అమెరికా అధ్యక్షుడిగా ట్రంప్ బాధ్యతలు చేపట్టిన తర్వాత పశ్చిమాసియాలో మరో కీలక పరిణామం చోటుచేసుకుంది. ఇజ్రాయెల్‌కు ఏకంగా రూ.26వేల కోట్ల విలువైన ఆయుధాలను సరఫరా చేసేందుకు ట్రంప్ డీల్ కుదుర్చుకున్నారు. ఈ భారీ ఆయుధ ఒప్పందంలో భాగంగా ఇజ్రాయెల్‌కు సుమారు 40వేల శక్తివంతమైన భారీ బాంబులను అందజేయనున్నారు. ఇందులో ప్రతి బాంబు బరువు దాదాపు 900 కిలోలు ఉండటం గమనార్హం.

బైడెన్ ఆంక్షలు ఎత్తివేత.. 
2024లో జో బైడెన్ అమెరికా అధ్యక్షుడిగా ఉన్న సమయంలో.. గాజా వంటి జనసాంద్రత కలిగిన ప్రాంతాల్లో ఈ భారీ బాంబులను ఉపయోగిస్తే ప్రాణనష్టం భారీగా జరుగుతుందనే భయంతో ఈ 900 కేజీల బాంబుల రవాణాను నిలిపివేశారు. అయితే ట్రంప్ అమెరికా అధ్యక్షుడిగా పీఠం ఎక్కిన తర్వాత ఈ ఆంక్షలను పూర్తిగా ఎత్తివేశారు. బైడెన్ హయాంలో నిలిచిపోయిన ఆయుధాల సరఫరాను పునరుద్ధరిస్తూ.. ట్రంప్ సర్కార్ కొత్త భారీ ఆయుధ ఒప్పందానికి రూపకల్పన చేసింది. ఈ డీల్‌లో భాగంగా 20వేల Mk84 బాంబులు, మరో 20వేల BLU-117 రకం బాంబులను ఇజ్రాయెల్‌కు పంపనుంది అమెరికా.

భూగర్భ బంకర్లను ఛేదించే సత్తా..
ఈ 900 కేజీల బరువున్న బాంబులు అత్యంత విధ్వంసకరమైనవిగా నిపుణులు చెబుతున్నారు. ఇవి వివిధ మోడళ్లలో అందుబాటులో ఉంటాయి. ముఖ్యంగా హమాస్ వంటి ఉగ్రవాద సంస్థల రహస్య భూగర్భ టెన్నెల్స్, బంకర్లను లక్ష్యంగా చేసుకుని నాశనం చేయడానికి కొన్ని బాంబులను ప్రత్యేకంగా డిజైన్ చేశారు. మరికొన్ని భూమిపైనే పేలి భారీగా విధ్వంసాన్ని సృష్టిస్తాయి. గతంలో గాజాలో జరిగిన దాడులకు సంబంధించిన వీడియోలు, అక్కడ దొరికిన బాంబు అవశేషాలను పరిశీలిస్తే అమెరికాలో తయారైన బాంబులే ఎక్కువగా ఉపయోగించినట్లు తేలింది.

ట్రంప్ అధికారంలోకి వచ్చిన నాటి నుంచి ఇజ్రాయెల్‌కు భారీ స్థాయిలో సైనిక సాయం అందుతూనే ఉంది. గత ఏడాది ట్రంప్ యంత్రాగం సుమారు 3 బిలియన్ డాలర్ల విలువైన ఆయుధ విక్రయాలకు ఆమోదం తెలిపింది. ఇందులో 35,500 కంటే ఎక్కువ భారీ బాంబులు ఉన్నాయి. ఆ తర్వాత ఈ ఏడాది జనవరిలో మరో 6.67 బిలియన్ డాలర్ల ఆయుధ అమ్మకాలను కూడా ఆమోదించారు. తాజాగా మరో రూ.26 వేల కోట్ల డీల్‌తో కలుపుకుంటే ఇజ్రాయెల్ సైనిక బలగాలకు అమెరికా అందిస్తున్న సపోర్ట్ మరింత బలోపేతం కానుంది.

గాజాలో ఉద్రిక్తతలు..
అక్టోబర్ 7, 2023న హమాస్ జరిపిన మెరుపు దాడిలో దాదాపు 1,200 మంది ఇజ్రాయెల్ పౌరులు ప్రాణాలు కోల్పోగా, 251 మందిని బందీలుగా పట్టుకెళ్లారు. దీనికి ప్రతిచర్యగా ఇజ్రాయెల్ గాజాపై సమరానికి దిగింది. అమెరికా మధ్యవర్తిత్వంతో కాల్పుల విరమణ ఒప్పందాలు కుదిరినప్పటికీ.. అక్కడ హింస పూర్తిగా శాంతించలేదు. హమాస్ దాడులు, కాల్పుల విరమణ ఉల్లంఘనలకే తాము ప్రతిచర్యలు ఇస్తున్నట్లు ఇజ్రాయెల్ చెబుతోంది. ఇజ్రాయెల్ దాడుల్లో ఇప్పటి వరకూ దాదాపు 73వేల 264 మంది పాలస్తీనియన్లు మరణించినట్లు గాజా ఆరోగ్య మంత్రిత్వ శాఖ లెక్కలు బయటపెట్టాయి. చూడాలి అమెరికా ఇజ్రాయెల్ వెపన్స్ డీల్ ఇంకెంత విధ్వసాన్ని సృష్టిస్తుందో రానున్న రోజుల్లో. 

ఉద్యోగుల భవిష్య నిధి సంస్థ (EPFO) తన  ఖాతాదారులకోసం అధికారికంగా వాట్సాప్ సేవలను ,EPFO WhatsApp ఛానెల్ ప్రారంభించింది. దీని ద్వారా మీ ఖాతాలో పీఎఫ్ బ్యాలెన్స్ ను వెంటనే తెలుసుకోవచ్చు. మీ ఖాతాలో జమ అయిన చివరి 5 పీఎఫ్ కాంట్రిబ్యూషన్ (లావాదేవీల) వివరాలు పొందవచ్చు.  విత్‌డ్రాయల్ లేదా అడ్వాన్స్ కోసం పెట్టిన క్లెయిమ్ ఏ దశలో ఉందో ట్రాక్ చేయొచ్చు.  పీఎఫ్ ఖాతాకు సంబంధించిన సమస్యలపై వాట్సాప్ ద్వారానే ఫిర్యాదు చేయవచ్చు. లేటెస్ట్ సర్క్యులర్లు, సమాచారాన్ని ఈపీఎఫ్ వో వాట్సాప్ ఛానెల్ ద్వారా ఎప్పటికప్పుడు పొందవచ్చు.అయితే పీఎఫ్ బ్యాలెన్స్, మినీ స్టేట్‌మెంట్ , క్లెయిమ్ స్టేటస్ తదితర సేవలను అందించేందుకు AI చాట్‌బాట్ సేవలను త్వరలో పూర్తిస్థాయిలో రోల్‌అవుట్ చేయనున్నారు. 

అయితే ఇంకా ఈపీఎఫ్ వో వాట్సాప్ ఛానల్ సేవలు ప్రారంభం కాలేదు.. త్వరలో ప్రారంభం కానున్నాయి. 

ఇప్పటివరకు యూఏఎన్ (UAN) పోర్టల్, ఉమాంగ్ (UMANG) యాప్ , మిస్డ్ కాల్ లేదా ఎస్ఎంఎస్ (SMS) ద్వారా బ్యాలెన్స్ తెలుసుకునే విధానం అమలులో ఉంది. ఖాతాదారులకు సేవలను మరింత సులభతరం చేసేందుకు EPFO కొత్తగా ఈ వాట్సాప్, వ్యాట్సాప్ ఛానల్ ను తీసుకొచ్చింది. 

ALSO READ : ఫేస్‌‌బుక్ ప్రకటనకు మోసపోయిన రైల్వే ఉద్యోగి..

 EPFO వాట్సాప్ ఛానెల్ ద్వారా ఖాతాదారులకు డిజిటల్ సేవలను మరింత చేరువ చేస్తోంది. అయితే వాట్సాప్ ఛానెల్ కేవలం సమాచారం అందించే  వేదిక మాత్రమే.. దీని ద్వారా పీఎఫ్ బ్యాలెన్స్ చెక్ చేసుకోవచ్చు ఇటీవలి ట్రాన్సాక్షన్లు చూడటం, క్లెయిమ్‌లను ట్రాక్ చేయడం వంటి ఇంటరాక్టివ్ సేవలు వాట్సాప్ ద్వారా అందుబాటులోకి రానున్నాయి. 

• బీసీ జేఏసీ చైర్మన్​ జాజుల శ్రీనివాస్​గౌడ్​

బషీర్‌‌బాగ్‌‌, వెలుగు: దేశవ్యాప్తంగా చేపడుతున్న జనగణనలో బీసీల కులాల వారీగా లెక్కలు సేకరించాలని తెలంగాణ బీసీ జేఏసీ కేంద్ర ప్రభుత్వాన్ని డిమాండ్‌‌ చేసింది. గతంలో బీసీ కులగణన చేపడతామని హామీ ఇచ్చిన కేంద్ర ప్రభుత్వం ఇప్పుడు మాట తప్పిందని జేఏసీ నాయకులు విమర్శించారు. 

కేంద్ర ప్రభుత్వ వైఖరికి నిరసనగా రాష్ట్రవ్యాప్తంగా ప్రధాని మోదీ దిష్టిబొమ్మలను దహనం చేయాలని బీసీ జేఏసీ చైర్మన్‌‌ జాజుల శ్రీనివాస్‌‌గౌడ్‌‌ పిలుపునిచ్చారు. బీసీ కుల సంఘాల జేఏసీ చైర్మన్‌‌ కుందారం గణేశ్​చారి నేతృత్వంలో మంగళవారం బషీర్‌‌బాగ్‌‌ చౌరస్తాలో మోదీ దిష్టిబొమ్మను దహనం చేశారు. ఈ సందర్భంగా జాజుల మాట్లాడుతూ.. బీజేపీ బీసీల వ్యతిరేక పార్టీగా మారిందని ఆరోపించారు.

 దేశవ్యాప్తంగా బీసీ కులగణన చేపట్టాలని తెలంగాణ అసెంబ్లీ ఏకగ్రీవంగా తీర్మానం చేసిన సమయంలో బీజేపీ ఎమ్మెల్యేలు వాకౌట్‌‌ చేయడం ఇందుకు నిదర్శనమన్నారు. ఇప్పటికైనా కేంద్ర ప్రభుత్వం తన వైఖరిని మార్చుకుని, జనగణనలో బీసీల కులాల వారీగా లెక్కలు సేకరించే అంశాన్ని చేర్చాలని డిమాండ్‌‌ చేశారు. 

బీసీ జేఏసీ వర్కింగ్‌‌ చైర్మన్‌‌ గుజ్జ కృష్ణ, బీసీ సంక్షేమ సంఘం రాష్ట్ర కార్యనిర్వాహక అధ్యక్షుడు కుల్కచర్ల శ్రీనివాస్‌‌ ముదిరాజ్‌‌, బీసీ విద్యార్థి సంఘం జాతీయ అధ్యక్షుడు తాటికొండ విక్రమ్‌‌గౌడ్‌‌, బీసీ యువజన సంఘం జాతీయ అధ్యక్షుడు కనకాల శ్యామ్‌‌కుర్మ మాట్లాడుతూ.. గతంలో రూపొందించిన ప్రశ్నావళిని రద్దు చేసి, ఓబీసీ కాలమ్‌‌తో కొత్త ప్రశ్నావళిని రూపొందించాలని డిమాండ్‌‌ చేశారు. 

బీసీ కులగణన చేపట్టకుండా కేంద్ర ప్రభుత్వం ముందుకు వెళితే బీజేపీలోని బీసీ కేంద్ర మంత్రులు, ఎంపీలు తమ పదవులకు రాజీనామా చేయాలని డిమాండ్‌‌ చేశారు. లేనిపక్షంలో బీజేపీ నేతల ఇళ్లను ముట్టడించడంతో పాటు వారి పర్యటనలను అడ్డుకుంటామని హెచ్చరించారు.
 

పద్మారావునగర్, వెలుగు: ఫేస్‌‌బుక్‌‌లో వచ్చిన ఇంటర్నెట్ ప్రకటనను నమ్మి ఓ రైల్వే ఉద్యోగి మోసపోయారు. సికింద్రాబాద్‌‌లోని బౌద్ధ నగర్‌‌కు చెందిన టెకి కృష్ణ ప్రకాశ్ ఈ నెల 11న ఫేస్‌‌బుక్‌‌లో గ్లోబల్ ఆర్బిట్ ఇంటర్నెట్ ప్రకటనను చూశారు. 3 నెలలు ఉచిత సర్వీస్ అంటూ దుండగులు నమ్మబలికి, స్పేస్ ఎక్స్ 6జీ మాల్​వేర్ యాప్‌‌ను ఇన్‌‌స్టాల్ చేయించారు. దానికి ఫోన్ అనుమతులు ఇవ్వగానే ఆయన మొబైల్ పనిచేయడం ఆగిపోయింది. ఆ తర్వాత బాధితుడి ఎస్‌‌బీఐ అకౌంట్, యాక్సిస్, ఫెడరల్, ఐసీఐసీఐ క్రెడిట్ కార్డుల నుంచి సైబర్ కేటుగాళ్లు విడతల వారీగా రూ.5,76,400 కాజేశారు. బాధితుడు హైదరాబాద్ సైబర్ క్రైం పోలీసులను ఆశ్రయించారు.
 

జమ్మికుంట, వెలుగు: కరీంనగర్  జిల్లా జమ్మికుంట పట్టణంలోని ప్రభుత్వ బాలుర పాఠశాలలో పని చేస్తున్న రామ్ రాజయ్య అనే టీచర్​ తమను కొట్టడంతో పాటు అసభ్యకరంగా ప్రవర్తిస్తున్నాడని విద్యార్థులు ఆందోళనకు దిగారు. స్కూల్​ ఎదుట బైఠాయించి నిరసన తెలిపారు. ఈ సందర్భంగా పలువురు విద్యార్థులు మాట్లాడుతూ టీచర్​ రామ్ రాజయ్య తమకు సరిగా చదువు చెప్పకుండా ఇష్టం వచ్చినట్లు కొట్టడమే కాకుండా సెల్ ఫోన్ లో అసభ్యకర ఫొటోలను చూపెడుతున్నాడని వాపోయారు. ఈ విషయాన్ని తల్లిదండ్రులకు తెలియజేయగా, వారు హెచ్ఎంకు ఫిర్యాదు చేశారు. విషయం తెలుసుకున్న పోలీసులు స్కూల్​కు చేరుకొని వివరాలు సేకరించారు.

రోజులు మారుతున్నాయి.  యూత్​ సంప్రదాయాలను పట్టించుకోవడం లేదు. పాటించకపోతే ఏమవుతుంది అని ఎదురు ప్రశ్న తో కొంతమంది వితండంగా వాదిస్తుంటారు.హిందూ సంప్రదాయంలో బొట్టు పెట్టుకోడాన్ని శుభానికి, పాజిటివ్ ఎనర్జీకి సంకేతంగా భావిస్తారు. పూజ తర్వాత బొట్టు పెట్టుకున్నారంటే, ఆ వ్యక్తి దేవుడి ఆశీస్సులు తీసుకున్నాడని అర్థం. ఇది కేవలం ఆధ్యత్మికమే కాదని కనుబొమ్మల మధ్య.. నుదుటిపై బొట్టు పెట్టుకోవడం వెనుక సైన్స్​ పరంగా చాలా ఉపయోగాలున్నాయని శాస్త్రవేత్తలు చెబుతున్నారు.   

 హిందూ సాంప్రదాయంలో నుదుటిపై బొట్టు పెట్టుకోవడం కేవలం అందం కోసమే కాదు, దీని వెనుక మన రుషులు అందించిన ఒక అద్భుతమైన సైన్స్  దాగి ఉంది.నాడీ శాస్త్రం ప్రకారం మన శరీరంలోని 72వేల నాడులున్నాయి. వీటిలో అత్యంత ముఖ్యమైన ఇడ, పింగళ మరియు సుషుమ్న నాడులు.  ఈ మూడు  కనుబొమ్మల మధ్య కలుస్తాయి.  అందుకే  ఆ ప్రదేశాన్ని ని దీనినే త్రివేణి సంగమం అంటారు. అక్కడ బొట్టు పెట్టుకుని ప్రెస్ చేయడం వల్ల మనస్సు ప్రశాంతంగా మారుతుంది.  ఇంకా  మెదడులోని ఎడమ, కుడి భాగాలు సరిగ్గా బ్యాలెన్స్ అవుతాయి.  అందుకే తల నొప్పి వచ్చినప్పుడు నుదుటిని కొద్దిగా ప్రెస్​ చేస్తాము కదా..!

బొట్టు  పెట్టుకోవడం భారతీయ హిందూ సంస్కృతిలో చాలా ఇంపార్టెంట్​ అని పెద్దలు చెబుతుంటారు. కాని ప్రస్తుతం యూత్​ స్టైల్ స్టేట్‌మెంట్ చేయడానికి .. అందంగా కనపడేవదుకు.. వివిధ రకాల తిలకాలను వాడుతున్నారు. బొట్టు పెటుకోకొనే ఆచారం  కొనసాగుతోంది. నిజానికి నుదుటిపైన తిలకం వెనుక మతం మాత్రమే కాకుండా శాస్త్రీయంగా వాస్తవాలు కూడా ఉంది.

ఎవరైనా సరే బొట్టును  రెండు కనుబొమ్మల మధ్యలో పెట్టుకుంటారు. నుదిటి మధ్యన .. శరీరంలో ఆజ్ఞా చక్రం ఉంటుంది. ఈ చక్రాలన్నీ వేదాలలో కూడా వివరించబడ్డాయి. తిలకం పెట్టుకోవడం వల్ల అంతర్గత జ్ఞానాన్ని పెంచే శక్తులు అభివృద్ధి చెందుతుందని నమ్ముతారు.

