- కంపెనీ సూపర్ వైజర్ల నిలదీత
- రైతులపై పోలీసులకు ఫిర్యాదు
- మెదక్ జిల్లా శివ్వంపేటలో ఘటన
శివ్వంపేట, వెలుగు: మెదక్ జిల్లా శివ్వంపేట మండల కేంద్రానికి చెందిన ఆరుగురు రైతులు నాసిరకం విత్తనాలు వేసి నష్టపోయారు. యాసంగి సీజన్లో క్యాప్సిన్ భావన వరి సీడ్స్ కొని 20 ఎకరాల్లో సాగు చేశారు. విత్తన కంపెనీ ప్రతినిధులు110 రోజులలో పంట వస్తుందని చెప్పారని, అయితే 120 రోజులవుతున్నా పంట దిగుబడి రావడం లేదని, ఎకరాకు 50 బస్తాలు వచ్చేది 5 బస్తాలు కూడా వచ్చేటట్టు లేదని ఆవేదన వ్యక్తం చేశారు. తమకు నకిలీ విత్తనాలు అంటగట్టడం వల్లే నష్టపోయామని మంగళవారం ఆందోళనకు దిగారు. భావన వరి సీడ్స్ కంపెనీ సూపర్వైజర్లు ఫీల్డ్ ను పరిశీలించడానికి రాగా వారిని చుట్టుముట్టి గొడవకు దిగారు.
తమకు నష్టపరిహారం ఇచ్చేంతవరకు ఇక్కడి నుంచి కదిలేది లేదని భీష్మించారు. ఎకరాకు రూ.35 వేల వరకు పెట్టుబడి పెట్టి నష్టపోయామని ఆవేదన వ్యక్తం చేశారు. సదరు సీడ్స్ కంపెనీ వారు చెప్పిన మందులు ఐదు నుంచి ఆరు సార్లు పిచికారీ చేసినా వరిగొల వేయలేదని, కంపెనీ వారికి ఫోన్ చేసినా పట్టించుకోవడం లేదని మండిపడ్డారు. ఈ విషయమై కంపెనీకి నివేదిక పంపిస్తామని చెప్పిన సూపర్ వైజర్లు అక్కడి నుంచి వెళ్లిపోయారు. ఇదిలా ఉండగా పంటలు పరిశీలించేందుకు వెళ్తే రైతులు దాడి చేశారని సీడ్స్ కంపెనీ సూపర్వైజర్లు నాగరాజు, నాందేవ్ పోలీసులకు ఫిర్యాదు చేశారు. కేసు నమోదు చేసి దర్యాప్తు చేస్తున్నామని ఎస్ఐ మహిపాల్ రెడ్డి తెలిపారు.
