేయాలనీ ఆయన డిమాండ్ చేశారు. కాంగ్రెస్ ప్రభుత్వం అధికారంలోకి రాగానే రైతులపై వేధింపులు మొదలయ్యాయని, రైతులకు రుణమాఫీ చేయడంలో సీఎం రేవంత్రెడ్డి పూర్తిగా విఫలమయ్యారని ఆరోపించారు.
లింగంపేట ఎన్డీసీసీ బ్యాంక్లో 700 మంది రైతులు రుణాలు తీసుకుని వాయిదాల ప్రకారం చెల్లిస్తు న్నారని, కొందరు రైతులు అప్పు చెల్లించలేక పోతే బ్యాంక్ అధికారులు వేధింపులకు గురిచేయడం సరికాదని అన్నారు. అప్పు చెల్లించకపోతే వ్యవసాయ పొలంలో ఎర్రజెండాలు ఏర్పాటు చేస్తారా? రైతులు ఏమైనా దొంగలా? స్మగ్లర్లా? అంటూ బ్యాంక్ మేనేజర్ కుమార స్వామిపై మాజీ ఎమ్మెల్యే తీవ్ర ఆగ్రహం వ్యక్తం చేశారు. సాయంత్రంలోగా ఫ్లెక్సీలను, జెండాలను తొలగించకపోతే ఆందోళన ఉదృతం చేస్తామన్నారు. రైతు పొలం వేలం వేయాలనీ ప్రభుత్వం ఏమైనా ఉత్తర్వులు జారీ చేసిందా? జీఓ కాఫీ ఉంటే చూపించాలని డిమాండ్ చేశారు.
జిల్లా ఉన్నతాధికారుల సమక్షంలో ఫ్లెక్సినీ ఏర్పాటు చేశామని మేనేజర్ వివరించారు. రుణాలు తీసుకున్న రైతులు బ్యాంక్ ఆఫీసర్ల వేధింపులకు భయపడొద్దని బీఆర్ఎస్ పార్టీ అండగా ఉంటుందన్నారు. ధర్నాలో బాధిత రైతు రాజశేఖర్రెడ్డి, సంజీవరెడ్డి, బీఆర్ఎస్ లీడర్లు దివిటి రమేశ్, ముదాం సాయిలు, గన్నూ నాయక్, రమేశ్, మనోహర్, బండి నర్సింలు, మహిపాల్రెడ్డి, మేకల రాములు, ప్రతాప్రెడ్డి, సాయిరాం, పీర్యానాయక్ పాల్గొన్నారు.