- సైన్స్ పరంగా చూస్తే పీనియల్ గ్రంధి నుదురు మధ్యలో ఉంటుంది. బొట్టు పెట్టుకొనేటప్పుడు ఒత్తిడిని సృష్టిస్తుంది.. ఇది గ్రంథి వేగంగా పని చేసేలా చేయడం వలన  మనస్సును ప్రశాంతపరుస్తుందని శాస్త్రవేత్తలు చెబుతున్నారు. 

మరో ముఖ్య విషయం ఏంటంటే.. పీనియల్​ గ్రంథి చురుకుగా పనిచేయడం వలన ఏకాగ్రత ఏర్పడుతుంది. ఆక్యుప్రెషర్ సూత్రాల ప్రకారం, ఈ పాయింట్ తలనొప్పి నుండి ఉపశమనాన్ని కలిగిస్తుంది. ఇక్కడ బొట్టు పెట్టుకోవడం వలన  నరాలు, రక్త నాళాల ప్రసరణ మెరుగుపడుతుంది.నుదుటిపై  ఒత్తిడి కలగడంవలన  నిద్రలేమి సమస్య నుంచి ఉపశమనం లభిస్తుందంటారు. నుదురు  ప్రాంతంలో  చెవికి సంబంధించిన నరం కూడా ఉంటుంది, దీని ఒత్తిడి వల్ల వినే శక్తి పెరుగుతుందంట.

ఏ బొట్టు పెట్టుకుంటే ఏ ప్రయోజనం?

• గంధం: మెదడుకు చల్లదనాన్ని ఇస్తుంది.
• కుంకుమ: రక్త ప్రసరణను క్రమబద్ధీకరిస్తుంది.
• విభూతి: తలనొప్పి ..మాయను తొలగిస్తుంది.

 ప్రస్తుతం యూత్​ ప్యాషన్​ పేరుతో నుదుటిపై  బొట్టుపెట్టుకోవడం మానేశారు.  కొంతమంది అయితే ఇంట్లో పెద్దవారు ఏమన్నా అంటారేమోనని ఇంట్లో పెట్టుకొని బయటకు వచ్చి చెరిపేసుకుంటున్నారు. ఇకనైనా అలా చేయకుండా మన సంస్కృతిని..సనాతన ధర్మాన్ని కాపాడాల్సిన బాధ్యత అందరిపై ఉందని గ్రహించాలి. 

Disclaimer: పైన అందించిన సమాచారం కేవలం అవగాహన కోసం మాత్రమే. ఈ కథనాన్ని  పురాణాల ప్రకారం పండితులు.. నిపుణుల సలహాలతో పాటు ఇంటర్నెట్ లో అందుబాటులో ఉన్న సమాచారం వినియోగించి రూపొందించబడింది. ఈ సమాచారాన్ని V6 వెలుగు యాజమాన్యం లేదా ఉద్యోగులు ధృవీకరించరు. మీకున్న ఆధ్యాత్మిక నిపుణులను సంప్రదించటం ఉత్తమం.

తిరుమల కొండ.. తిరుమల కొండ.. కలియుగ ప్రత్యక్ష దైవం.. దేవదేవుడు వేంకటేశ్వరస్వామి కొలువైన మహా పుణ్యక్షేత్రం. అలాంటి పుణ్యక్షేత్రంలో నిత్యం లక్షల మంది భక్తులు స్వామి దర్శనానికి రాత్రీ పగలు తేడా లేకుండా వేచి ఉంటారు.. కిలోమీటర్ల కొద్దీ క్యూలో నిల్చొని.. రెప్పపాటు స్వామి దర్శనానికి తహతహలాడుతుంటారు. ఎన్ని సౌకర్యాలు వచ్చినా సామాన్యులకు సరిపోవటం లేదు కానీ.. వీవీఐపీల కోసం తీసుకొస్తున్న సౌకర్యాలు ఇప్పుడు అందర్నీ ఆశ్చర్యపరుస్తున్నాయి. 

తిరుమల కొండపై VVIPలు.. అంటే సామాన్యులు కాదులేండీ.. సీఎం, ఎంపీలు, మంత్రులు, ఎమ్మెల్యేలు, ఎమ్మెల్సీలు, కలెక్టర్లు, ఎస్పీలు, పారిశ్రామికవేత్తలు, డబ్బున్నోళ్లు.. నేరుగా స్వామిని దర్శించుకుని పూజలు చేసే గొప్ప గొప్పోళ్ల కోసం  ప్రత్యేక కంపార్ట్ మెంట్ సిద్ధం చేసింది తిరుమల తిరుపతి దేవస్థానం. 

ఈ ప్రత్యేకమైన కంపార్ట్ మెంట్ ఎలా ఉంది అంటే.. సామాన్యుల భాషలో.. సింపుల్ గా చెప్పాలంటే మల్టీఫ్లెక్స్ ధియేటర్ తరహాలో అద్భుతంగా ఉంది. వేంకటేశ్వర స్వామిని దర్శించుకోవటానికి తిరుమల కొండ వచ్చే అత్యంత ప్రముఖ వ్యక్తుల కోసం ఈ మల్టీఫ్లెక్స్ తరహా VVIP కంపార్ట్ మెంట్ సిద్ధం చేశారు అధికారులు. 

ఈ VVIP కంపార్ట్ మెంట్ ప్రత్యేక ఏంటంటే.. ఇది అంతర్జాతీయ విమాశ్రయంలో లాంజ్ ఉంటుంది కదా.. అలాంటి ఆధునిక హంగులతో తీర్చిదిద్దారు. మన సామాన్యుల వెర్షన్ లో అయితే మల్టీఫ్లెక్స్ ధియేటర్ రేంజ్ లో ఈ కంపార్ట్ మెంట్ ను రూపొందించారు. సీటింగ్ అలాగే ఉంటుంది. ముందు పెద్ద LED స్క్రీన్.. ఆ స్క్రీన్ పై వేంకటేశ్వర స్వామి భక్తి ఛానెల్ ప్రసారం అవుతూ ఉంటుంది. అత్యంత ప్రముఖలు స్వామి దర్శనానికి వచ్చిన సమయంలో.. స్వామి దర్శనానికి వెళ్లటానికి ముందు ఈ వీవీఐపీ కంపార్ట్ మెంట్ లో వేచి ఉంటారు. స్వామి దర్శనం కొంచెం.. కొన్ని నిమిషాలు ఆలస్యం అయితే.. మల్టీ్ఫ్లెక్స్ తరహాలో ఆధునిక హంగులతో తీర్చిదిద్దిన ఈ VVIP కంపార్ట్ మెంట్ లో వెయిట్ చేస్తారు. వీరి కోసం దీనికి ప్రత్యేకంగా రూపొందించారు టీటీడీ అధికారులు. 

తిరుమల వైకుంఠం క్యూ కాంప్లెక్స్‌లోని 17వ కంపార్ట్‌మెంట్‌ను ఈ విధంగా సరికొత్తగా మార్పులు చేశారు. ఆధునిక ఇంటీరియర్... ఆకట్టుకునే లైటింగ్... భారీ డిజిటల్ స్క్రీన్... ఇలా లోపల అడుగుపెడితే ఓ ప్రీమియం మల్టీప్లెక్స్‌ను తలపించేలా ఈ కేంద్రాన్ని.. ఈ కంపార్ట్ మెంట్ ను తీర్చిదిద్దారు. సీఎం చంద్రబాబు ఈ కేంద్రాన్ని తన చేతులతో ప్రారంభించారు.  మంత్రులు ఆనం రామనారాయణ రెడ్డి, అనగాని సత్యప్రసాద్‌తో కలిసి పరిశీలించారు. వర్చువల్ రియాలిటీ ద్వారా తిరుమల దర్శన అనుభూతిని కూడా సీఎం వీక్షించారు.

ఈ అత్యాధునిక కంపార్ట్ మెంట్ లోకి సామాన్య భక్తులకు కూడా ప్రవేశం ఉంటుందా..? లేక ప్రత్యేక అతిథులు, వీవీఐపీల సందర్శనకే పరిమితం అవుతుందా..? సామాన్య భక్తులకు అందుబాటులోకి తీసుకొస్తే... వైకుంఠం క్యూ కాంప్లెక్స్‌లో వేచి ఉండే సమయాన్ని ఓ ఆధ్యాత్మిక అనుభూతిగా మార్చే సరికొత్త వేదికగా ఇది నిలిచే అవకాశం ఉంది. 

• ఈ నెల 17న  పరేడ్​ గ్రౌండ్​లో​ప్రోగ్రాం ఏర్పాట్లపై సీఎస్ సమీక్ష

హైదరాబాద్, వెలుగు: ఈనెల17న కేంద్ర ప్రభుత్వం ఆధ్వర్యంలో నిర్వహించే తెలంగాణ విమోచన ఉత్సవాలకు ఉప రాష్ట్రపతి రాధాకృష్ణన్ ముఖ్య అతిథిగా హాజరుకానున్నారని సీఎస్​ సంజయ్ జాజు తెలిపారు. సచివాలయంలో వైస్​ప్రెసిడెంట్ పర్యటన ఏర్పాట్లపై సంబంధిత కార్యదర్శులు, పోలీసు అధికారు లతో మంగళవారం సమీక్ష నిర్వహించారు. ఈ సందర్భంగా సీఎస్ మాట్లాడుతూ.. ఉపరాష్ట్రపతి రాధాకృష్ణన్ ఈనెల 17న ఉదయం 8.30 గంటలకు హైదరాబాద్ కు చేరుకొని ఉదయం 9.30 నుంచి మధ్యాహ్నం 12 గంటల వరకు సికింద్రాబాద్ పరేడ్ గ్రౌండ్ లో నిర్వహించే కార్యక్రమంలో పాల్గొంటారని వివరించారు. కేంద్ర ప్రభుత్వ సాంస్కృతిక శాఖ ఆధ్వర్యంలో నిర్వహించే  ఈ కార్యక్రమానికి సంబంధిత శాఖలు విస్తృత ఏర్పాట్లు చేపడుతున్నాయని అన్నారు.

• ప్రిన్స్‌‌ రహీమ్‌‌ ఆగా ఖాన్‌‌ 5తో భేటీలో గవర్నర్‌‌ శివప్రతాప్‌‌ శుక్లా

హైదరాబాద్‌‌, వెలుగు: తెలంగాణ–ఆగా ఖాన్‌‌ డెవలప్‌‌మెంట్‌‌ నెట్‌‌వర్క్‌‌ (ఏకేడీఎన్‌‌) మధ్య భాగస్వామ్యాన్ని మరింత బలోపేతం చేయాలని గవర్నర్‌‌ శివప్రతాప్‌‌ శుక్లా కోరారు. ఇస్మాయిలీ ముస్లింల 50వ వారసత్వ ఇమామ్‌‌, ఆగా ఖాన్‌‌ డెవలప్‌‌మెంట్‌‌ నెట్‌‌వర్క్‌‌ (ఏకేడీఎన్‌‌) చైర్మన్‌‌ ప్రిన్స్‌‌ రహీమ్‌‌ ఆగా ఖాన్‌‌5 సోమవారం లోక్‌‌భవన్‌‌కు వచ్చి గవర్నర్‌‌ శివప్రతాప్‌‌ శుక్లాతో భేటీ అయ్యారు. ఇమామ్‌‌గా బాధ్యతలు స్వీకరించిన అనంతరం భారత్‌‌, తెలంగాణకు ఆయన చేసిన తొలి అధికారిక పర్యటన సందర్భంగా గవర్నర్‌‌ ఆయనకు ఘన స్వాగతం పలికారు. ఈ సందర్భంగా శుక్లా మాట్లాడుతూ హైదరాబాద్‌‌, తెలంగాణకు ప్రిన్స్‌‌ రహీమ్‌‌ ఆగా ఖాన్‌‌5 రావడం పట్ల సంతోషం వ్యక్తం చేశారు.

దివంగత ఆగా ఖాన్‌‌4 సేవలను స్మరించుకున్నారు. భారతదేశ అభివృద్ధికి, ఏకేడీఎన్ ద్వారా సమాజ సంక్షేమానికి ఆయన అందించిన సేవలను కొనియాడారు.  హైదరాబాద్‌‌తో ఆగా ఖాన్‌‌ ట్రస్ట్‌‌ ఫర్‌‌ కల్చర్‌‌కు ఉన్న చిరకాల అనుబంధాన్ని ప్రస్తావించారు. చారిత్రక కట్టడాల పరిరక్షణ, పరిసరాల అభివృద్ధిలో ఆగా ఖాన్‌‌ ట్రస్ట్‌‌ ఫర్‌‌ కల్చర్‌‌ చేపడుతున్న కార్యక్రమాలు ప్రభుత్వ–ప్రైవేటు భాగస్వామ్యానికి ఆదర్శంగా నిలుస్తున్నాయని అన్నారు. విద్య, పట్టణ పునరుద్ధరణ, సామాజిక ఆరోగ్య సేవలు, మహిళా సాధికారత, ఉపాధి కల్పన తదితర రంగాల్లో సంస్థ చేస్తున్న కృషి స్థానిక సమాజాలకు దీర్ఘకాలిక ప్రయోజనాలను అందిస్తోందని పేర్కొన్నారు.

హైదరాబాద్‌‌ సమీపంలోని ఆగా ఖాన్‌‌ అకాడమీ ప్రపంచస్థాయి విద్యా ప్రమాణాలతో భవిష్యత్‌‌ తరాల నాయకులను తీర్చిదిద్దుతున్న సంస్థగా నిలుస్తోందని అన్నారు. తెలంగాణ–ఏకేడీఎన్‌‌ మధ్య సహకారాన్ని మరింత విస్తరించాలని గవర్నర్‌‌ ఆకాంక్షించారు.

హ్యూమన్ ​డెవలప్‌‌మెంట్‌‌కు మరింత సహకారం

తెలంగాణతో పాటు దేశవ్యాప్తంగా మానవాభివృద్ధి, ప్రజా సంక్షేమం కోసం చేపడుతున్న కార్యక్రమాలను ప్రిన్స్‌‌ రహీమ్‌‌ ఆగా ఖాన్‌‌5 గవర్నర్‌‌కు వివరించారు. ముఖ్యంగా తెలంగాణలో పట్టణ పునరుద్ధరణ, సామాజిక ఆరోగ్య సంరక్షణ, మహిళల నేతృత్వంలోని అభివృద్ధి, ఉపాధి కల్పన రంగాల్లో ఏకేడీఎన్‌‌ చేస్తున్న కృషిని వివరించారు. 

• అందుకే విమోచన దినోత్సవం నిర్వహిస్తలేరు: కిషన్ రెడ్డి
• కేంద్రం ఆధ్వర్యంలోనే హైదరాబాద్ ముక్తి దివస్
• పరేడ్ గ్రౌండ్స్ కార్యక్రమానికి ఉపరాష్ట్రపతి చీఫ్ గెస్ట్
• హైదరాబాద్‌‌‌‌‌‌‌‌‌‌‌‌‌‌‌‌ను ఉస్మానిస్థాన్​గా మార్చేలా నిజాం కుట్ర
• పోరాట చరిత్రను ప్రజలకు చాటేందుకే విమోచన దినం
• బీజేపీ రాష్ట్ర అధ్యక్షుడు రాంచందర్ రావు
• చార్మినార్ వద్ద మహిళా మోర్చా స్కూటీ ర్యాలీ

హైదరాబాద్/చార్మినార్, వెలుగు: మజ్లిస్ (ఎంఐఎం) పార్టీకి భయపడి ఓటు బ్యాంక్ రాజకీయాలకు ప్రాధాన్యం ఇవ్వడం వల్లే గత బీఆర్ఎస్, ప్రస్తుత కాంగ్రెస్ ప్రభుత్వాలు సెప్టెంబర్ 17న తెలంగాణ విమోచన దినోత్సవాన్ని అధికారికంగా నిర్వహించేందుకు వెనకాడుతున్నాయని కేంద్ర బొగ్గు, గనుల శాఖ మంత్రి జి. కిషన్‌‌‌‌రెడ్డి ఆరోపించారు. మంగళవారం భారతీయ జనతా మహిళా మోర్చా ఆధ్వర్యంలో చార్మినార్ భాగ్యలక్ష్మి అమ్మవారి దేవాలయం నుంచి అసెంబ్లీ ప్రాంగణంలోని సర్దార్ వల్లభాయ్ పటేల్ విగ్రహం వరకు నిర్వహించిన మహిళా శక్తి స్కూటీ ర్యాలీ ఆయన ప్రారంభించారు.

ఈ సందర్భంగా కిషన్ రెడ్డి మాట్లాడుతూ నిజాం నిరంకుశ పాలన, రజాకార్ల దురాగతాలకు వ్యతిరేకంగా తెలంగాణ ఆడబిడ్డలు రోకలిబండలు, కారపు ముద్దలతో ధైర్యంగా పోరాడి రజాకార్లను గ్రామ సరిహద్దుల దాకా తరిమికొట్టిన చరిత్ర మనదన్నారు. కర్ణాటక, మహారాష్ట్రల్లో ప్రభుత్వాలే హైదరాబాద్ విముక్తి ఉత్సవాలను ఘనంగా నిర్వహిస్తున్నాయని, తెలంగాణలో మాత్రం ఎంఐఎంకు భయపడి బీఆర్ఎస్, కాంగ్రెస్ ప్రభుత్వాలు విమోచన దినోత్సవాన్ని నిర్వహించలేదని విమర్శించారు. బీఆర్ఎస్, కాంగ్రెస్ వెనకడుగు వేయడంతో తెలంగాణ ప్రజల ఆకాంక్షలకు అనుగుణంగా కేంద్ర ప్రభుత్వమే బాధ్యత తీసుకుని ఏటా అధికారికంగా హైదరాబాద్ ముక్తి దివస్ నిర్వహిస్తోందని చెప్పారు.

