ఏడారి దేశం సౌదీ అరేబియాలో ఘోర రోడ్డు ప్రమాదం జరిగింది. ఈ ప్రమాదంలో 9 మంది భారతీయులు మృతి చెందారు. మరికొందరు తీవ్రంగా గాయపడ్డారు. ఈ విషయాన్ని సౌదీ అరేబియాలోని భారత కాన్సులేట్ ధృవీకరించింది. ఈ మేరకు భారత దౌత్య కార్యాలయం ఎక్స్ (ట్విట్టర్) వేదికగా వెల్లడించింది. ‘‘దురదృష్టవశాత్తూ పశ్చిమ సౌదీ అరేబియాలోని జిజాన్ సమీపంలో జరిగిన రోడ్డు ప్రమాదంలో తొమ్మిది మంది భారతీయులు మరణించారు.
మరి కొందరు గాయపడ్డారు. మృతుల కుటుంబాలకు ప్రగాఢ సానుభూతి తెలియజేస్తున్నాం. గాయపడిన వారు త్వరగా కోలుకోవాలని ఆశిస్తు్న్నాం’’ అని జెడ్డాలోని భారత ఎంబసీ ట్వీట్ చేసింది. మృతుల కుటుంబాలకు సమాచారం అందించి.. వారితో టచ్‌లో ఉన్నామని అధికారులు తెలిపారు. డెడ్ బాడీల తరలింపు గురించి మృతుల కుటుంబాలతో మాట్లాడుతున్నామని.. వారికి అన్ని విధాలుగా సహయం చేస్తామని తెలిపారు అధికారులు.
మృతుల కుటుంబాల కోసం ప్రత్యేక హెల్ప్ లైన్ ఏర్పాటు చేసినట్లు చెప్పారు. సౌదీలో భారతీయుల మృతిపై కేంద్ర విదేశాంగ మంత్రి ఎస్. జై శంకర్ ఎక్స్ (ట్విట్టర్) వేదికగా స్పందించారు. రోడ్డు ప్రమాదంలో భారతీయులు మృతి చెందడం బాధకరమన్నారు. మృతెల కుటుంబాలతో టచ్‌లో ఉన్న జెడ్డాలోని మా కాన్సుల్ జనరల్‌తో మాట్లాడానని తెలిపారు. ఈ విషాద పరిస్థితిలో మృతుల కుటుంబాలకు అన్ని విధాలుగా సహయ సహకారాలు అందిస్తామన్నారు.
