యాసంగి వడ్లన్నీ వ్యాపారులకే!

రేట్ ఎక్కువగా ఉండడంతో వ్యాపారులకు అమ్ముకున్న రైతులు
మహబూబ్నగర్, నారాయణపేట జిల్లాల్లో సెంటర్లకు వచ్చింది తక్కువే
ఒక్కొక్కటిగా మూతపడుతున్న కొనుగోలు కేంద్రాలు

మహబూబ్నగర్, వెలుగు : బయటి మార్కెట్లో డిమాండ్ ఎక్కువగా ఉండడంతో యాసంగి వడ్లన్నీ వ్యాపారులకే అమ్ముకున్నారు. ఏప్రిల్ మొదటి వారం నుంచే ప్రభుత్వం కొనుగోలు సెంటర్లను ఓపెన్ చేసినా.. ఇంత వరకు పూర్తి స్థాయిలో కొనుగోళ్లు జరగలేదు. 3 లక్షల మెట్రిక్ టన్నులకు గాను ఇప్పటి వరకు 40 వేల మెట్రిక్ టన్నుల వడ్లను మాత్రమే రైతుల నుంచి కొన్నారు. వడ్లు కూడా అయిపోవడంతో, సెంటర్లను ఒక్కొక్కటిగా మూసేస్తున్నారు.

రెండు జిల్లాలో 40 వేల మెట్రిక్ టన్నుల సేకరణ..

మహబూబ్నగర్ జిల్లాలో ఈ యాసంగిలో లక్ష ఎకరాల్లో రైతులు వరి సాగు చేశారు. దాదాపు 2.10 లక్షల మెట్రిల్ టన్నుల దిగుబడి వస్తుందని అగ్రికల్చర్ ఆఫీసర్లు అంచనా వేశారు. జిల్లా వ్యాప్తంగా 191 సెంటర్లను ఓపెన్ చేశారు. దొడ్డు రకానికి చెందిన వడ్లు తప్ప, సన్నాలు సెంటర్లకు రాలేదు. ఆఫీసర్లు ఇచ్చిన లెక్కల ప్రకారం ఇప్పటి వరకు జిల్లా వ్యాప్తంగా 94 సెంటర్లలో 2,471 మంది రైతుల నుంచి 14,301 మెట్రిక్ టన్నుల వడ్లను మాత్రమే కొనుగోలు చేశారు. మిగతా సెంటర్లకు వడ్లు రాలేదు. నారాయణపేట జిల్లాలో 1.15 లక్షల ఎకరాల్లో వరి సాగు చేయగా, 2.30 లక్షల మెట్రిక్ టన్నుల దిగుబడి వస్తుందని ఆఫీసర్లు అంచనా వేశారు.107 సెంటర్ల ద్వారా 3,966 మంది రైతుల నుంచి 24,659 మెట్రిక్ టన్నుల వడ్లు మాత్రమే సేకరించారు. ఐదేండ్ల తర్వాత మొదటి సారి యాసంగిలో అత్యల్పంగా వడ్ల సేకరణ జరిగినట్లు ఆఫీసర్లు చెబుతున్నారు.

సన్నాలే టార్గెట్..

గతంలో ఎన్నడూ లేనివిధంగా సన్నాలకు విపరీతమైన డిమాండ్ ఏర్పడింది. క్వింటాల్ బియ్యం రూ.5,500 నుంచి రూ.6,500 వరకు బ్రాండ్లను బట్టి రేట్లు పలుకుతున్నాయి. దీంతో యాసంగిలో రైతులు సన్నాల సాగుకు ప్రియారిటీ ఇచ్చారు. వర్షాభావ పరిస్థితుల వల్ల సాగునీటికి ఇబ్బంది ఎదురైనా సన్నాల సాగుకే మక్కువ చూపారు. దీంతో మహబూబ్నగర్, నారాయణపేట జిల్లాల్లో దాదాపు 2.15 లక్షల ఎకరాల్లో వరి సాగు కాగా, అందులో 1.40 లక్షల ఎకరాల్లో సన్నాలే ఉన్నాయి. మార్కెట్లో సన్నాలకు డిమాండ్ ఉండడంతో వ్యాపారులు, రైస్ మిల్లర్లు ముందస్తుగా రంగంలోకి దిగారు.

ప్రభుత్వ సెంటర్లు ఓపెన్ చేయడానికి ముందే రైతుల నుంచి వడ్లను కొన్నారు. నేరుగా కల్లాల వద్దకే చేరుకొని పచ్చి వడ్లకు కూడా క్వింటాల్కు రూ.2,400 నుంచి రూ2,500 వరకు చెల్లించారు. ఖర్చు లేకుండా నేరుగా కల్లాల వద్దే వడ్లను కొనడంతో వ్యాపారులు, రైస్ మిల్లర్లకు రైతులు పంటను అమ్మేశారు. రైతుల నుంచి పెద్ద మొత్తంలో సన్న వడ్లను కొంటున్న వ్యాపారులు, మిల్లర్లు పక్క రాష్ట్రాల్లో ఈ పంటను అమ్ముకొని లాభపడుతున్నారు. క్వింటాల్కు రూ.2,400 నుంచి రూ.2500 కొని, పక్కనే ఉన్న కర్నాటకలో క్వింటాల్ వడ్లను రూ.3,400 నుంచి రూ.3,500కు అమ్ముతున్నారు.

వడ్ల కొనుగోళ్లలో వనపర్తి టాప్..

వనపర్తి, వెలుగు: వడ్ల కొనుగోళ్లలో ఉమ్మడి పాలమూరు జిల్లాలో వనపర్తి జిల్లా మొదటి స్థానంలో నిలిచింది. ఈ యాసంగిలో లక్ష మెట్రిక్ టన్నుల వడ్లను కొనుగోలు చేయాలని నిర్ణయించగా, ఇప్పటి వరకు 71 వేల మెట్రిక్ టన్నుల వడ్లను కొనుగోలు చేశారు. జూరాల ప్రాజెక్ట్ కింద వరి పంట వేసిన టేలెండ్ మండలాలైన పాన్గల్, చిన్నంబావి, వీపనగండ్ల, పెబ్బేరుల్లో ఇంకా ధాన్యం కోతలు జరుగుతున్నాయి. దీంతో వంద శాతం టార్గెట్ కంప్లీట్ అవుతుందని సివిల్ సప్లై ఆఫీసర్లు చెబుతున్నారు.

ఈ సీజన్లో 89వేల ఎకరాలలో వరి సాగైంది. 2 లక్షల మెట్రిక్ టన్నుల దిగుబడి వస్తుందని సంబంధిత ఆఫీసర్లు అంచనా వేశారు. జిల్లాలోని 14 మండలాల్లో 230 కేంద్రాలు ఓపెన్ చేశారు. ఇప్పటి వరకు 71 వేల మెట్రిక్ టన్నులు వడ్లు కొనుగోలు చేసినట్లు సివిల్ సప్లై అసిస్టెంట్ మేనేజర్ బాలు నాయక్ తెలిపారు. రైతులకు రూ.110 కోట్ల చెల్లింపులు చేశామని, మరో వారం రోజుల పాటు వడ్లు రావచ్చని భావిస్తున్నట్లు చెప్పారు.