ఓటుబ్యాంకు రాజకీయాలే కారణం

నిజాం పాలకులకు వ్యతిరేకంగా ఉద్యమం నడిపిన ఆర్య సమాజీల సేవలను మరవలేమని బీజేపీ రాష్ట్ర అధ్యక్షుడు రాంచందర్‌‌‌‌రావు అన్నారు. హైదరాబాద్‌‌‌‌ను ప్రత్యేక రాజ్యంగా ఉంచి, ‘ఉస్మానిస్థాన్‌‌‌‌’గా మార్చి పాకిస్థాన్‌‌‌‌తో కలపాలని నిజాం చూశారని ఆరోపించారు. నిజాం, రజాకార్ల నిరంకుశ పాలనలో తెలంగాణ ప్రజలు, ముఖ్యంగా మహిళలు పైశాచిక హింసను అనుభవించారని, ఆ రాక్షసత్వాన్ని ఎదిరించి వందేమాతరం రామచంద్రరావు, జర్నలిస్ట్ షోయబుల్లా ఖాన్‌‌‌‌తో పాటు ఎంతోమంది వీరులు ప్రాణత్యాగం చేశారని గుర్తుచేశారు. వేలాది మంది మహిళలు కూడా ఈ పోరాటంలో మానప్రాణాలు కోల్పోయారని పేర్కొన్నారు. ఈ పోరాట చరిత్రను, అమరుల త్యాగాలను సమాజానికి తెలియజేయడంలో పాలక ప్రభుత్వాలు పూర్తిగా విఫలమయ్యాయని విమర్శించారు. విమోచన దినోత్సవం నిర్వహించేందుకు ప్రభుత్వాలు ఎందుకు వెనకాడుతున్నాయో చూస్తే.. అందుకు ఓటు బ్యాంక్ రాజకీయాలే కారణమని స్పష్టమవుతుందన్నారు. బీజేపీ మహిళా మోర్చా రాష్ట్ర అధ్యక్షురాలు మేకల శిల్పారెడ్డి మాట్లాడుతూ.. తెలంగాణ గడ్డపై పుట్టిన ప్రతి ఆడబిడ్డ ధైర్యానికి, ఆత్మగౌరవానికి మారుపేరని కొనియాడారు. కార్యక్రమంలో బీజేపీ నాయకులు శశికళ, ఉమా మహేందర్,  జే నిరంజన్ యాదవ్, సుభాష్ చంద్రజీ, ఆలే భాస్కర్, రూప్‌‌‌‌రాజ్ పాల్గొన్నారు.

విమోచన దినోత్సవానికి ఉప రాష్ట్రపతి చీఫ్ గెస్ట్

ఈ నెల 17న సికింద్రాబాద్ పరేడ్ గ్రౌండ్స్‌‌‌‌‌‌‌‌‌‌లో కేంద్ర ప్రభుత్వం ఆధ్వర్యంలో తెలంగాణ విమోచన దినోత్సవాన్ని ఘనంగా నిర్వహిస్తున్నట్టు కిషన్‌‌‌‌రెడ్డి తెలిపారు. ‘హైదరాబాద్ ముక్తి దివస్’ కార్యక్రమానికి ఉప రాష్ట్రపతి సీపీ రాధాకృష్ణన్, కేంద్ర సాంస్కృతిక శాఖ మంత్రి గజేంద్ర సింగ్ షెకావత్‌‌‌‌తో పాటు పలువురు ఎంపీలు, ప్రముఖులు హాజరవుతారని చెప్పారు. మంగళవారం పరేడ్ గ్రౌండ్స్‌‌‌‌లో ఏర్పాట్లను కిషన్‌‌‌‌రెడ్డి పరిశీలించారు.  అనంతరం భద్రత, ట్రాఫిక్ మళ్లింపు, వీఐపీ ప్రొటోకాల్ తదితర అంశాలపై ఉన్నతాధికారులతో సమీక్ష నిర్వహించి, ఎలాంటి లోటుపాట్లకు తావులేకుండా ఏర్పాట్లు పూర్తి చేయాలని ఆదేశించారు.  ఈ నెల 17న జరిగే 
చారిత్రక వేడుకల్లో ప్రజలంతా పెద్ద ఎత్తున భాగస్వాములై తెలంగాణ పౌరుషాన్ని, ఆత్మగౌరవాన్ని చాటిచెప్పాలని కిషన్‌‌‌‌రెడ్డి పిలుపునిచ్చారు.

హైదరాబాద్: విద్యుత్ ఉత్పత్తిని పెంచడంతో పాటు విద్యుత్‌ను పొదుపుగా, సమర్థవంతంగా వినియోగించడంపై కూడా దృష్టి సారించాల్సిన అవసరం ఉందని తెలంగాణ డిప్యూటీ సీఎం, ఇంధన శాఖ మంత్రి భట్టి విక్రమార్క అన్నారు. అవసరం లేకుండా వినియోగించకుండా ఆదా చేసే ప్రతి యూనిట్ విద్యుత్‌ను చౌకైన విద్యుత్‌గా చూడాలనిన్నారు.ఇంధన సామర్థ్యాన్ని కేవలం పర్యావరణ పరిరక్షణ కోణంలోనే కాకుండా ఆర్థికాభివృద్ధికి ఉపయోగపడే అంశంగా చూడాలని భట్టి విక్రమార్క సూచించారు. పరిశ్రమల్లో మెరుగైన మోటార్లు, ఆధునిక శీతలీకరణ వ్యవస్థలు, స్మార్ట్ ఎనర్జీ మేనేజ్‌మెంట్ విధానాలను అమలు చేయడం ద్వారా విద్యుత్ వృథాను తగ్గించవచ్చన్నారు.

ప్రతి మెగావాట్ విద్యుత్ డిమాండ్ తగ్గితే విద్యుత్ ఉత్పత్తి, ట్రాన్స్‌మిషన్ వ్యవస్థలపై ఒత్తిడి తగ్గుతుందని తెలిపారు. తెలంగాణ వేగంగా అభివృద్ధి చెందుతున్న నేపథ్యంలో భవిష్యత్‌లో విద్యుత్ డిమాండ్ మరింత పెరిగే అవకాశం ఉందన్నారు. పరిశ్రమలు, తయారీ రంగం, డేటా సెంటర్లు, లైఫ్ సైన్సెస్, ఎలక్ట్రానిక్స్ వంటి రంగాల విస్తరణతో విద్యుత్ అవసరం గణనీయంగా పెరుగుతుందని పేర్కొన్నారు.

ప్రతి యూనిట్‌తో ఎక్కువ ఆర్థిక కార్యకలాపాలు

అభివృద్ధిని తగ్గించడం పరిష్కారం కాదని, ప్రతి యూనిట్ విద్యుత్‌తో ఎక్కువ ఆర్థిక కార్యకలాపాలు సాధించేలా చూడాల్సిన అవసరం ఉందని భట్టి విక్రమార్క అన్నారు. పరిశ్రమల్లో విద్యుత్ వినియోగం తగ్గితే నిర్వహణ ఖర్చులు కూడా తగ్గుతాయని, పీక్ డిమాండ్ తగ్గడం వల్ల విద్యుత్ ఉత్పత్తి, ట్రాన్స్‌మిషన్ వ్యవస్థలపై భారం తగ్గుతుందని వివరించారు.విద్యుత్ పొదుపు ద్వారా దేశ ఇంధన భద్రతను మరింత బలోపేతం చేయవచ్చన్నారు. ప్రతి యూనిట్ విద్యుత్‌ను ఆదా చేయడం ద్వారా పెరుగుతున్న డిమాండ్‌ను సమర్థవంతంగా నిర్వహించేందుకు అవకాశం ఉంటుందని తెలిపారు.

ఒక పరిశ్రమలో విజయవంతమైన టెక్నాలజీని ఇతర పరిశ్రమలకు కూడా విస్తరించాల్సిన అవసరం ఉందన్నారు. దేశంలో ఇప్పటికే అనేక మంచి పైలట్ ప్రాజెక్టులు ఉన్నాయని, వాటిని పెద్ద స్థాయిలో అమలు చేయడమే ముందున్న సవాలు అని పేర్కొన్నారు. కొత్త టెక్నాలజీ ఏంటి అనే దానితో పాటు ఇప్పటికే విజయవంతంగా పనిచేస్తున్న టెక్నాలజీలను గుర్తించి విస్తరించడంపై దృష్టి పెట్టాలని సూచించారు.

AIతో విద్యుత్ వృథాకు అడ్డుకట్ట

పునరుత్పాదక ఇంధనం, విద్యుదీకరణ, డిజిటలైజేషన్ ద్వారా ఇంధన సామర్థ్యాన్ని మరింత పెంచాలని భట్టి విక్రమార్క అన్నారు. AI ఆధారిత సాంకేతికతలను వినియోగించి విద్యుత్ వృథాను గుర్తించి, వినియోగాన్ని మరింత సమర్థవంతంగా మార్చాలని సూచించారు.భవిష్యత్‌లో కర్మాగారాలు కేవలం విద్యుత్ వినియోగదారులుగా కాకుండా విద్యుత్ వ్యవస్థలో చురుకైన భాగస్వాములుగా మారాల్సిన అవసరం ఉందన్నారు. పరిశ్రమలు ప్రధానంగా కొలవడం, పంచుకోవడం, విస్తరించడం అనే మూడు అంశాలపై దృష్టి పెట్టాలని సూచించారు.ఎనర్జీ ఎఫిషియెన్సీని ఏడాదికి ఒకసారి నిర్వహించే ఆడిట్‌గా కాకుండా నిరంతర ప్రక్రియగా మార్చాలని అన్నారు. విజయవంతమైన ఇంధన సామర్థ్య విధానాలు, టెక్నాలజీలను ఇతర సంస్థలతో పంచుకోవాలని సూచించారు.

పెట్టుబడులకు తెలంగాణ అనుకూలం

ప్రభుత్వం, పరిశ్రమలు, టెక్నాలజీ సంస్థలు, ఆర్థిక సంస్థలు, విద్యాసంస్థలు సమన్వయంతో పనిచేయాల్సిన అవసరం ఉందని భట్టి విక్రమార్క అన్నారు. వాణిజ్యపరంగా విజయవంతమైన టెక్నాలజీలు కొన్ని పెద్ద సంస్థలకే పరిమితం కాకుండా అన్ని పరిశ్రమలకు అందుబాటులోకి రావాలని ఆకాంక్షించారు.తెలంగాణ వేగంగా అభివృద్ధి చెందడంతో పాటు తెలివిగా, సమర్థవంతంగా ముందుకు వెళ్లాల్సిన అవసరం ఉందన్నారు. ప్రజలకు, పరిశ్రమలకు అవసరమైనంత విద్యుత్ అందించడంతో పాటు ప్రతి యూనిట్ విద్యుత్‌తో ఎక్కువ ఫలితం సాధించేలా చూడాలని పేర్కొన్నారు.

తెలంగాణలో అంతర్జాతీయ స్థాయి మౌలిక వసతులు అందుబాటులో ఉన్నాయని భట్టి విక్రమార్క అన్నారు. అంతర్జాతీయ విమానాశ్రయం, మెరుగైన రహదారులు, ఔటర్ రింగ్ రోడ్ వంటి సదుపాయాలు రాష్ట్రానికి బలంగా ఉన్నాయని తెలిపారు. రాష్ట్రంలో శాంతిభద్రతలు పటిష్టంగా ఉన్నాయని, పారిశ్రామిక, పెట్టుబడులకు అనుకూల వాతావరణం ఉందని పేర్కొన్నారు.పెట్టుబడిదారులను తెలంగాణ ప్రభుత్వం సంపద సృష్టికర్తలుగా చూస్తోందని అన్నారు. సంపద సృష్టించే ప్రతి ఒక్కరికీ తెలంగాణలో స్వాగతం పలుకుతున్నామని, కలిసి ఎదగడానికి రాష్ట్రానికి వచ్చి అభివృద్ధిలో భాగస్వాములు కావాలని పెట్టుబడిదారులకు పిలుపునిచ్చారు.

2047 నాటికి 3 ట్రిలియన్ డాలర్ల ఆర్థిక వ్యవస్థ లక్ష్యం

చిన్న రాష్ట్రం అయినప్పటికీ 2047 నాటికి తెలంగాణను 3 ట్రిలియన్ డాలర్ల ఆర్థిక వ్యవస్థగా తీర్చిదిద్దాలన్న లక్ష్యంతో ప్రభుత్వం ముందుకు వెళ్తోందని భట్టి విక్రమార్క తెలిపారు. ఆర్థికాభివృద్ధికి అనుగుణంగా అన్ని రంగాలను ప్రణాళికాబద్ధంగా అభివృద్ధి చేస్తున్నామని చెప్పారు.

విద్యుత్ రంగాన్ని బలోపేతం చేయడంతో పాటు పారిశ్రామిక అభివృద్ధికి అవసరమైన మౌలిక వసతులపై ప్రత్యేక దృష్టి పెట్టామని అన్నారు. పరిశ్రమలు, పెట్టుబడిదారులు తెలంగాణ అభివృద్ధిలో భాగస్వాములు కావాలని పిలుపునిచ్చారు.గత ఏడాది గ్లోబల్ సమ్మిట్‌ను విజయవంతంగా నిర్వహించిన తెలంగాణ ప్రభుత్వం, ఈ ఏడాది డిసెంబర్‌లో ‘తెలంగాణ రైజింగ్ గ్లోబల్ సమ్మిట్’ నిర్వహించేందుకు ప్రణాళికలు సిద్ధం చేస్తోందని తెలిపారు. ప్రపంచవ్యాప్తంగా ఉన్న పెట్టుబడిదారులు ఈ సమ్మిట్‌కు హాజరై తెలంగాణ రైజింగ్ లో భాగస్వాములు కావాలని కోరారు.

పెట్టుబడులు, పరిశ్రమలు, సంపద సృష్టి ద్వారా తెలంగాణ అభివృద్ధిలో భాగస్వాములు కావాలని భట్టి విక్రమార్క పిలుపునిచ్చారు. పరిశ్రమలకు అవసరమైన విద్యుత్, రహదారులు, ఇతర మౌలిక వసతులను ప్రభుత్వం బలోపేతం చేస్తోందని తెలిపారు.తెలంగాణలో పెట్టుబడులు పెట్టండి.. కలిసి అభివృద్ధిని సాధిద్దాం అని డిప్యూటీ సీఎం భట్టి విక్రమార్క పిలుపునిచ్చారు.

బాల్కొండ, వెలుగు: ఆయకట్టు రైతుల సాగు అవసరాలను దృష్టిలో ఉంచుకుని శ్రీరాంసాగర్‌‌‌‌ ప్రాజెక్టు నుంచి నిజామాబాద్​ జిల్లా బాల్కొండ మండలంలోని లక్ష్మి కాలువకు నీటి విడుదల ప్రారంభమైంది. ఉన్నతాధికారుల ఆదేశాల మేరకు మంగళవారం అధికారులు లక్ష్మి కాలువ హెడ్‌‌‌‌ రెగ్యులేటర్‌‌‌‌ నుంచి 250 క్యూసెక్కుల నీటిని విడుదల చేశారు. 

దీంతో కాలువ పరిధిలోని ఆయకట్టు రైతుల్లో సాగుపై ఆశలు చిగురించాయి. కాలువలో నీటి ప్రవాహాన్ని ఎప్పటికప్పుడు పరిశీలిస్తూ, ఆయకట్టు ప్రాంతాలకు నీరు సక్రమంగా చేరేలా అధికారులు చర్యలు చేపట్టారు.

హనుమకొండ, వెలుగు: హనుమకొండ పబ్లిక్‌‌‌‌ గార్డెన్‌‌‌‌ సమీపంలో మంగళవారం భారీ వృక్షం అకస్మాత్తుగా విరిగి పడటంతో మూడు ఆటోలు, రెండు బైకులు, చిరువ్యాపారుల స్టాల్స్‌‌‌‌ ధ్వంసమయ్యాయి. అదే సమయంలో సిరిసిల్ల నుంచి వరంగల్‌‌‌‌కు వస్తున్న ఆర్టీసీ బస్సుపైనా చెట్టు పడింది. అయితే ఎవరూ గాయపడకపోవడంతో పెను ప్రమాదం తప్పింది. ఉదయం 9.30 గంటల సమయంలో ఈ ఘటన చోటుచేసుకుంది. చెట్టుకు కరెంట్‌‌‌‌ వైర్లు ఉండగా, బస్సు వాటిని తగలడంతో చెట్టు విరిగిపడినట్లు స్థానికులు తెలిపారు. 

సమాచారం అందుకున్న కాజీపేట ట్రాఫిక్‌‌‌‌ సీఐ వెంకటరత్నం, సిబ్బంది ఘటనా స్థలానికి చేరుకుని చెట్టును తొలగించి ట్రాఫిక్‌‌‌‌ను క్లియర్‌‌‌‌ చేశారు. ప్రమాదానికి గల కారణాలపై దర్యాప్తు చేస్తున్నట్లు సీఐ తెలిపారు. చెట్టు కూలడంతో నష్టపోయిన ఆటో డ్రైవర్లు, చిరువ్యాపారులను ప్రభుత్వం ఆదుకోవాలని బాధితులు కోరుతున్నారు. 

నల్లబెల్లి, వెలుగు: వర్షాలు లేక పంటలు ఎండిపోతుండటంతో ఆర్థికంగా నష్టపోతున్నామని, ప్రభుత్వం ఆదుకోవాలని కోరుతూ ఓ మహిళా రైతు తన పంట పొలంలో ఫ్లెక్సీ ఏర్పాటు చేసింది. వరంగల్‌‌‌‌ జిల్లా దుగ్గొండి మండలం వెంకటపూరంలో మంగళవారం ఈ ఘటన చోటుచేసుకుంది. బాధిత రైతు లక్ష్మి మాట్లాడుతూ ఎల్‌‌‌‌నినో ప్రభావంతో వర్షాలు లేక పంటలు ఎండిపోతున్నాయని ఆవేదన వ్యక్తం చేశారు. 

