- 2018 నుంచి అరిగోసపడ్తున్న రైతులు
- మంత్రి చొరవతో ‘అడవి’ స్థానంలో రైతుల పేర్ల నమోదుకు చర్యలు
- సీఎం, మంత్రుల చిత్రపటానికి క్షీరాభిషేకం
మహబూబాబాద్, వెలుగు : భూ రికార్డుల ప్రక్షాళన సమయంలో అధికారులు చేసిన తప్పిదానికి ఆ రైతులు ఆరేండ్లుగా అరిగోసపడ్తున్నారు. గ్రామంలోని వ్యవసాయ భూములన్నింటినీ ధరణి పోర్టల్లో ఫారెస్ట్ ల్యాండ్ గా నమోదు చేయడంతో పాస్బుక్లు రాక, రైతుబంధు, రైతుబీమా అమలుకాక ఇన్నాళ్లూ ఆఫీసర్ల చుట్టూ కాళ్లరిగేలా తిరిగారు. ర్యాలీలు, రాస్తారోకోలు, దీక్షలు చేసినా ఎవరూ పట్టించుకోలేదు.
ఎట్టకేలకు కాంగ్రెస్ అధికారంలోకి రావడంతో- రైతులంతా రెవెన్యూ శాఖ మంత్రి పొంగులేటిని కలిసి మొరపెట్టుకున్నారు. ఆయన ఆదేశాల మేరకు ఆఫీసర్లు ధరణి పోర్టల్లో నారాయణపూర్ వ్యవసాయ భూముల్లో పట్టాదారుల పేర్లకు బదులు పడిన ‘అడవి’ అనే పదాన్ని తొలగింపజేశారు. భూభారతి అమల్లోకి రాగానే అడవి స్థానంలో రైతుల పేర్ల నమోదు చేయనుండగా, సర్వత్రా హర్షం వ్యక్తమవుతోంది.
1,398 ఎకరాలు క్లియర్..
2018లో భూరికార్డుల ప్రక్షాళన సందర్భంగా మహబూబాబాద్ జిల్లా కేసముద్రం మండలం నారాయణపురం గ్రామంలోని 1,827 ఎకరాలను ధరణి పోర్టల్లో ఫారెస్ట్ భూమిగా ఎక్కించారు. గ్రామానికి చెందిన 1,200 మంది రైతుల పేర్ల స్థానంలో ‘అడవి’ అని నమోదు చేశారు. దీంతో రైతులకు పట్టా పాస్బుక్లు రాలేదు. పంట రుణాలు, రైతుబంధు, రైతుబీమా రాక, పండిన పంటలను అమ్ముకోలేక అరిగోసపడ్డారు. తమ భూములను తమకు ఇప్పించాలంటూ ఆరేండ్ల పాటు పోరాడారు. కలెక్టరేట్, సెక్రటేరియెట్, సీసీఎల్ఏ ఆఫీసులను ముట్టడించారు.
రిలే దీక్షలు, ర్యాలీలు, రాస్తారోకోల రూపంలో ఆందోళనలు చేపట్టారు. గ్రామంలోని వాటర్ ట్యాంక్ పైకి ఎక్కి, పెట్రోల్ బాటిల్స్తో మూకుమ్మడి ఆత్మహత్యాయత్నం చేశారు. సమస్య పరిష్కారానికి అప్పటి రెవెన్యూ ఆఫీసర్లు, ప్రజాప్రతినిధులు హామీ ఇచ్చినా సమస్య కారణంగా పరిష్కరించలేదు. కాంగ్రెస్ అధికారంలోకి రాగానే రైతులంతా రెవెన్యూ శాఖ మంత్రి పొంగులేటి శ్రీనివాస్ రెడ్డిని కలిసి తమ గోడు వెల్లబోసుకున్నారు. మంత్రి ఆదేశాలతో 11 సెప్టెంబర్ 2024న రాష్ట్ర ప్రిన్సిపల్ సెక్రటరీ నవీన్ మిత్తల్ జీవో నెంబర్ 94 జారీ చేశారు.
దీంతో టెక్నికల్ సమస్య మూలంగా తలెత్తిన సమస్యను పరిష్కరించారు. గ్రామంలోని సర్వే నెంబర్లు 149, 150, 154, 165, 166, 168 లలోని సుమారు 1,398 ఎకరాలను ఫారెస్ట్ ల్యాండ్ నుంచి తొలగించారు. ధరణి పోర్టల్ లో ఈ నెల30న రైతు పేరు, భూవిస్తీర్ణం వద్ద అడవి పదాలు తొలగిపోవడంతో రైతుల ఆనందానికి అవధుల్లేకుండా పోయాయి. ప్రస్తుతం ప్రతి రైతు వివరాల వద్ద ఖాళీ స్పేస్ ఇచ్చారు.
భూభారతి అమల్లోకి రాగానే రైతుల వివరాలు ఎంటర్ చేసి, పట్టా పాస్ బుక్కులు ఇవ్వనున్నట్లు అధికారులు ప్రకటించడంతో రైతులు సీఎం రేవంత్రెడ్డి, మంత్రి పొంగులేటి శ్రీనివాస్ రెడ్డి, ఎమ్మెల్యే భూక్య మురళీ నాయక్, ఎంపీ పోరిక బలరాంనాయక్ ల ఫ్లెక్సీలకు క్షీరాభిషేకం నిర్వహించారు.
