నెల్లికుదురు,(కేసముద్రం) వెలుగు: పోడు భూములకు పట్టాలు ఇస్తున్న ప్రభుత్వం తమ పట్టా భూములకు పాసు బుక్కులు ఎందుకివ్వడం లేదని గురువారం మహబూబాబాద్ జిల్లా కేసముద్రం మండలం నారాయణపురం రైతులు రిలే నిరాహర దీక్ష చేపట్టారు.
ఈ సందర్భంగా ఎంపీటీసీ ధరావత్ రవి నాయక్ మాట్లాడుతూ.. ధరణి వచ్చిన తర్వాత తమ గ్రామ పట్టా భూములను రెవెన్యూ ఆఫీసర్ల తప్పిదంతో ఫారెస్ట్ భూములుగా మార్చారని ఆరోపించారు. గ్రామంలో సాగు భూమి1,827 ఎకరాలు, గ్రామం మొత్తం ఫారెస్ట్ ఏరియాలోనే ఉందని పాస్ బుక్కులు నిలిపి వేశారన్నారు.
అనేక పోరాటాలు చేస్తే కలెక్టర్ రిపోర్ట్ ఆధారంగా 2022 ఆగస్టులో 500 మందికి చెందిన 700 ఎకరాలు ధరణిలో నమోదు చేశారని, 500 మందికి చెందిన 1,127 ఎకరాల భూమి వివరాలు పొందుపర్చలేదని వాపోయారు. ఇప్పటికైనా తమ భూములను ధరణిలో చేర్చి పాసు బుక్కులు ఇవ్వాలని కోరారు.