పంటల పెట్టుబడుల కోసం ప్రైవేట్‌‌‌‌ అప్పులు చేసి నష్టపోయామని తెలిపారు. ప్రభుత్వం రైతుల పరిస్థితిని గుర్తించి నష్టపరిహారం అందించి ఆదుకోవాలని ఫ్లెక్సీ ద్వారా సీఎం రేవంత్‌‌‌‌రెడ్డిని కోరారు. ఈ ఫ్లెక్సీ స్థానికంగా చర్చనీయాంశమైంది. 

తార్నాక, వెలుగు: ఓ ప్రేమ జంటను కలిపిన యువకుడిపై యువతి తరఫు బంధువులు పగ పెంచుకున్నారు. నాలుగేళ్లుగా పగతో రగిలిపోతూ అతడిని కాపుకాసి గొంతు కోసి హత్య చేశారు. ఈ ఘటన లాలాగూడ పోలీస్‌‌ స్టేషన్‌‌ పరిధిలో జరిగింది. 

స్థానికుల వివరాల ప్రకారం.. తుకారాంగేట్‌‌ బుద్ధనగర్‌‌కు చెందిన కార్తీక్‌‌(40) తన ఇంటి ఎదురుగా ఉంటున్న ఓ యువతి ప్రేమ వివాహానికి సహకరించాడు. దీంతో అప్పటి నుంచి యువతి తరఫు కుటుంబ సభ్యులు, బంధువులు కార్తీక్‌‌పై కక్ష పెంచుకున్నారు. 

ఈ క్రమంలో ఆదివారం బస్తీలో వినాయకుడి మండపాన్ని ఏర్పాటు చేస్తుండగా యువతి బంధువులు, అన్నదమ్ములు కార్తీక్‌‌తో గొడవకు దిగారు. దీంతో ఇరువర్గాల మధ్య తీవ్రస్థాయిలో వాగ్వాదం, గొడవ జరిగింది.

 అనంతరం యువతి అన్నదమ్ములు తమ స్నేహితులతో కలిసి కార్తీక్‌‌పై తీవ్రంగా దాడి చేసి, గొంతు కోసి అక్కడి నుంచి పరారైనట్లు స్థానికులు తెలిపారు. విషయం తెలుసుకున్న పోలీసులు సంఘటనా స్థలానికి చేరుకుని రక్తపు మడుగులో పడి ఉన్న కార్తీక్‌‌ను గాంధీ ఆస్పత్రికి తరలించారు. అక్కడ చికిత్స పొందుతూ కార్తీక్‌‌ మృతిచెందాడు.

పోలీసులు సర్దిజెప్పి వెళ్లాక..

కాగా, హత్యకు గంట ముందు బస్తీలో గొడవ జరుగుతోందని సమాచారం అందుకున్న లాలాగూడ పోలీసులు సంఘటనా స్థలానికి చేరుకున్నారు. ఇరువర్గాలకు సర్దిచెప్పి అక్కడి నుంచి వెళ్లిపోయారు. పోలీసులు వెళ్లిన కాసేపటికే మళ్లీ ఇరువర్గాల మధ్య గొడవ జరగడంతో కార్తీక్‌‌ హత్యకు గురయ్యాడు. ఘటన జరిగిన సమయంలో పోలీసులు అక్కడే ఉండి ఉంటే హత్య జరిగేది కాదని స్థానికులు ఆరోపిస్తున్నారు. కార్తీక్‌‌ కుటుంబ సభ్యులు ఇచ్చిన ఫిర్యాదు మేరకు కేసు నమోదు చేసి దర్యాప్తు చేస్తున్నామని పోలీసులు తెలిపారు.

హనుమకొండ, వెలుగు: వరంగల్​ నగరంలోని సుబేదారి పోలీస్‌‌‌‌ స్టేషన్‌‌‌‌ పరిధిలో మంగళవారం ఓ యువకుడు పట్టపగలే నడిరోడ్డుపై సూసైడ్ చేసుకున్న ఘటన కలకలం రేపింది. వరంగల్‌‌‌‌ నిట్‌‌‌‌ వెళ్లే మార్గంలోని డివైడర్‌‌‌‌పై యువకుడు మృతి చెందినట్లు సమాచారం అందడంతో పోలీసులు ఘటనా స్థలానికి చేరుకున్నారు. మృతుడి వద్ద రైలు టికెట్‌‌‌‌, సెల్‌‌‌‌ఫోన్‌‌‌‌ లభించాయి. రైలు టికెట్‌‌‌‌ ఆధారంగా అతడు మహారాష్ట్రలోని బల్లార్షకు చెందిన వ్యక్తిగా పోలీసులు అనుమానిస్తున్నారు. సెల్‌‌‌‌ఫోన్‌‌‌‌ డేటా ఆధారంగా మృతుడి వివరాలను సేకరిస్తున్నారు. 

మృతుడు వరంగల్‌‌‌‌కు ఎందుకు వచ్చాడు, ఎవరితో చివరిసారిగా మాట్లాడాడు, ఘటనకు కారణాలేంటనే కోణంలో దర్యాప్తు చేస్తున్నట్లు సుబేదారి సీఐ రంజిత్‌‌‌‌కుమార్‌‌‌‌ తెలిపారు. నిత్యం రద్దీగా ఉండే ప్రధాన రహదారిపై ఈ ఘటన చోటుచేసుకోవడం స్థానికంగా చర్చనీయాంశమైంది. 

వినాయకచవితి అవ్వగానే తగ్గిన బంగారం ధరలు మళ్లీ రివర్స్ గేర్ వేశాయి. అంతర్జాతీయంగా చమురు మంటలు ఆర్థిక వ్యవస్థలకు సెగ పెడుతున్న వేళ వడ్డీ రేట్లు కూడా పెరిగిపోవటం బులియన్ మార్కెట్లను కుదిపేస్తోంది. చాలా మంది పెట్టుబడిదారులు బంగారం, వెండిపై బెట్ వేయటం కంటే డెట్ మార్కెట్లోని బాండ్స్ వైపు చూస్తున్నారు. దీంతో గోల్డ్ రేట్లు ఒక రోజు తగ్గుతూ మరోరోజు పెరుగుతూ ఒక స్పష్టత కోసం ఎదురుచూస్తున్నాయని నిపుణులు చెబుతున్నారు. ఈ క్రమంలో రిటైల్ షాపింగ్ చేయాలని ప్లాన్ చేసుకుంటున్న తెలుగు ప్రజలు ముందుగా తమ నగరాల్లోని అమ్మకపు రేట్లను పరిశీలించటం బెటర్. 

సెప్టెంబర్ 16న బంగారం రేట్లు పెరిగాయి. సెప్టెంబర్ 15 కంటే గ్రాముకు 24 క్యారెట్ల బంగారం రేటు దేశవ్యాప్తంగా రూ.27 పెరిగింది. దీంతో హైదరాబాద్, వరంగల్, నిజాంబాద్, ఖమ్మం, విజయవాడ, విశాఖపట్నం, తిరుపతి, కడప నగరాల్లో స్వచ్చమైన బంగారం రేటు రూ.15వేల 344గా కొనసాగుతోంది. ఈ నగరాల్లో 22 క్యారెట్ల బంగారం రేటు గ్రాముకు రూ.14వేల 065గా కొనసాగుతోంది. 

బుధవారం రోజున వెండి రేట్ల విషయానికి వస్తే.. సెప్టెంబర్ 16, 2026న దేశవ్యాప్తంగా స్థిరంగా కొనసాగుతున్నాయి. దీంతో రెండు తెలుగు రాష్ట్రాల్లోని ప్రధాన నగరాలైన హైదరాబాద్, వరంగల్, నిజాంబాద్, ఖమ్మం, విజయవాడ, విశాఖపట్నం, తిరుపతి, కడపలో కేజీ స్వచ్ఛమైన వెండి రేటు రూ.2లక్షల 50వేలుగా ఉంది. అంటే గ్రాము దాదాపు రూ.250 దగ్గర ఉంది.

వీపనగండ్ల, వెలుగు: వనపర్తి జిల్లా వీపనగండ్లలోని భీమా కాలువలో నాలుగేండ్లుగా పూడికతీత, జమ్మును తొలగించకపోవడంతో పొలాలకు సాగు నీళ్లు అందక రైతులు ఇబ్బంది పడుతున్నారు. దీంతో కాలువలో పేరుకుపోయిన బురద, మట్టి, జమ్మును తొలగించేందుకు గ్రామానికి చెందిన 40 మంది రైతులు స్వచ్ఛందంగా ముందు కొచ్చారు. తమ సొంత ఖర్చులతో పూడికతీత పనులు చేపట్టారు.

 రైతులు డబ్బులు సమకూర్చుకొని యంత్రాల సాయంతో భీమా కాలువలో పేరుకుపోయిన పూడిక తొలగిస్తున్నారు. నాలుగేండ్లుగా అధికారులు భీమా కాలువ వైపు కన్నెత్తి చూడడం లేదని వాపోయారు. అధికారులు స్పందించి సమస్యను పరిష్కరించాలని కోరారు. 

మంత్రి జూపల్లి కృష్ణారావు ప్రత్యేక చొరవ తీసుకొని శ్రీరంగాపూర్  రిజర్వాయర్  నుంచి భీమా కాలువకు సాగు నీటిని విడుదల చేయాలని రైతులు విజ్ఞప్తి చేశారు. రైతులు జొల్లు పెద్దబాబు, పెద్ద వెంకటరెడ్డి, వెంకటేశ్వర్ రెడ్డి, కురువ రాంచందర్, కురువ రాముడు, లోకా రెడ్డి పాల్గొన్నారు.

హసన్ పర్తి, వెలుగు : కాకతీయ యూనివర్సిటీ సెంటర్ ఫర్ డిస్టెన్స్ ఎడ్యుకేషన్ ఆధ్వర్యంలో 2026–-27 విద్యా సంవత్సరానికి దూరవిద్య (ఓడిఎల్ ), ఆన్​లైన్​కోర్సుల్లో ప్రవేశాల గడువును పొడిగించినట్లు మంగళవారం డైరెక్టర్ బి.సురేశ్​లాల్ తెలిపారు. యూజీసీ-డిస్టెన్స్ ఎడ్యుకేషన్ బ్యూరో ఆదేశాల మేరకు సెప్టెంబర్ 15తో ముగియాల్సిన ప్రవేశాల గడువును వచ్చే నెల 13 వరకు పొడిగించినట్లు పేర్కొన్నారు. 

కేయూ దూరవిద్య ద్వారా సర్టిఫికెట్, డిప్లొమా, డిగ్రీ, పీజీ కోర్సుల్లో చేరాలనుకునే విద్యార్థులు ఈ అవకాశాన్ని సద్వినియోగం చేసుకోవాలని సూచించారు. ప్రవేశాలకు సంబంధించిన పూర్తి వివరాలను కేయూ అధికారిక వెబ్​సైట్​ను సంప్రదించాలని తెలిపారు.

• కార్మికుడికి తీవ్ర గాయాలు

కోల్‌‌బెల్ట్‌‌, వెలుగు: మంచిర్యాల జిల్లా మందమర్రి ఏరియాలోని కళ్యాణిఖని-5 సింగరేణి అండర్‌‌గ్రౌండ్‌‌ బొగ్గు గనిలో పైకప్పు బండరాళ్లు, బొగ్గు పెళ్లలు కూలిన ఘటనలో ఎస్డీఎల్‌‌ కార్మికుడికి తీవ్ర గాయాలయ్యాయి. ప్రమాదాన్ని పసిగట్టిన కార్మికుడు యంత్రం నుంచి దూకి తృటిలో ప్రాణాలతో బయటపడ్డాడు. మంగళవారం తెల్లవారుజామున 1.30 గంటల ప్రాంతంలో నైట్‌‌ షిఫ్ట్‌‌ విధుల్లో భాగంగా గనిలోని 3 సీమ్‌‌, 14, 14.5 లెవల్‌‌ వద్ద ఉన్న నాన్‌‌ వర్కింగ్‌‌ ప్లేస్‌‌లో ఎస్డీఎల్‌‌ ఆపరేటర్‌‌ కస్తూరి శంకర్‌‌ ఎస్డీఎల్‌‌ యంత్రంతో బొగ్గు వెలికితీసే పనులు చేపట్టాడు.

 ఒక్కసారిగా పైకప్పు బండరాళ్లు, బొగ్గు పెళ్లలు పెద్ద ఎత్తున ఎస్డీఎల్‌‌ యంత్రంపై కూలాయి. ప్రమాదాన్ని పసిగట్టిన శంకర్‌‌ వెంటనే యంత్రం నుంచి దూకి బయటకు రావడంతో తృటిలో ప్రమాదం నుంచి తప్పించుకున్నాడు. ఈ ఘటనలో ఆయన మెడ, వెన్నుముక భాగంలో ఫ్రాక్చర్‌‌ కాగా, శరీరంలోని పలు చోట్ల గాయాలయ్యాయి. 

బొగ్గు పెళ్లలు పెద్ద ఎత్తున పడటంతో ఎస్డీఎల్‌‌ యంత్రం, కెనోపీ పూర్తిగా ధ్వంసమైనట్లు సమాచారం. ప్రమాదంలో గాయపడిన శంకర్‌‌ను వెంటనే రామకృష్ణాపూర్‌‌ సింగరేణి ఏరియా ఆస్పత్రికి తరలించి చికిత్స అందించారు. మెరుగైన వైద్యం కోసం మంగళవారం కరీంనగర్‌‌కు తరలించారు. 

సింగరేణి కాలరీస్‌‌ వర్కర్స్‌‌ యూనియన్‌‌ రాష్ట్ర అధ్యక్షుడు వాసిరెడ్డి సీతారామయ్య, సీఐటీయూ అధ్యక్షుడు ఎస్‌‌.వెంకటస్వామి పరామర్శించారు. పనిస్థలాల్లో రక్షణ చర్యలు చేపట్టడంలో సింగరేణి యాజమాన్యం నిర్లక్ష్యంగా వ్యవహరిస్తోందని కార్మిక సంఘాల నేతలు ఆరోపించారు.
 

టేకులపల్లి, వెలుగు: భద్రాద్రికొత్తగూడెం జిల్లా టేకులపల్లి మండలంలో కాపర్‌‌‌‌ వైర్ల చోరీకి పాల్పడుతున్న ముగ్గురిని పోలీసులు అరెస్టు చేశారు. మంగళవారం పీఎస్​లో ఏర్పాటు చేసిన ప్రెస్​మీట్​లో ఇల్లందు డీఎస్పీ వెంకన్నబాబు వివరాలు వెల్లడించారు. సమ్మక్క-సారక్క గద్దెల వద్ద వాహన తనిఖీలు నిర్వహిస్తుండగా, పోలీసులను చూసి ఆటోలో పారిపోయేందుకు యత్నించిన ముగ్గురిని పట్టుకుని విచారించగా చోరీల విషయం వెలుగులోకి వచ్చింది. 

చుంచుపల్లి మండలం పెనగడపకు చెందిన పల్లపు వెంకటేశ్, మణుగూరుకు చెందిన రౌతు రమేశ్, కొత్తగూడెం రామవరానికి చెందిన వేముల సంతోష్‌‌‌‌ కలిసి టేకులపల్లి, కొత్తగూడెం ప్రాంతాల్లో విద్యుత్‌‌‌‌ ట్రాన్స్‌‌‌‌ఫార్మర్లను ధ్వంసం చేసి కాపర్‌‌‌‌ వైర్లు చోరీ చేసినట్లు పోలీసులు తెలిపారు. చోరీ చేసిన 178.5 కిలోల కాపర్‌‌‌‌ వైర్లను పాల్వంచలోని స్క్రాప్‌‌‌‌ దుకాణంలో రూ.3.57 లక్షలకు విక్రయించినట్లు నిందితులు అంగీకరించారని డీఎస్పీ తెలిపారు. వారి నుంచి ఆటోను స్వాధీనం చేసుకున్నట్లు చెప్పారు. నిందితులను పట్టుకున్న సీఐ బత్తుల సత్యనారాయణ, ఎస్సై కేతిరుపతి, సిబ్బందిని డీఎస్పీ అభినందించారు.

స్టేషన్​ఘన్​పూర్, వెలుగు​: ఆర్థిక ఇబ్బందులు ఉన్నప్పటికీ పేద ప్రజల సంక్షేమానికి తెలంగాణ ప్రభుత్వం పెద్దపీట వేస్తోందని స్టేషన్‌‌‌‌ఘన్‌‌‌‌పూర్ ఎమ్మెల్యే కడియం శ్రీహరి అన్నారు. మంగళవారం జఫర్‌‌‌‌గఢ్, చిల్పూర్ మండల కేంద్రాల్లో నిర్వహించిన కల్యాణలక్ష్మి, షాదీ ముబారక్, సీఎంఆర్‌‌‌‌ఎఫ్ చెక్కుల పంపిణీ కార్యక్రమాల్లో ఆయన పాల్గొన్నారు. రెండు మండలాల్లో 74 మంది కల్యాణలక్ష్మి లబ్ధిదారులకు రూ.76,08,584, 59 మంది సీఎంఆర్‌‌‌‌ఎఫ్ లబ్ధిదారులకు రూ.22,73,500 విలువైన చెక్కులను పంపిణీ చేశారు. 

