నర్సాపూర్, వెలుగు : మెదక్ జిల్లా నర్సాపూర్ మండలం రెడ్డిపల్లి గ్రామ రైతులు ట్రిపుల్ఆర్ సర్వే ను గురువారం అడ్డుకున్నారు. ఈ సందర్భంగా వారు మాట్లాడుతూ గత ప్రభుత్వంలో కొండపోచమ్మ సాగర్, విద్యుత్ లైన్, కాళేశ్వరం ప్రాజెక్టుల్లో భూములు కోల్పోయామని మళ్లీ ఇప్పుడు ట్రిపుల్ఆర్ పేరిట భూములు కోల్పోడానికి సిద్దంగా లేమన్నారు. తమకు భూమికి బదులు భూమి ఇచ్చి తగిన న్యాయం చేయాలని సర్వేకు వచ్చిన ఆర్డీవో జగదీశ్వర్ రెడ్డి, ఆఫీసర్లను వేడుకున్నారు.
రైతులు సర్వేకు సహకరించకపోవడంతో ఆఫీసర్లు వెనుతిరిగారు. ఈ విషయమై ఆర్డీవో జగదీశ్వర్ రెడ్డి మాట్లాడుతూ ట్రిపుల్ఆర్ భూ నిర్వాసితులు కలెక్టర్ ను కలిశారని సరైన నష్టపరిహారం కోసం కలెక్టర్ ఆధ్వర్యంలో కమిటీ కూడా వేశారన్నారు. త్వరలోనే సర్వే పనులు రైతుల సమక్షంలో చేపడతామని తెలిపారు.
