మంచిర్యాల, వెలుగు: నేషనల్హైవే 63 కోసం తమ జీవనాధారమైన సాగు భూములను లాక్కోవద్దని డిమాండ్ చేస్తూ బాధిత రైతులు ఆందోళనకు దిగారు. లక్సెట్టిపేట, హాజీపూర్ మండలాలకు చెందిన సుమారు 200 మంది రైతులు మంగళవారం మంచిర్యాల ఆర్డీఓ ఆఫీస్కు తరలివచ్చారు. భూముల విషయమై చర్చించేందుకు ఆర్డీఓ రాములును కోరగా ఆయన ఆఫీస్ నుంచి బయటకు రాకపోవడంతో అక్కడే కాసేపు నిరసన తెలిపారు.
అనంతరం ఐబీ చౌరస్తాకు చేరుకొని రాస్తారోకో చేశారు. గతంలో ఎల్లంపల్లి ప్రాజెక్టు నిర్మాణంలో విలువైన సాగు భూములను కోల్పోయామని, ఇప్పుడు ఎన్హెచ్63 గ్రీన్ హైవే పేరిట మిగిలిన కొద్దిపాటి భూములను లాక్కొని తమ కుటుంబాలను రోడ్డుపాలు చేయొద్దని వేడుకున్నారు. ప్రస్తుతమున్న హైవేనే ఫోర్ లేన్గా మార్చితే ఎలాంటి ఇబ్బందులు ఉండవని.. రెవెన్యూ, ఎన్హెచ్ఏఐ అధికారులు ఈ దిశగా చర్యలు తీసుకోవాలని కోరారు.