ఈ సందర్భంగా ఎమ్మెల్యే మాట్లాడుతూ దేవాదుల, మల్లన్నగండి రిజర్వాయర్ల ద్వారా 6ఎల్, 7ఎల్ కాలువలను వచ్చే వర్షాకాలం నాటికి పూర్తి చేసి ప్రతి గ్రామానికి గోదావరి జలాలు అందిస్తామన్నారు. చిల్పూర్‌‌‌‌లో నూతన మండల కార్యాలయాల నిర్మాణానికి త్వరలో శంకుస్థాపన చేయడంతో పాటు బుగులు వేంకటేశ్వరస్వామి ఆలయాన్ని అభివృద్ధి చేస్తామని వెల్లడించారు.

భద్రాచలం, వెలుగు: రూ.350 కోట్లతో చేపడుతున్న అభివృద్ధి పనులపై సీతారామచంద్రస్వామి దేవస్థానం వైదిక కమిటీ అభ్యంతరాలు వ్యక్తం చేసింది. ఈ నేపథ్యంలో మంగళవారం ఈవో దామోదర్‌‌‌‌రావు, ఆర్కిటెక్ట్‌‌‌‌, ఇంజనీర్లు పనులను పరిశీలించారు. దక్షిణం వైపు భూ స్పర్శ కోసం మట్టితో నింపిన తర్వాతే ఉపాలయాల నిర్మాణాలు చేపట్టాలని వైదిక కమిటీ సూచించింది. ఆగమశాస్త్రానికి విరుద్ధంగా పనులు జరుగుతున్నాయని ఆర్కిటెక్ట్‌‌‌‌కు వివరించింది. 

గర్భగుడికి ఇరువైపులా లక్ష్మీతాయారు, ఆండాళ్లమ్మ ఆలయాలు, నిత్యకల్యాణ మండపాన్ని రెండో ప్రాకారంలో నిర్మించాలని కోరింది. ఈ అంశాలను కమిషనర్‌‌‌‌ దృష్టికి తీసుకెళ్తామని ఆర్కిటెక్ట్‌‌‌‌ హామీ ఇచ్చారు. కమిషనర్‌‌‌‌తో చర్చించి నివేదిక అందించేలా చొరవ తీసుకోవాలని ఈవోను వైదిక కమిటీ కోరింది. 

రామ్ కార్తీక్, అమ్ము అభిరామి, వైదిక సెంజాలియా, అంకిత్ కొయ్య లీడ్ రోల్స్‌‌లో వాచస్పతి రూపొందించిన  చిత్రం ‘మిస్సింగ్ మేఘన’.  పంచుమర్తి నరేష్ బాబు నిర్మించారు. సెప్టెంబర్  18న సినిమా విడుదల  కానుంది.

మంగళవారం ప్రీ రిలీజ్ ఈవెంట్ నిర్వహించారు.  అతిథులుగా  హాజరైన నిర్మాతలు దామోదర ప్రసాద్, బెక్కెం వేణుగోపాల్ మాట్లాడుతూ..  ఎంగేజింగ్‌‌ కంటెంట్ ఉన్న  ఇలాంటి చిన్న చిత్రాలు  మంచి విజయం సాధించాలని కోరారు.  దర్శకుడు వాచస్పతి, హీరోలు రామ్ కార్తీక్, అంకిత్ కొయ్య, నటుడు గోపరాజు రమణ, సంగీత దర్శకుడు ఆర్.ఆర్. ధృవన్ తమ  సినిమాపై నమ్మకం వ్యక్తం చేశారు.  ప్రేక్షకులు తమ చిత్రాన్ని  థియేటర్లలో చూసి ఆదరించాలని కోరారు.
 

రాగ్ మయూర్ హీరోగా ‘డిజే టిల్లు’  ఫేమ్  విమల్ కృష్ణ తెరకెక్కించిన చిత్రం ‘అనుమాన పక్షి’.  మెరీన్ హీరోయిన్‌‌గా నటించగా, రాశి, ప్రిన్స్ సెసిల్, అనన్య, చరిత్ కీలకపాత్రలు పోషించారు.  రాజీవ్ చిలకా, రాజేష్ జగతియాని, హిరాచంద్ దండ్ నిర్మించారు. తాజాగా ఈ మూవీ ట్రైలర్‌‌‌‌ను  హీరో సిద్ధు జొన్నలగడ్డ రిలీజ్ చేసి టీమ్‌‌కు ఆల్ ద బెస్ట్ చెప్పాడు.

ప్రతి విషయాన్నీ అతిగా ఆలోచించే సన్నీ పాత్రలో రాగ్ మయూర్ కనిపించాడు.  కశ్మీర్‌‌లో ఓ అమ్మాయితో ప్రేమలో పడిన అతడిని ఓ పోలీస్ అధికారి ఎందుకు వెంటాడుతున్నాడనేది కథలో ఆసక్తికర అంశంగా ట్రైలర్‌‌‌‌లో చూపించారు.  రాగ్ మయూర్ కామిక్ టైమింగ్, మెరిన్ ఫిలిప్‌‌తో కెమిస్ట్రీ   హైలైట్‌‌గా నిలిచాయి.  శ్రీచరణ్ పాకాల సంగీతం ఆకట్టుకుంటోంది. సెప్టెంబర్ 18న  సినిమా విడుదల  కానుంది.

జనగామ, వెలుగు: కేంద్ర ప్రభుత్వ పథకాలను జిల్లాలో సమర్థంగా అమలు చేసేందుకు ప్రతిపాదనలు సిద్ధం చేయాలని దిశ కమిటీ చైర్‌‌‌‌పర్సన్‌‌‌‌, వరంగల్ ఎంపీ కడియం కావ్య అధికారులను ఆదేశించారు. మంగళవారం జనగామ కలెక్టరేట్‌‌‌‌లో జరిగిన దిశ కమిటీ సమావేశంలో పథకాల అమలుపై సమీక్షించారు. అర్హులైన ప్రతి లబ్ధిదారుడికి సంక్షేమ, అభివృద్ధి పథకాలు సకాలంలో అందేలా చర్యలు తీసుకోవాలని సూచించారు. పీఎం శ్రీ, మోడల్‌‌‌‌, సోషల్‌‌‌‌ వెల్ఫేర్‌‌‌‌, జడ్పీ పాఠశాలల్లో మౌలిక వసతుల కోసం మంజూరైన 84 పనుల్లో 74 పురోగతిలో ఉన్నాయని తెలిపారు. 

అంగన్‌‌‌‌వాడీ కేంద్రాలకు సొంత భవనాల నిర్మాణాన్ని వేగవంతం చేయాలని ఆదేశించారు. ఎంపీ ల్యాడ్స్‌‌‌‌ పనులు మూడు నెలల్లో ప్రారంభం కాకపోతే రద్దు చేయాలని, నిషేధిత పారక్వాట్‌‌‌‌ గడ్డి మందు విక్రయాలపై కఠిన చర్యలు తీసుకోవాలని స్పష్టం చేశారు. విద్యార్థుల్లో మానసిక వైకల్యం, రక్తహీనతను గుర్తించి నివారించేందుకు ప్రత్యేక చర్యలు చేపట్టాలని సూచించారు. జాతీయ రహదారి-163పై మిస్సింగ్‌‌‌‌ సర్వీస్‌‌‌‌ రోడ్ల నిర్మాణాన్ని త్వరగా పూర్తి చేయాలని, జిల్లాలో మాదకద్రవ్యాల వినియోగాన్ని అరికట్టాలని ఆదేశించారు. సమావేశంలో ఎమ్మెల్యే కడియం శ్రీహరి, కలెక్టర్‌‌‌‌ సందీప్‌‌‌‌కుమార్‌‌‌‌ ఝా, డీసీపీ రాజమహేంద్ర నాయక్‌‌‌‌, అడిషనల్​ కలెక్టర్‌‌‌‌ బెన్‌‌‌‌ షాలోమ్‌‌‌‌, మున్సిపల్​ చైర్మన్లు కడకంచి బాలమణి, తాటికొండ వినయ్​ కుమార్,  ఆర్డీవోలు, ఇతర ఆఫీసర్లు తదితరులు పాల్గొన్నారు. 

 దర్శకుడు చంద్ర సిద్ధార్థ్ తెరకెక్కించిన తాజా చిత్రం  ‘ఈ పాట కోరినవారు నెమలిపాలెం నుండి రమ, జ్యోత్స్న, నందు, మురళి, కబీర్, ఢోల్ రవి మొదలగువారు’.   తెలుగు సినిమా చరిత్రలో అత్యంత పొడవైన టైటిల్‌‌తో రూపొందిన ఈ చిత్రం సెప్టెంబర్ 18న ప్రేక్షకుల ముందుకు రానుంది. దర్శకుడు అనిల్ రావిపూడి చేతుల మీదుగా సినిమా టీజర్ విడుదలైంది.

సంగీతం, ధ్వని, మానవ మెదడు, జ్ఞాపకాలు, గిల్ట్ వంటి అంశాలతో  మిస్టికల్ మ్యూజికల్ థ్రిల్లర్‌‌గా ఈ చిత్రం తెరకెక్కింది. టీజర్‌‌లోని ఆసక్తికరమైన సంభాషణలు, విభిన్నమైన పాత్రలు సినిమాపై క్యూరియాసిటీ పెంచుతున్నాయి.  హర్ష హీరోగా, అమైరా గోస్వామి, సుజనా రెడ్డి హీరో హీరోయిన్స్‌‌గా  పరిచయమవుతున్న ఈ చిత్రంలో ఇనాయా సుల్తానా, రవివర్మ, అశోక్ వర్ధన్, రేఖా నిరోషా కీలక పాత్రల్లో నటించారు. మదన్  కథను  అందించగా, నిర్మాత, స్క్రీన్‌‌ప్లే, దర్శకత్వ బాధ్యతలను చంద్ర సిద్ధార్థ్ నిర్వహించారు.
 

నల్లబెల్లి, వెలుగు: వరంగల్​ జిల్లా నల్లబెల్లి మండల కేంద్రంలోని గ్రోమోర్‌‌‌‌ సెంటర్‌‌‌‌లో నకిలీ కోరమండల్‌‌‌‌ పొటాష్‌‌‌‌ విక్రయిస్తున్న విషయం వెలుగులోకి వచ్చింది. కొండాయిలపల్లికి చెందిన రైతు కొనుకటి రాజు యాప్‌‌‌‌ ద్వారా మూడు పొటాష్‌‌‌‌ బస్తాలు కొనుగోలు చేసి, పంట పొలంలో చల్లేందుకు బస్తా విప్పి చూడగా, అందులో 20 శాతం రసాయనం, మిగతా అంతా మట్టి ఉన్నట్లు గుర్తించారు. 

సమాచారం అందుకున్న వ్యవసాయ శాఖ అధికారులు మంగళవారం గ్రోమోర్‌‌‌‌ సెంటర్‌‌‌‌ను తనిఖీ చేసి, పొటాష్‌‌‌‌ బస్తాల నమూనాలను సేకరించి ల్యాబ్‌‌‌‌ కు పంపినట్లు ఏవో రజిత తెలిపారు. యూరియా సరఫరాలో లింకులు పెడుతున్న షాపులపై కూడా చర్యలు తీసుకుంటామని ఆమె చెప్పారు.  

కామెడీ హీరోగా, కమెడియన్‌‌గా తనకంటూ ఓ ప్రత్యేక  గుర్తింపును అందుకున్న సంపూర్ణేష్‌‌ బాబు.. ఇప్పుడు పూర్తిస్థాయి సీరియస్‌‌ క్యారెక్టర్‌‌‌‌తో సర్‌‌‌‌ప్రైజ్ చేయబోతున్నాడు. శ్రీకాంత్ ఓదెల తెరకెక్కించిన ‘ది ప్యారడైజ్‌‌’ చిత్రంలో హీరో నానికి స్నేహితుడిగా ‘బిర్యానీ’ అనే పాత్రలో కనిపించబోతున్నాడు.  సుధాకర్ చెరుకూరి నిర్మించిన ఈ చిత్రం  సెప్టెంబర్ 24న విడుదల కాబోతోంది.  ఈ సందర్భంగా సంపూర్ణేష్‌‌ బాబు ఇలా ముచ్చటించాడు.  

‘‘డైరెక్టర్‌‌‌‌ శ్రీకాంత్ గారి నుంచి కాల్ వస్తే వెళ్లి కలిశా.  ‘ది ప్యారడైజ్‌‌’ సినిమా గురించి,  అందులోని బిర్యానీ క్యారెక్టర్‌‌‌‌ గురించి చెప్పగానే చాలా కొత్తగా అనిపించింది. ఇప్పటివరకు అలాంటి క్యారెక్టర్‌‌‌‌ చేయలేదు. నాని గారికి బెస్ట్ ఫ్రెండ్‌‌గా ఫుల్‌‌ సీరియస్‌‌గా ఉండే క్యారెక్టర్‌‌‌‌.  సినిమా అంతా కనిపిస్తాను.  గతంలో నేను చేసిన పాత్రలకు పూర్తి భిన్నంగా ఉంటుంది. మూడేళ్ల క్రితం ఇలాంటి క్యారెక్టర్‌‌‌‌ వచ్చి ఉంటే నా కెరీర్‌‌‌‌లో జరిగిన కొన్ని మిస్టేక్స్‌‌ జరిగేవి కావు. ఈ మూవీ షూటింగ్ పూర్తయ్యేవరకు మరో సినిమా చేయకూడదని ఫిక్స్‌‌ అయ్యా. కొన్ని అవకాశాలు వచ్చినా వదులుకున్నా.  ఈ పాత్ర కోసం డైరెక్టర్ ఏంచెప్తే అది ఫాలో అయ్యా. బరువు తగ్గడంతో పాటు జుట్టు, గడ్డం పెంచా.  

నాపై దర్శకనిర్మాతలు ఉంచిన  నమ్మకాన్ని నిలబెట్టాలని నా వంతు కృషి చేశా. షూటింగ్‌‌లో నాని గారు నాకు చాలా కంఫర్ట్ ఇచ్చారు.  ఇన్నేసి రోజులు ఓ సినిమాకు పనిచేయడం నాకిదే ఫస్ట్ టైమ్. నా కెరీర్‌‌‌‌లో ఎక్కువ రెమ్యూనరేషన్‌‌ అందుకున్నది కూడా ఈ సినిమాకే.  నిర్మాత సుధాకర్ గారు  చాలా గ్రాండ్ గా నిర్మించారు. ప్యారడైజ్ బిర్యానీ ఎంత రుచిగా ఉంటుందో ఈ సినిమా అంత అద్భుతంగా ఉంటుంది. అంతకంటే అద్భుతంగా నేను పోషించిన పాత్ర ఉంటుంది. అది ఎలా అనేది థియేటర్స్‌‌లోనే చూడాలి.  నా పాత్ర మాత్రమే కాదు సినిమాలోని అన్ని  క్యారెక్టర్స్‌ కు ఇంపార్టెన్స్‌‌ ఉంటుంది.  యాక్షన్‌‌, ఎమోషన్స్‌‌ అద్భుతంగా ఉంటాయి.  ఓ నటుడిగా  నాని గారి డెడికేషన్‌‌ అద్భుతం. ఇక గతంలో మోహన్ బాబు గారి బ్యానర్‌‌‌‌లో పనిచేసిన నేను, ఆయనతో కలిసి నటించాలని ఎప్పటినుంచో ఎదురుచూస్తున్నా. ఈ సినిమాతో ఆ కల నెరవేరింది’’.   

• 18న వేలాది మందితో నిరసనకు దిగుతాం
•     దక్షిణ జనతా పార్టీ జాతీయ కోఆర్డినేటర్ గాలి వినోద్ కుమార్

ముషీరాబాద్‌‌, వెలుగు: ‘కల్పిత నాయకుడు’ అనే టైటిల్‌‌తో హమారా ప్రసాద్‌‌ రాసిన పుస్తకాన్ని ఈ నెల 18న విడుదల చేస్తే వేలాది మందితో అడ్డుకుంటామని దక్షిణ జనతా పార్టీ జాతీయ కోఆర్డినేటర్‌‌ ప్రొఫెసర్‌‌ డాక్టర్‌‌ గాలి వినోద్‌‌కుమార్‌‌ హెచ్చరించారు. 

డాక్టర్‌‌ బీఆర్‌‌ అంబేద్కర్‌‌ను ‘కల్పిత నాయకుడు’ అంటూ రాసిన పుస్తకానికి వ్యతిరేకంగా మంగళవారం ఇందిరాపార్క్‌‌ ధర్నాచౌక్‌‌లో నిరసన చేపట్టారు. ఈ సందర్భంగా వినోద్‌‌కుమార్‌‌ మాట్లాడుతూ.. ప్రజలందరినీ రాజ్యాంగం ద్వారా ఏకం చేసిన డాక్టర్‌‌ బీఆర్‌‌ అంబేద్కర్‌‌ హిందూ వ్యతిరేకి కాదని అన్నారు. 

హిందూ మతంలోని కుల వ్యవస్థ, అంటరానితనం, వర్ణ వివక్షకు వ్యతిరేకంగా ఆయన పోరాడారని తెలిపారు. డాక్టర్‌‌ బీఆర్‌‌ అంబేద్కర్‌‌ రాజ్యాంగ చరిత్రను, రాజ్యాంగ నిర్మాతల అభిప్రాయాలకు భిన్నంగా ‘కల్పిత నాయకుడు’ అంటూ పుస్తకం రాయడాన్ని తీవ్రంగా వ్యతిరేకిస్తున్నామని చెప్పారు. ఆ పుస్తకాన్ని ప్రతి దళిత మహిళ పాత చెప్పులతో సత్కరించాలని పిలుపునిచ్చారు.

టైటిల్‌‌ మార్చకుంటే తీవ్ర పరిణామాలు..

