- రూ.23 లక్షలు, 34 తులాల బంగారం స్వాధీనం
- వివరాలు వెల్లడించిన డీసీపీ సీతారాం
జనగామ, వెలుగు: చోరీ కేసులో ఇద్దరు నిందితులను అరెస్ట్ చేసి రూ. 23.20 లక్షలు, 34 తులాల బంగారం, 71 తులాల వెండి స్వాధీనం చేసుకున్నట్లు జనగామ డీసీపీ సీతారాం తెలిపారు. ఆయన తెలిపిన వివరాల ప్రకారం.. మహబూబాబాద్ జిల్లా మునగలవీడుకు చెందిన దాసరి మురళి (26), అతని తండ్రి దాసరి నర్సయ్య(55) ఇద్దరు హైదరాబాద్ వనస్థలిపురంలో ఉంటూ రాత్రి వేళల్లో తాళం వేసి ఉన్న ఇళ్లల్లో చోరీలు చేసేవారు. జనగామ, బచ్చన్నపేట పోలీస్ స్టేషన్ పరిధిలో కూడా చోరీలకు పాల్పడ్డారు.
నల్లొండ, తొర్రూరు, భూవనగిరి రూరల్, హైదరాబాద్, భువనగిరి పోలీస్ స్టేషన్లలో కేసులు నమోదు కాగా జైలు జీవితం గడిపారు. అయినా వారి ప్రవర్తనలో మార్పు రాకపోవడంతో నిందుతుల పై పీడీ యాక్ట్ నమోదు చేశారు. ఏసీపీ దేవేందర్ రెడ్డి పర్యవేక్షణలో జనగామ, నర్మెట సీఐలు ఈ. శ్రీనివాస్, నాగబాబు దర్యాప్తు చేపట్టినట్లు డీసీపీ తెలిపారు.
మంగళవారం జనగామ మండలం యశ్వంతాపూర్ సమీపంలో వెహికిల్ చెకింగ్ చేస్తుండగా ఇద్దరు నిందితులు పట్టుబడ్డారన్నారు. నిందితులను రిమాండ్కు తరలించనున్నట్లు చెప్పారు. చోరీ కేసును ఛేధించేందుకు కృషి చేసిన ఎస్సైలు రఘుపతి, ఏఎస్ఐ శ్రీనివాస రాజు, కానిస్టేబుళ్లు మహేష్, రామన్న, కరుణకర్, తదితరులను డీసీపీ అభినందించారు.