ఈ నెల 18లోగా హమారా ప్రసాద్‌‌ పుస్తక టైటిల్‌‌ను మార్చుకుంటే మంచిదని, లేకుంటే తీవ్ర పరిణామాలు తప్పవని గాలి వినోద్‌‌కుమార్‌‌ హెచ్చరించారు. సీఎం రేవంత్‌‌రెడ్డి ఈ పుస్తకం విషయంలో బాధ్యత తీసుకుని, దాన్ని నిషేధించడంతో పాటు హమారా ప్రసాద్‌‌ను వెంటనే అరెస్టు చేయాలని డిమాండ్‌‌ చేశారు. ఈ కార్యక్రమంలో ప్రసాద్‌‌, శ్రీనివాస్‌‌, డీబీఎస్‌‌ శంకర్‌‌, స్కైలాబ్‌‌ బాబు తదితరులు పాల్గొన్నారు.
 

అమెరికాలోని లాస్ ఏంజిల్స్‌లో ఘోర విమాన ప్రమాదం జరిగింది. శాన్ ఫెర్నాండో వ్యాలీలో వార్తా కవరేజ్ కి వెళ్లిన  ఓ హెలికాప్టర్ కుప్పకూలింది. అంతకుముందు అదే ప్రాంతంలో కారు, మెట్రో బస్సు ఢీకొన్న ప్రమాదాన్ని కవర్ చేస్తున్న సమయంలో ఈ ఘటన చోటుచేసుకుంది. చాట్స్‌వర్త్‌లోని ఎన్ మేసన్ అవెన్యూ 9100 బ్లాక్ సమీపంలోని పార్కింగ్ ప్రాంతంలో హెలికాప్టర్ కూలిపోయింది. కారు, బస్సు ప్రమాదంలో ఇద్దరుమృతిచెందగా మరో ఆరుగురు గాయపడ్డారు. ప్రమాద స్థలంలో అత్యవసర సిబ్బంది సహాయక చర్యలు చేపడుతున్న సమయంలోనే హెలికాప్టర్  కూలిపోయింది.

హెలికాప్టర్‌లోని కెమెరా ఫుటేజ్‌ ప్రకారం.. కూలిపోవడానికి కొద్దిసేపటి ముందు విమానం అదుపు తప్పి రెండు కమర్షియల్ బిల్డింగుల మధ్య, కార్లు, షిప్పింగ్ కంటైనర్ల పై హెలికాప్టర్ కూలిపోయింది. దీంతో పెద్ద ఎత్తున భారీగా మంటలు చెలరేగాయి.

లాస్ ఏంజిల్స్ అగ్నిమాపక శాఖ తెలిపిన వివరాల ప్రకారం.. ఈ ఘటనలో ఒకరు మృతి చెందారు. ప్రమాద సమయంలో హెలికాప్టర్‌లో ఎంతమంది ఉన్నారనే విషయం వెంటనే స్పష్టంగా తెలియలేదు. శిథిలాల్లో మరెవరైనా చిక్కుకున్నారా అనే విషయాన్ని తెలుసుకునేందుకు అగ్నిమాపక సిబ్బంది గాలింపు చర్యలు చేపట్టింది. 

ఈ హెలికాప్టర్ ఓ టెలివిజన్ స్టేషన్‌కు చెందినదని స్థానిక మీడియా పేర్కొన్నప్పటికీ.. ఏ స్టేషన్‌కు చెందినదో అధికారికంగా నిర్ధారించలేదు. ప్రమాదంపై లాస్ ఏంజిల్స్ పోలీసులు దర్యాప్తు చేస్తున్నారు. 

BREAKING: KNBC helicopter crashes while covering metro bus crash in Los Angeles, California. pic.twitter.com/TgzkkVTBHx

— AZ Intel (@AZ_Intel_) September 16, 2026

యాదగిరిగుట్ట, వెలుగు: యాదగిరిగుట్ట లక్ష్మీనరసింహస్వామి దేవస్థానంలో స్వామివారి జన్మనక్షత్రమైన స్వాతి నక్షత్రాన్ని పురస్కరించుకుని మంగళవారం అర్చకులు ప్రత్యేక పూజా కార్యక్రమాలు వైభవంగా నిర్వహించారు. 

ఉదయం ప్రధానాలయ ముఖ మంటపంలో ఆలయ అర్చకులు వేద మంత్రోచ్ఛారణల నడుమ స్వామివారికి శాస్త్రోక్తంగా అష్టోత్తర శతఘటాభిషేకం నిర్వహించారు. అనంతరం గిరిప్రదక్షిణ కార్యక్రమాన్ని ప్రారంభించగా, ప్రభుత్వ విప్, ఆలేరు ఎమ్మెల్యే బీర్ల అయిలయ్య దంపతులు పాల్గొన్నారు. 

కొండకింద ఉన్న వైకుంఠ ద్వారం వద్ద ఆలయ ఈవో భవానీ శంకర్ తో కలిసి ఎమ్మెల్యే ప్రత్యేక పూజలు నిర్వహించి గిరిప్రదక్షిణ ప్రారంభించారు. వేలాది సంఖ్యలో తరలివచ్చిన భక్తులు ఉత్సాహంగా అడుగులు వేస్తూ నరసింహ నామస్మరణతో గిరిప్రదక్షిణ పూర్తి చేశారు. గిరిప్రదక్షిణ అనంతరం విప్ బీర్ల అయిలయ్య భక్తులతో కలిసి స్వామివారిని దర్శించుకుని ప్రత్యేక పూజల్లో పాల్గొన్నారు. 
 
 

న్యూఢిల్లీ: సెంట్రల్ రిజర్వ్  పోలీస్ ఫోర్స్ (సీఆర్‌‌‌‌పీఎఫ్‌‌)కు చెందిన కోబ్రా ఐజీగా సీనియర్ ఐపీఎస్ ఆఫీసర్ సంజుక్త పరాశర్ నియమితులయ్యారు. ఈమేరకు సీఆర్‌‌పీఎఫ్​ ప్రధాన కార్యాలయం ఉత్తర్వులను జారీ చేసింది. దీంతో ఈ పదవిని చేపట్టనున్న తొలి మహిళా ఆఫీసర్‌‌‌‌గా సంజుక్త చరిత్ర సృష్టించనున్నారు. ఇప్పటివరకు ఈ పదవిలో ఉన్న 1996 బ్యాచ్ ఐపీఎస్ అధికారి దనేశ్ రాణా స్థానంలో ఆమె బాధ్యతలు స్వీకరిస్తారు. పది బెటాలియన్ల కోబ్రా యూనిట్‌‌కు ఒక మహిళా ఆఫీసర్ నేతృత్వం వహించడం ఇదే మొదటిసారి అని సీఆర్‌‌‌‌పీఎఫ్ సీనియర్ అధికారి ఒకరు తెలిపారు. సంజుక్త పరాశర్ అస్సాం–మేఘాలయ కేడర్‌‌‌‌కు చెందిన 2006 బ్యాచ్ అధికారి.

నేషనల్ పేమెంట్స్ కార్పొరేషన్ ఆఫ్ ఇండియా (NPCI) ప్రకటించిన కొత్త మర్చంట్ డిస్కౌంట్ రేట్ విధానంలో సామాన్యులకు ఊరటనిచ్చేలా కొన్ని కీలక మినహాయింపులను కల్పించింది. ఇందులో భాగంగా టెలికాం, రైల్వే, పెట్రోల్, డీజిల్, గ్యాస్, ఇన్సూరెన్స్ పేమెంట్లపై భారీ MDR చార్జీల నుంచి మినహాయింపును ప్రకటించింది.

ఈ కేటగిరీ చెల్లింపులపై ఒక ఫ్లాట్ ఫీజును నిర్ణయించారు. ఈ ప్రత్యేక కేటగిరీల్లో జరిగే లావాదేవీలపై పేమెంట్ ఎంత ఉన్నా సరే దానితో సంబంధం లేకుండా కేవలం రూ. 5 మాత్రమే ఫ్లాట్ ఫీజుగా వసూలు చేయనున్నారు. అలాగే అత్యధిక విలువతో కూడిన స్టాక్ మార్కెట్ లావాదేవీలకు మాత్రం MDRను అత్యంత కనిష్టంగా 0.02 శాతానికే పరిమితం చేశారు.

ఈ మినహాయింపుల వెనుక ప్రధాన ఉద్దేశ్యం మధ్యతరగతి, పేద వర్గాలపై ఆర్థిక భారం పడకుండా రక్షణ కల్పించడమేనట. ఎందుకంటే టెలికాం రీచార్జ్‌లు, రైలు టికెట్ల బుకింగ్, వాహనాలకు పెట్రోల్, డీజిల్ కొనుగోలు చేయడం వంటివి సామాన్యులు రోజువారీ జీవితంలో అత్యధికంగా ఉపయోగించే సేవలు కాబట్టి. ఒకవేళ వీటికి సాధారణ MDR వర్తిస్తే సామాన్యుల జేబులకు చిల్లు పడే అవకాశం ఉండేది. ఫ్లాట్ రూ.5 ఫీజు వల్ల ఈ నిత్యావసర సేవలు అదనపు భారాలు లేకుండా సాగిపోతాయి. 

అయితే ఈ మినహాయింపులు ఉన్నప్పటికీ వ్యాపారులు ఈ మొత్తాన్ని నేరుగా కస్టమర్లపైకి నెట్టివేయకుండా NPCI కఠినమైన నిబంధనలు అమలు చేస్తోంది. ఏ రంగంలోనైనా సరే కస్టమర్ల నుంచి అదనంగా వసూలు చేయడానికి వీల్లేదని అక్వైరర్ బ్యాంకులను అంటే వ్యాపారి బిజినెస్ అకౌంట్ ఉన్న బ్యాంకులకు స్పష్టంగా ఆదేశించింది. దీని ద్వారా ప్రభుత్వం డిజిటల్ ఎకానమీని ప్రోత్సహిస్తూనే.. మరోవైపు కస్టమర్ల ప్రయోజనాలకు ప్రాధాన్యతనిచ్చింది. 

హైదరాబాద్‌లోని ఖైరతాబాద్ మహా గణపతి వద్ద భక్తుల రద్దీ కొనసాగుతోంది. గణేష్ ఉత్సవాల్లో భాగంగా మూడో రోజు ప్రత్యేక పూజా కార్యక్రమాలు నిర్వహిస్తున్నారు. ఇందులో భాగంగా ఆర్యవైశ్య సంఘం ఆధ్వర్యంలో ప్రత్యేక హోమయాగం నిర్వహించారు. ఖైరతాబాద్ గణేష్ విగ్రహం ఎదుట ఏకంగా 102 హోమగుండాలను ఏర్పాటు చేసి భక్తిశ్రద్ధలతో యాగ కార్యక్రమాన్ని చేపట్టారు.

ఈ ఏడాది ఖైరతాబాద్ గణేష్ 69 అడుగుల ఎత్తులో పంచముఖ సంకటహర మహా గణపతి రూపంలో భక్తులకు దర్శనమిస్తున్నాడు. ప్రధాన గణేష్ విగ్రహంతో పాటు కాళీకామాత, సోమనాథ్ జ్యోతిర్లింగం, విశ్వకర్మ, విష్ణుమూర్తి విగ్రహాలను కూడా ఏర్పాటు చేశారు. దీంతో గణేష్‌ను దర్శించుకునేందుకు భక్తులు పెద్ద సంఖ్యలో తరలివస్తున్నారు.

బుధవారం కావడంతో సాయంత్రం సమయానికి భక్తుల రద్దీ మరింత పెరిగే అవకాశం ఉందని అధికారులు అంచనా వేస్తున్నారు. ఈరోజు దాదాపు లక్ష మంది భక్తులు ఖైరతాబాద్ గణనాథుడిని దర్శించుకునే అవకాశం ఉందని భావిస్తున్నారు.

భక్తులకు ఎలాంటి ఇబ్బందులు కలగకుండా ప్రభుత్వం, పోలీసు శాఖ ఆధ్వర్యంలో విస్తృత ఏర్పాట్లు చేశారు. భక్తుల రాకపోకలను క్రమబద్ధీకరించేందుకు నలువైపులా క్యూ లైన్లు ఏర్పాటు చేశారు. అవాంఛనీయ సంఘటనలకు తావులేకుండా భారీగా పోలీసు బందోబస్తు ఏర్పాటు చేయడంతో పాటు సీసీ కెమెరాల ద్వారా నిరంతరం పర్యవేక్షణ కొనసాగుతోంది.

భక్తుల రద్దీని దృష్టిలో ఉంచుకుని అధికారులు అప్రమత్తంగా వ్యవహరిస్తున్నారు. సాయంత్రం వేళ భక్తుల సంఖ్య మరింత పెరిగే అవకాశం ఉండటంతో ట్రాఫిక్, భద్రతా ఏర్పాట్లపై ప్రత్యేక దృష్టి సారిస్తున్నారు.

ఢాకా: బంగ్లాదేశ్‌‌ మాజీ ప్రధాని షేక్ హసీనా పార్టీకి చెందిన ఏడుగురు సీనియర్ నేతలకు అక్కడి కోర్టు మరణశిక్ష విధించింది. 2024 నాటి విద్యార్థి ఉద్యమం అణచివేత కేసులో భాగంగా జస్టిస్ నజ్రుల్ ఇస్లామ్ చౌదరి నేతృత్వంలోని ముగ్గురు సభ్యుల ట్రిబ్యునల్ మంగళవారం ఈ తీర్పును వెల్లడించింది.

 మరణశిక్ష పడిన వారిలో అవామీ లీగ్ మాజీ ప్రధాన కార్యదర్శి ఒబైదుల్ ఖాదర్, మాజీ మంత్రి మొహమ్మద్ అలీ అరాఫత్, ఏఎఫ్‌‌ఎం బహావుద్దీన్ నసీమ్, షేక్ ఫజ్లే షామ్స్ పరాశ్, మైనుల్ హొస్సేన్ ఖాన్ నిఖిల్, సద్దామ్ హుస్సేన్, షేక్ వలీ ఆసిఫ్ ఇనాన్ ఉన్నారు. మృతులు, గాయపడిన వారి కుటుంబాలకు నష్టపరిహారంగా ఐదుగురు దోషుల ఆస్తుల్లో సగం చెల్లించాలని కోర్టు ఆదేశించింది. 

హసీనా 15 ఏండ్ల పాలనకు ముగింపు పలికిన ఈ ఉద్యమ సమయంలో హత్యలు, ప్రజావ్యతిరేక నేరాలకు పాల్పడినట్టు వీరిపై అభియోగాలు రుజువయ్యాయి. హసీనా ప్రభుత్వ అణచివేత చర్యల వల్ల 2024 జులై, ఆగస్టు మధ్య కాలంలో సుమారు 1,400 మంది మరణించినట్టు ఐక్యరాజ్యసమితి వెల్లడించింది.

పంజాగుట్ట, వెలుగు: సెప్టెంబర్‌‌ 17ను తెలంగాణ విమోచన దినంగా తెలంగాణ ప్రభుత్వం అధికారికంగా నిర్వహించాలని వక్తలు డిమాండ్‌‌ చేశారు. అలయ్‌‌ బలాయ్‌‌ ఫౌండేషన్‌‌ ఆధ్వర్యంలో బండారు విజయలక్ష్మి అధ్యక్షతన మంగళవారం సోమాజిగూడ ప్రెస్‌‌క్లబ్‌‌లో రౌండ్‌‌టేబుల్‌‌ సమావేశం నిర్వహించారు. 

హర్యానా మాజీ గవర్నర్‌‌ బండారు దత్తాత్రేయ, మహారాష్ట్ర మాజీ గవర్నర్‌‌ సీహెచ్‌‌.విద్యాసాగర్‌‌రావు, ఎంపీ ఈటల రాజేందర్‌‌, ఎమ్మెల్సీలు కోదండరాం, అంజిరెడ్డి, ప్రేమ్‌‌సింగ్‌‌ రాథోడ్‌‌, సీనియర్​ జర్నలిస్ట్​ పాశం యాదగిరి, బీఎస్‌‌ రాములు, పాదూరి కరుణ పాల్గొన్నారు. సెప్టెంబర్‌‌ 17ను తెలంగాణ విమోచన దినంగా అధికారికంగా నిర్వహించాలని ఏకగ్రీవంగా తీర్మానించారు. ఈ సందర్భంగా బండారు దత్తాత్రేయ మాట్లాడుతూ.. సెప్టెంబర్‌‌ 17 తెలంగాణ చరిత్రలో అత్యంత కీలకమైన రోజన్నారు. 

సుమారు 13 నెలల పాటు రజాకార్ల అరాచకంతో తెలంగాణ ప్రజలు తీవ్ర ఇబ్బందులు ఎదుర్కొన్నారని తెలిపారు. అప్పటి కేంద్ర హోంమంత్రి సర్దార్‌‌ వల్లభభాయ్‌‌ పటేల్‌‌ నాయకత్వంలో భారత సైనిక బలగాలు చేపట్టిన చర్యలతో నిజాం పాలనకు ముగింపు పలికి తెలంగాణ ప్రాంతం భారత్​లో విలీనమైందని చెప్పారు. 

ఈ పరిణామంతో తెలంగాణ ప్రజలకు నిజాం పాలన నుంచి విముక్తి లభించిందన్నారు. సీహెచ్‌‌. విద్యాసాగర్‌‌రావు మాట్లాడుతూ.. తెలంగాణ విమోచన చరిత్రను భావితరాలకు తెలియజేయాల్సిన బాధ్యత ప్రతి ఒక్కరిపై ఉందన్నారు. కోదండరాం మాట్లాడుతూ.. సెప్టెంబర్‌‌ 17ను అధికారికంగా నిర్వహించడం ద్వారా తెలంగాణ చరిత్రను ప్రజలకు, యువతకు మరింత చేరువ చేయవచ్చని
 అభిప్రాయపడ్డారు.

ప్రణమ్ దేవరాజ్, సంజనా ఆనంద్ జంటగా శంకర్ రెడ్డి తెరకెక్కిస్తున్న చిత్రం ‘శ్రీరస్తు’. పెండ్లిమడుగు హరి కృష్ణ గౌడ్ నిర్మిస్తున్నారు.   తెలుగు, కన్నడ భాషల్లో ఏక కాలంలో రూపొందిస్తున్న ఈ మూవీ షూటింగ్ పూర్తయింది.  

ప్రస్తుతం  పోస్ట్ ప్రొడక్షన్ పనులు శరవేగంగా జరుగుతున్నాయి. కుటుంబ ప్రేక్షకులతో పాటు యువతను ఆకట్టుకునే కామెడీతో  తెరకెక్కిస్తున్నామని, త్వరలోనే మూవీ రిలీజ్ డేట్‌‌ను అనౌన్స్ చేస్తామని మేకర్స్ తెలియజేశారు.  సుమన్, దేవి ప్రసాద్, ఆమని, చైత్ర రాయ్, ప్రసాద్ బెహ్రా, రవి ప్రకాష్, రవి శివ తేజ ముఖ్య పాత్రల్లో నటిస్తున్నారు.  శేఖర్ చంద్ర సంగీతం అందిస్తున్నాడు.

వాషింగ్టన్: ఆర్టిఫిషియల్ ఇంటెలిజెన్స్(ఏఐ) రంగంలో ప్రముఖ రీసెర్చర్ల రాజీనామాల పరంపర కొనసాగుతోంది. ఈ దశాబ్దం చివరినాటికి ఏఐ కారణంగా మానవాళి అంతమయ్యే అవకాశం ఉందంటూ ఆంత్రోపిక్ మాజీ రీసెర్చర్ జాకోబ్ కాక్సన్ హెచ్చరించిన కొద్దిరోజులకే, మరో ఏఐ సేఫ్టీ రీసెర్చర్ ప్రముఖ ఏఐ ల్యాబ్ నుంచి బయటికి వచ్చి తీవ్ర హెచ్చరికలు చేశారు. 

ఏఐ మరింత అడ్వాన్స్‌‌డ్ స్టేజీకి వెళ్తే మానవాళికి వచ్చే ఐదేళ్లలోనే తీవ్ర ముప్పు తప్పదని తాజాగా గూగుల్ డీప్‌‌మైండ్ ఏజీఐ సేఫ్టీ టీమ్‌‌లో పనిచేసిన జోష్ ఎంగెల్స్ తేల్చిచెప్పారు. తన ఉద్యోగానికి రాజీనామా కూడా చేసినట్టు ప్రకటించారు. ఆంత్రోపిక్, ఓపెన్‌‌ ఏఐ నుంచి వచ్చిన ఆఫర్లను సైతం తిరస్కరించినట్టు ఆయన వెల్లడించారు. ఏఐ సేఫ్టీ చర్యల కోసం ఏర్పాటైన ఏఐ ఎవాల్యుయేషన్ ఆర్గనైజేషన్ ‘ఎంఈటీఆర్’లో చేరానని తెలిపారు. 

మనుషుల కన్నా తెలివిమీరిపోయి.. స్వంతంగా ఏఐ మోడల్స్‌‌ను సృష్టించగల ఆర్టిఫిషియల్ సూపర్‌‌‌‌ఇంటెలిజెన్స్‌‌(ఏఎస్ఐ)ను క్రియేట్ చేసేందుకు కంపెనీలు పోటీపడుతున్నాయని ఎంగెల్స్ ఆందోళన వ్యక్తం చేశారు. అడ్వాన్స్‌‌డ్ ఏఐకి సంబంధించిన సవాళ్లు తారస్థాయికి చేరినందుకే రాజీనామా నిర్ణయం తీసుకున్నట్లు చెప్పారు. ఈ మేరకు ‘ఎక్స్’ వేదికగా సుదీర్ఘ పోస్టు పెట్టారు. తాను మూడు వారాల క్రితం డీప్‌‌మైండ్‌‌ను వీడినట్లు పేర్కొన్నారు. 

‘‘రాబోయే ఐదేళ్లలో ఏఐ సిస్టమ్స్ మానవాళికి తీవ్రమైన హాని కలిగించే అవకాశం ఉందని నేను భావిస్తున్నా. ఏఐ సేఫ్టీ అనేది ప్రపంచంలోనే అత్యంత ముఖ్యమైన సమస్యగా మారే ప్రమాదం ఎక్కువగా ఉంది” అని ఆయన తెలిపారు. ప్రస్తుతం ఏఐ మోడళ్ల సృష్టి కంటే.. వాటి వల్ల సమస్యలు రాకుండా సేఫ్టీ కోసం చేపట్టాల్సిన చర్యల విషయంలో చాలా వెనకబడ్డామని జోష్ ఎంగెల్స్ చెప్పారు. సేఫ్టీ రీసెర్చ్ అందుకునేలా ఏఐ అభివృద్ధి తగినంత వేగంతో నెమ్మదించాలని ఆయన అభిప్రాయపడ్డారు.

భద్రాచలం, వెలుగు: ప్రజలకు మెరుగైన సేవలు అందించడమే లక్ష్యంగా అధికారులు పనిచేయాలని భద్రాద్రికొత్తగూడెం కలెక్టర్‌‌‌‌ అంకిత్‌‌‌‌ సూచించారు. మంగళవారం మన్యంలోని దుమ్ముగూడెం మండలంలో ఆయన పర్యటించారు. భూ రికార్డుల్లో స్పష్టత తీసుకురావాలని, ఇందిరమ్మ ఇండ్ల నిర్మాణాలను త్వరగా పూర్తి చేయాలని, యంగ్‌‌‌‌ ఇండియా పాఠశాల పనులను స్పీడప్​ చేయాలని ఆదేశించారు.

ముల్కనపల్లిలో కొనసాగుతున్న భూ రీ-సర్వేను సబ్‌‌‌‌ కలెక్టర్‌‌‌‌ మృణాల్‌‌‌‌ శ్రేష్ఠతో కలిసి పరిశీలించిన కలెక్టర్‌‌‌‌, భూ వివరాలు, ఎంజాయర్ల సంఖ్య, రికార్డులు, సర్వే పురోగతిపై ఆరా తీశారు. సరైన సమాచారం ఇవ్వలేకపోయిన ఆర్‌‌‌‌ఐపై అసంతృప్తి వ్యక్తం చేసి శాఖాపరమైన చర్యలకు ఆదేశించారు. ఇందిరమ్మ ఇళ్ల నిర్మాణాలపై సరైన సమాచారం ఇవ్వలేకపోయిన ఎంపీడీవో వివేక్‌‌‌‌చంద్రకు ఛార్జ్‌‌‌‌మెమో జారీ చేసి 24 గంటల్లో వివరణ ఇవ్వాలని ఆదేశించారు. అనంతరం చిన్నబండిరేవు గ్రామంలోని యంగ్‌‌‌‌ ఇండియా ఇంటిగ్రేటెడ్‌‌‌‌ రెసిడెన్షియల్‌‌‌‌ స్కూల్‌‌‌‌ నిర్మాణ పనులను పరిశీలించి, పనులు వేగవంతం చేయాలని సూచించారు.

•     జిల్లా ఇన్‌‌‌‌‌‌‌‌చార్జ్‌‌‌‌‌‌‌‌ మంత్రి సీతక్క ఫైర్​

నిజామాబాద్‌‌‌‌‌‌‌‌, వెలుగు: దొరల దురహంకారాన్ని బీఆర్‌‌‌‌‌‌‌‌ఎస్‌‌‌‌‌‌‌‌ పార్టీ ఇంకా వీడడం లేదని ఉమ్మడి నిజామాబాద్​ఇన్​చార్జ్​ మంత్రి ధనసరి సీతక్క మండిపడ్డారు. అసెంబ్లీ స్పీకర్‌‌‌‌‌‌‌‌ గడ్డం ప్రసాద్‌‌‌‌‌‌‌‌ కుమార్‌‌‌‌‌‌‌‌ పట్ల చేసిన అనుచిత వ్యాఖ్యలు, అర్ధనగ్నంగా బీఆర్‌‌‌‌‌‌‌‌ఎస్‌‌‌‌‌‌‌‌ ఎమ్మెల్యేలు మహిళా పోలీసు‌‌‌‌లతో ప్రవర్తించిన తీరును యావత్‌‌‌‌‌‌‌‌ సమాజం అసహ్యించుకుంటోందని అన్నారు. బాల్కొండ సెగ్మెంట్‌‌‌‌‌‌‌‌ పరిధిలోని కమ్మర్‌‌‌‌‌‌‌‌పల్లి మండలం నాగాపూర్‌‌‌‌‌‌‌‌, మోర్తాడ్‌‌‌‌‌‌‌‌ మండలంలోని పాలెంలో నిర్మించిన గ్రామ పంచాయతీ బిల్డింగులను‌‌‌‌ ప్రారంభించారు. 

పాలెంలో ఏర్పాటు చేసిన సభలో మాట్లాడుతూ.. దళిత స్పీకర్‌‌‌‌‌‌‌‌ పట్ల వాడిన భాషను నిరసిస్తూ దళిత సమాజం కేసీఆర్‌‌‌‌‌‌‌‌ ఫామ్‌‌‌‌‌‌‌‌హౌస్​ వద్దకు వెళ్తే ఆ ప్రాంతాన్ని పసుపు నీళ్లు చల్లి దొరతనాన్ని నిరూపించుకున్నారని విమర్శించారు. దళితులను అవమానిస్తున్నారని ధ్వజమెత్తారు. బీఆర్‌‌‌‌‌‌‌‌ఎస్‌‌‌‌‌‌‌‌ హయాంలో రాష్ట్రాన్ని కేసీఆర్‌‌‌‌ అప్పుల ఊబిలో పడేయగా సీఎం రేవంత్‌‌‌‌‌‌‌‌రెడ్డి ఇంటి పెద్దకొడుకుగా ఒక్కొక్కదాన్ని సరిచేస్తున్నారని పేర్కొన్నారు. ఇచ్చిన వాగ్ధానాలు నెరవేర్చేందుకు కంకణం కట్టుకొని సర్కార్‌‌‌‌‌‌‌‌ పనిచేస్తోందని తెలిపారు. ఒంటరి, వితంతులకు త్వరలో పింఛన్లు ఇవ్వనుట్లు చెప్పారు. ఆ తర్వాత మిగితా అర్హులకు చేయూతనిస్తామన్నారు. గ్రామ పంచాయతీ, అంగన్‌‌‌‌‌‌‌‌వాడీ సెంటర్లు, రోడ్ల అభివృద్ధికి నిధులు ఇస్తామని పేర్కొన్నారు.

నేషనల్ పేమెంట్స్ కార్పొరేషన్ ఆఫ్ ఇండియా యూపీఐ చెల్లింపుల కోసం కొత్త మర్చంట్ డిస్కౌంట్ రేట్(MDR) విధి విధానాలను విడుదల చేసింది. రూ.2వేల కంటే ఎక్కువ విలువైన మర్చంట్ పేమెంట్ లావాదేవీలపై 0.4 శాతం మేర MDR వర్తించనుంది. ఈ కొత్త రూల్ అక్టోబర్ 15, 2026 నుంచి దేశవ్యాప్తంగా అమల్లోకి రానున్నాయి. వ్యాపారి నుంచి వసూలు చేసే ఫీజును యూపీఐ వ్యవస్థలోని వివిధ భాగస్వాములకు ఏ విధంగా పంచుతారనే దానిపై స్పష్టమైన విధివిధానాలను NPCI ప్రకటించింది. యూపీఐ లావాదేవీల ద్వారా వచ్చే MDR మొత్తాన్ని పార్ట్నర్ బ్యాంకులు, టెక్నాలజీ సంస్థల మధ్య ఎలా పంచుకుంటాయో తెలుసుకుందాం రండి..

1. ఇష్యూయర్ బ్యాంకులు (కస్టమర్ అకౌంట్ ఉన్నవి): మొత్తం MDR మొత్తంలో అత్యధికంగా 40 శాతం వాటాను కస్టమర్ ఖాతాను నిర్వహించే బ్యాంకు పొందుతుంది. ఉదాహరణకు రూ.10వేల లావాదేవీపై రూ.40 ఛార్జీ వసూలైతే ఇందులో రూ.16 ఈ బ్యాంకుకే వెళుతుంది.

2. మర్చంట్ అక్వైరర్లు (వ్యాపారి ఖాతా బ్యాంకు): వ్యాపారులకు పేమెంట్స్ స్వీకరించే సేవలను అందించే అక్వైరర్ బ్యాంకులకు 30 శాతం అంటే రూ.10వేల పేమెంట్ పై రూ.12 దక్కుతుంది.

3. యూపీఐ యాప్స్: ఫోన్‌పే, గూగుల్ పే వంటి యూపీఐ అప్లికేషన్లను నిర్వహించే సంస్థలకు 20 శాతం అంటే రూ.10వేల చెల్లింపుపై రూ.8 వాటా వస్తుంది. 

4. బ్యాంక్ పార్టనర్స్: యూపీఐ యాప్‌లకు టెక్నికల్ అండ్ బ్యాంకింగ్ సేవలను అందించే పార్ట్నర్ బ్యాంకులకు మిగిలిన 10 శాతం అంటే రూ.10వేల పేమెంట్ పై రూ.4 వాటా అందుతుంది.

కస్టమర్లు, వ్యాపారులపై ప్రభావం?
సాధారణ వ్యక్తుల మధ్య జరిగే పీపుల్-టు-పీపుల్ యూపీఐ ట్రాన్సాక్షన్లు ఎప్పటిలాగే పూర్తిగా ఉచితం. అలాగే రూ.2వేల లోపు ఉండే రోజువారీ చిన్నచిన్న లావాదేవీలపై ఎలాంటి MDR ఉండదు. అంతేకాకుండా వ్యాపారులు ఎవరూ కూడా ఈ MDR చార్జీలను కస్టమర్లపై రుద్దడానికి వీల్లేదని NPCI స్పష్టం చేసింది. యూపీఐ యాప్‌లు కూడా వినియోగదారుల నుంచి ఎలాంటి ప్లాట్‌ఫామ్ ఫీజులు వసూలు చేయడానికి అనుమతి లేదు.

2020 నుంచి ఎలాంటి మర్చంట్ ఫీజు లేకుండా నడుస్తున్న యూపీఐ వ్యవస్థను మెుత్తానికి ఛార్జీల కిందకు తీసుకొచ్చింది మోడీ సర్కార్. ఈ ఛార్జీలను వ్యాపారులు భరించటానికి ఇష్టపడరు కాబట్టి వారు యూపీఐ చెల్లింపుల స్వీకరణను తగ్గించే అవాకాశాలు ఉన్నాయని నిపుణులు అంటున్నారు. ఇది మళ్లీ ఆర్థిక వ్యవస్థలో డిజిటల్ పేమెంట్స్ నుంచి ప్రజలు డబ్బు వాడకం దిశగా పురిగొల్పుతుందని హెచ్చరిస్తున్నారు. 

• ఇప్పటివరకు 3.5 లక్షల దరఖాస్తులు

హైదరాబాద్, వెలుగు: ఇంటింటా ఇందిరమ్మ కుట్టు మిషన్ స్కీమ్ దరఖాస్తు గడువును ఈ నెల 30 వరకు పొడిగిస్తున్నట్టు బీసీ సంక్షేమ శాఖ మంత్రి పొన్నం ప్రభాకర్ ప్రకటించారు. బీసీ మహిళలకు స్వయం ఉపాధి కల్పించి, వారి ఆర్థిక స్వావలంబనకు తోడ్పడేందుకు రాష్ట్ర ప్రభుత్వం ఈ పథకాన్ని ప్రవేశపెట్టింది. రాష్ట్రంలోని 119 శాసనసభ నియోజకవర్గాల్లో ఒక్కో నియోజకవర్గానికి 1,000 చొప్పున మొత్తం 1.19 లక్షల మంది అర్హులైన బీసీ మహిళలకు 100 శాతం సబ్సిడీపై ఆటోమేటిక్ కుట్టు మిషన్లను అందించనున్నట్టు మంత్రి పొన్నం ప్రభాకర్ మంగళవారం పత్రిక ప్రకటనలో తెలిపారు.

 గత నెలలో ప్రారంభమైన ఈ దరఖాస్తు ప్రక్రియకు విశేష స్పందన లభించగా, ఇప్పటివరకు 3.5 లక్షలకుపైగా అప్లికేషన్లు వచ్చినట్టు అధికారులు వెల్లడించారు. ఇప్పటివరకు దరఖాస్తు చేసుకోని అర్హులైన బీసీ మహిళలు ఈ అవకాశాన్ని సద్వినియోగం చేసుకుని, ఈ నెల 30వ తేదీ లోపు టీజీఓబీఎంఎంఎస్‌‌‌‌ పోర్టల్ ద్వారా ఆన్‌‌‌‌లైన్‌‌‌‌లో దరఖాస్తు చేసుకోవాలని మంత్రి కోరారు. గడువులోగా దరఖాస్తులు చేసుకునేలా తగిన చర్యలు తీసుకోవాలని అధికారులను ఆదేశించారు.

హైదరాబాద్‌, వెలుగు: జపాన్‌లోని ఐచి–నగోయాలో సెప్టెంబర్‌ 17 నుంచి అక్టోబర్‌ 4 వరకు జరగనున్న 20వ ఆసియా క్రీడలు–2026లో భారత సెపక్‌ తక్రా బృందం ప్రతినిధిగా తెలంగాణ సెపక్‌ తక్రా అధ్యక్షుడు పెరిక సురేష్‌ ఎంపికయ్యారు. సెపక్‌ తక్రా క్రీడ అభివృద్ధికి ఆయన అందిస్తున్న సేవలకు గుర్తింపుగా ఈ అవకాశం దక్కినట్లు నిర్వాహకులు తెలిపారు. ఆసియా క్రీడల్లో తెలంగాణ నుంచి ఎంపికైన ఏకైక సెపక్‌ తక్రా ప్రతినిధిగా ఆయన నిలిచారని పేర్కొన్నారు. తనపై నమ్మకం ఉంచి అంతర్జాతీయ వేదికపై సేవ చేసే అవకాశం కల్పించినందుకు సురేష్‌ కృతజ్ఞతలు తెలిపారు. ఆసియా సెపక్‌ తక్రా సమాఖ్య అధ్యక్షుడు డాటుక్‌ అబ్దుల్‌ హలీం బిన్‌ కాదర్‌, సెపక్‌ తక్రా ఫెడరేషన్‌ ఆఫ్‌ ఇండియా నాయకత్వానికి ఆయన ప్రత్యేక ధన్యవాదాలు తెలిపారు.

న్యూఢిల్లీ: ఢిల్లీ నుంచి దుబాయ్ వెళ్లాల్సిన రెండు స్పైస్‌‌జెట్ విమానాలు సోమవారం 24 గంటలకు పైగా ఆలస్యమయ్యాయి. దీంతో ఆగ్రహించిన ప్రయాణికులు ఢిల్లీ ఎయిర్​పోర్ట్​లో తీవ్ర నిరసన తెలిపారు. విమానం బయలుదేరే టైం, ఫుడ్, వసతిపై స్పష్టత ఇవ్వాలని డిమాండ్ చేశారు. స్పైస్‌‌జెట్ చోర్ హై (స్పైస్‌‌జెట్ దొంగ) అంటూ నినాదాలు చేశారు. సోమ, మంగళవారాల్లో ఈ నిరసన కొనసాగింది. దీంతో ఎయిర్​పోర్ట్​లో గందరగోళ పరిస్థితులు చోటుచేసుకున్నాయి. 

చాలా సేపటి వరకు స్పైస్‌‌జెట్ సిబ్బంది ఎవరూ అందుబాటులో లేకపోవడంతో ప్రయాణికులు మరింత ఆగ్రహం వ్యక్తం చేశారు. ఆ తర్వాత విమానాశ్రయ సిబ్బంది జోక్యం చేసుకుని ఫుడ్, వాటర్​ ఇవ్వడంతో పాటు విశ్రాంతి కోసం ఏర్పాట్లు చేశారు. ఆ తర్వాత విమానాల రద్దుకు కారణమైన సాంకేతిక లోపాలు, ఆపరేషనల్ కారణాలపై ఎయిర్‌‌లైన్స్ సంస్థ క్షమాపణలు చెప్పింది.

 స్పైస్‌‌జెట్ కు చెందిన విమానాలు ఎస్​జీ 5111, ఎస్​జీ 5105 ఆపరేషనల్ కారణాల వల్ల (ఒక విమానం గ్రౌండ్ కావడంతో) ఆలస్యమైనట్టు స్పైస్‌‌జెట్ ప్రతినిధి తెలిపారు. ప్రయాణికుల కోసం ప్రత్యామ్నాయ విమానాలు ఏర్పాటు చేస్తున్నామని, కలిగిన అసౌకర్యానికి క్షమాపణలు చెప్పారు.
 

• 2025లో రూ.31వేల కోట్ల నష్టం
• ప్రభుత్వ సంస్థలకూ భారీ లాస్​

న్యూఢిల్లీ: భారతదేశ సాధారణ బీమా రంగం అండర్ ​రైటింగ్ నష్టాలు 2026 ఆర్థిక సంవత్సరంలో రూ.45,279 కోట్లకు పెరిగాయి. గత ఆర్థిక సంవత్సరంలో ఇవి రూ.31,043 కోట్లుగా నమోదయ్యాయి. బీమా రంగంలోని 32 కంపెనీల్లో ఒక్కటి మాత్రమే కంబైండ్ రేషియోను 100 శాతం లోపు ఉంచుకోగలిగింది. నాన్ లైఫ్ పరిశ్రమ స్థూల ప్రత్యక్ష ప్రీమియం ఆదాయం 9 శాతం వృద్ధితో రూ.3.36 లక్షల కోట్లకు చేరింది.   

బీమా సంస్థ ఆర్థిక ఆరోగ్యాన్ని అంచనా వేయడానికి అండర్​ రైటింగ్ లాభం ముఖ్యమైన కొలమానం. ఇన్సూరెన్స్​ మార్కెట్లో నాలుగు ప్రభుత్వ రంగ సాధారణ బీమా సంస్థలకు భారీ వాటా ఉంది. వీటికి రూ.29,071 కోట్ల సంచిత అండర్ ​రైటింగ్ నష్టం వచ్చింది. గత ఏడాది ఈ నష్టాలు రూ.18,863.24 కోట్లుగా ఉండేవి. కేంద్ర ఆర్థిక మంత్రిత్వ శాఖ ఈ పరిస్థితిని సమీక్షించింది. 

లాభదాయక వ్యాపారాలపై దృష్టి పెట్టాలని, క్లెయిమ్ నిష్పత్తిని తగ్గించాలని ప్రభుత్వ సంస్థలను ఆదేశించింది. ప్రైవేట్ రంగ సాధారణ బీమా సంస్థల సంచిత నష్టాలు రూ.16,682.34 కోట్లకు చేరాయి. గత ఏడాది ఇది రూ.14,033.31 కోట్లుగా ఉంది. టాటా ఏఐజీ సంస్థ అత్యధికంగా రూ.2,442.25 కోట్ల నష్టాన్ని చవిచూసింది. ఐసీఐసీఐ లంబార్డ్ నష్టం రూ.1,024 కోట్లుగా నమోదైంది. 

బజాజ్ జనరల్ ఇన్సూరెన్స్ మెరుగైన పనితీరు కనబరిచి రూ.103.29 కోట్ల నష్టంతో ఉంది. హెచ్​డీఎఫ్​సీ ఎర్గో తన నష్టాలు రూ.1,042.89 కోట్లకు తగ్గాయి. యూనివర్సల్ సోంపో మినహా అన్ని సంస్థల కంబైండ్ రేషియో 100 శాతం దాటింది.

• తెలంగాణ విద్యా కమిషన్ మాజీ చైర్మన్ ఆకునూరి మురళి 
• ప్రభుత్వాలు అబద్ధాలతో టైంపాస్ చేస్తున్నయని ఆరోపణ 
• టీపీఎఫ్‌‌ విద్యా బస్సు యాత్ర ప్రారంభం

హైదరాబాద్, కొణిజర్ల, వెలుగు: రాష్ట్రంలో సర్కారు విద్యావ్యవస్థ తీవ్రంగా జబ్బు పడి ఐసీయూలో ఉందని, దానికి తక్షణమే చికిత్స చేయాల్సిన అవసరం ఉందని రిటైర్డ్ ఐఏఎస్ అధికారి, విద్యా కమిషన్ మాజీ చైర్మన్ ఆకునూరి మురళి అన్నారు. స్టేట్ లోని 95 శాతం సర్కారు స్కూళ్లు.. అసలు బడుల కింద లెక్కపెట్టడానికి ఏమాత్రం ఫిట్‌‌గా లేవని, వాటిల్లో కనీస ప్రమాణాలు, సౌకర్యాలు లేవని ఆరోపించారు.  విద్యను ఏదో ఉద్ధరిస్తున్నట్లు పాలకులు నటిస్తూ, మొక్కుబడిగా ఒకటి రెండు పనులు చేసి అదేదో ఘనకార్యమన్నట్లు ప్రజలకు అబద్ధాలు చెబుతూ టైంపాస్ చేస్తున్నారని ఆగ్రహం వ్యక్తం చేశారు.

మంగళవారం హైదరాబాద్‌‌ ట్యాంక్‌‌బండ్‌‌లోని అంబేద్కర్‌‌ విగ్రహం వద్ద తెలంగాణ పీపుల్స్ ఫ్రంట్ (టీపీఎఫ్) ఆధ్వర్యంలో ‘విద్యా బస్సు యాత్ర’ను ఆయన జెండా ఊపి ప్రారంభించారు. ఈ సందర్భంగా మురళి మాట్లాడుతూ.. పాఠశాల విద్యను బాగుచేయడం గొంతెమ్మ కోరికేమీ కాదని, దీనికోసం భారీ వనరులు కూడా అవసరం లేదన్నారు. ఉన్న బడ్జెట్‌‌ పరిధిలోనే విద్యకు కేటాయింపులు కొద్దిమేర పెంచితే వ్యవస్థ బాగుపడుతుందన్నారు. కాంగ్రెస్ అధికారంలోకి రాకముందు తమ మేనిఫెస్టోలో విద్యకు బడ్జెట్‌‌లో 15 శాతం నిధులు కేటాయిస్తామని, ఆరు గ్యారెంటీల్లో భాగంగా మండలాల్లో తెలంగాణ పబ్లిక్ స్కూల్స్ కడతామని హామీఇచ్చారని గుర్తుచేశారు.

ప్రైవేట్​విద్యాసంస్థల ఫీజులను నియంత్రిస్తామని చెప్పారని, కానీ ఆ హామీల అమలును గాలికొదిలేశారని విమర్శించారు. దీంతో లక్షలాది మంది పేద విద్యార్థులు బడుల్లో తీవ్ర ఇబ్బందులు పడుతున్నారని ఆవేదన వ్యక్తం చేశారు. ఈనెల 15 న ప్రారంభమైన  ఈయాత్ర 27 వరకు రెండు దశల్లో సాగుతోందని తెలిపారు. కార్యక్రమంలో ప్రొఫెసర్ పద్మజాషా, రిటైర్డ్ ఐఏఎస్‌‌లు ఎంవీరెడ్డి, ఎం.చంపాలాల్, విద్యావేత్తలు, సామాజిక కార్యకర్తలు పాల్గొన్నారు. 

విద్యకు 18 శాతం బడ్జెట్ కేటాయించాలి

పీపుల్స్ ఫ్రంట్ ఆధ్వర్యంలో చేపడుతున్న విద్యా బస్సు యాత్ర మంగళవారం రాత్రి ఖమ్మం జిల్లా కొణిజర్ల మండలంలోని మారుమూల గిరిజన గ్రామమైన ఎల్లన్ననగర్‌‌కు చేరుకుంది. ఈ సందర్భంగా మాజీ ఐఏఎస్ అధికారులు ఆకునూరి మురళి, డాక్టర్ ఎంవీరెడ్డి, ఎం.చంపాలాల్ మాట్లాడుతూ రాష్ట్ర బడ్జెట్‌‌లో విద్యారంగానికి కనీసం 18 శాతం నిధులు కేటాయించాలని డిమాండ్ చేశారు. గ్రామీణ, గిరిజన ప్రాంతాల్లోని ప్రభుత్వ పాఠశాలల్లో మౌలిక వసతులను మెరుగుపరచడంతోపాటు ఉపాధ్యాయుల కొరతను పూర్తిస్థాయిలో భర్తీ చేయాలని కోరారు.

విద్యార్థులకు తాగునీరు, మరుగుదొడ్లు, విద్యుత్, ప్రయోగశాలలు, గ్రంథాలయాలు, డిజిటల్ సదుపాయాలు కల్పించాలన్నారు. ప్రైవేట్ పాఠశాలల్లో అధిక ఫీజుల వసూళ్లను నియంత్రించాలని డిమాండ్ చేశారు. బస్సు యాత్ర బృందం మంగళవారం రాత్రి ఎల్లన్ననగర్‌‌లోనే బస చేసి, బుధవారం స్థానిక పాఠశాలల్లోని పరిస్థితులను ప్రత్యక్షంగా పరిశీలించనున్నట్లు తెలిపారు. 

ఆంటోని వర్గీస్, జమునా అబ్దు రెహ్మాన్, సైజు కురూప్, లుక్మన్ అవరణ్ లీడ్ రోల్స్‌‌లో  నిఖిల్ ప్రేమ్ రాజ్ దర్శకత్వంలో  తెరకెక్కుతోన్న చిత్రం  ‘మెస్సి –  లవ్ ఫ్రమ్ ఇండియా’.  ఆకర్ష ఆలపాటి నిర్మిస్తున్నారు. తాజాగా ఈ మూవీ ఫస్ట్ లుక్‌‌, టైటిల్ గ్లింప్స్‌‌ను  స్కూల్ పిల్లల చేతుల మీదుగా లాంచ్ చేశారు.

బాలల దినోత్సవం సందర్భంగా  నవంబర్ 14న  సినిమా విడుదల చేయనున్నట్టు ప్రకటించారు. ఈ సందర్భంగా నిర్మాత ఆకర్ష ఆలపాటి మాట్లాడుతూ ‘చిన్నారులను ప్రోత్సహించాలనే ఉద్దేశంతో ఈ కార్యక్రమాన్ని నిర్వహించాం.  తెలుగు ప్రేక్షకులకు ‘మెస్సి’ చిత్రాన్ని అందిస్తున్నందుకు ఆనందంగా ఉంది’ అని అన్నారు. జేక్స్ బిజోయ్ ఈ చిత్రానికి సంగీతం అందిస్తున్నాడు.

• నేపాలీ- అమెరికన్ యువకుడు కూడా..

న్యూయార్క్: అమెరికాలోని న్యూయార్క్‌‌లో జరిగిన రైలు ప్రమాదంలో ఇద్దరు యువతీయువకులు ప్రాణాలు కోల్పోయారు. లోయర్ మన్‌‌హట్టన్ ప్రాంతంలోని స్ప్రింగ్ స్ట్రీట్ సబ్‌‌వే స్టేషన్‌‌లో పట్టాలపై కూర్చుని ఉన్న వారిని రైలు ఢీకొనడంతో అక్కడికక్కడే మృతి చెందారు. మృతుల్లో ఒకరు భారతీయ సంతతి యువతి కాగా, మరొకరు నేపాలీ- అమెరికన్ యువకుడిగా గుర్తించారు. 

'న్యూయార్క్ పోస్ట్' కథనం ప్రకారం.. న్యూజెర్సీలోని డేటన్‌‌కు చెందిన మలైకా చిత్రే (24), సేరివిల్లేకు చెందిన నవమ్ కౌల్ (24) లు లోయర్ మన్‌‌హట్టన్‌‌లోని స్ప్రింగ్ స్ట్రీట్ సబ్‌‌వే స్టేషన్‌‌కు వెళ్లారు. స్థానిక కాలమానం ప్రకారం.. ఆదివారం తెల్లవారుజామున 3:15 గంటల సమయంలో సౌండ్‌‌బౌండ్ నంబర్-4 రైలు వారిని ఢీకొట్టింది. రైలు ఢీకొనే కొన్ని సెకన్ల ముందు ఈ ఇద్దరూ పట్టాలపై ప్రశాంతంగా కూర్చుని ఉన్నట్లు సోషల్ మీడియాలో వైరల్ అవుతున్న ఒక వీడియోలో స్పష్టమైంది. 

పట్టాలపై కూర్చున్న సమయంలో మలైకా చిత్రే.. నవమ్ కౌల్‌‌ను తన వైపునకు లాక్కుంటూ నవ్వుతున్నట్లుగా కనిపించిందని రైలు ఆపరేటర్ తెలిపారు. వెంటనే ఎమర్జెన్సీ బ్రేక్ వేసినప్పటికీ ఫలితం లేకపోయిందన్నారు. కాగా, మలైకా చిత్రే 'అకాడియా ఫార్మాస్యూటికల్స్'‌‌లో ఆపరేషన్ స్పెషలిస్ట్‌‌గా పని చేస్తుండగా, నవమ్ కౌల్ 'బ్లూమ్‌‌బెర్గ్'‌‌లో ఫైనాన్షియల్ డేటా అనలిస్ట్‌‌గా విధులు నిర్వర్తిస్తున్నారు. 

వీరిద్దరూ రట్జర్స్ విశ్వవిద్యాలయం పూర్వ విద్యార్థులే కావడం గమనార్హం. వీరి అకస్మిక మృతి పట్ల స్నేహితులు, కుటుంబ సభ్యులు తీవ్ర దిగ్భ్రాంతి వ్యక్తం చేశారు.

న్యూఢిల్లీ: యార్కర్లను అస్త్రంగా మలచి ప్రపంచ స్థాయి బ్యాటర్లను వణికిస్తున్న టీమిండియా స్టార్‌‌ పేసర్‌‌ జస్ప్రీత్‌‌ బుమ్రా అద్భుత ప్రయాణంపై పుస్తకం రానుంది. ‘ది బూమ్‌‌ ఎఫెక్ట్‌‌’ పేరుతో వెలువడుతున్న ఈ పుస్తకం వచ్చే నెలలో పాఠకుల ముందుకు రానుంది. ప్రముఖ క్రీడా జర్నలిస్టులు ఆయుష్ పుత్రాన్, నికోలస్ బ్రూక్స్ సంయుక్తంగా ఈ పుస్తకాన్ని రచించారు. పెంగ్విన్ రాండమ్ హౌస్ ఇండియా సంస్థకు చెందిన 'ప్లే' ఇంప్రింట్ కింద ఇది ప్రచురితమవుతోంది.

అహ్మదాబాద్‌‌లో సాధారణ క్రికెటర్‌‌గా ప్రయాణం ప్రారంభించి, ప్రపంచంలోనే అత్యంత భయపెట్టే ఫాస్ట్ బౌలర్‌‌గా బుమ్రా ఎలా ఎదిగాడనే అంశాలను ఈ పుస్తకం వివరిస్తుంది. సాధారణ భారతీయ క్రికెటర్లలాగ ఎలైట్ అకాడమీలు లేదా అండర్-–19 వ్యవస్థ నుంచి బుమ్రా రాలేదు. ఎలాంటి సాంప్రదాయ నేపథ్యం లేకుండా, విభిన్నమైన బౌలింగ్ యాక్షన్, షార్ట్ రనప్‌‌తో ప్రపంచ క్రికెట్‌‌ను శాసించే స్థాయికి చేరుకున్న తీరును ఇందులో పొందుపరిచారు. గుజరాత్ క్రికెట్ నుంచి ముంబై ఇండియన్స్ ద్వారా టీమిండియాకు ఎంపిక కావడం వరకు జరిగిన ప్రయాణాన్ని మూడు భాగాలుగా ఈ పుస్తకంలో విశదీకరించారు.