అలీఘర్: విద్య నేర్పే గురువులకు సమాజంలో మంచి గౌరవం ఉంటుంది. విద్యాబుద్ధులు నేర్పి తమ పిల్లలను ప్రయోజకులుగా మార్చే గురువులంటే ఎవరైనా గౌరవించకుండా ఎందుకుంటారు చెప్పండి. కానీ.. కొందరు టీచర్ల వ్యవహార శైలి ఆ వృత్తికే తలవొంపులు తెచ్చిపెడుతోంది. ఉత్తరప్రదేశ్లోని అలీఘర్లో ఇలాంటి ఘటనే జరిగింది. తరగతి గదిలో నిద్రపోవడమే తప్పంటే గాలి కోసం పిల్లలతో విసనకర్రతో విసిరించుకుంటూ ఓ టీచర్ తప్పు మీద తప్పు చేసింది. ఈ ఘటనను వీడియో తీసి సోషల్ మీడియాలో అప్లోడ్ చేయడంతో వైరల్ అయింది. ఉత్తరప్రదేశ్లోని అలీఘర్ పరిధిలో ఉన్న ధనిపూర్ తాలూకాలోని గోకుల్పూర్ గ్రామంలో ఉన్న ప్రాథమిక పాఠశాలలో ఈ ఘటన జరిగింది. ఈ ప్రాథమిక పాఠశాలలో పనిచేస్తున్న మహిళా టీచర్ ఒకరు మధ్యాహ్నం సమయంలో తరగతి గదిలో కునుకు తీసింది. చాప ఎక్కడ నుంచి వచ్చిందో తెలియదు. మంచిగా చాప వేసుకుని సేద తీరింది. యూపీలో ఎండలు మండిపోతుండటంతో ఉక్కపోతగా ఫీలైన ఈ ప్రబుద్ధురాలు గాలి కోసం పిల్లలతో విసిరించుకుంది. పాపం విసిరివిసిరి చేతులు నొప్పులొచ్చిన ఆ చిట్టి తల్లి అలసిపోయింది. మరో బాలిక ఆ పాప చేతిలో ఉన్న విసనకర్ర తీసుకుని టీచర్కు గాలి తగిలేలా విసురుతూ ఉండిపోయింది. ఆ టీచర్ తల దగ్గర మరో చిన్నారి విసురుతూనే ఉంది. ఇలా.. ఒకరికి ఇద్దరు పిల్లలు విసురుతూ ఉంటే ఈ టీచర్ మంచిగా నిద్రపోతూ కనిపించింది.
जब शिक्षक ही ऐसे होंगे तो शिक्षण कैसा होगा,भयंकर गर्मी से निजात पाने को मासूमों से हवा कराती मास्टरनी साहिबा, 😤👩🏫
— ज़िन्दगी गुलज़ार है ! (@Gulzar_sahab) July 27, 2024
अलीगढ़ में शिक्षिका के द्वारा मासूम बच्चों से उमस भरी गर्मी में पंखा कराने का वीडियो सोशल मीडिया पर तेजी से वायरल हो रहा है. यूपी के अलीगढ़ के धनीपुर ब्लॉक के… pic.twitter.com/AHud4DaLnE
అదే సమయంలో స్కూల్కు వెళ్లిన ఎవరో లేక అదే పాఠశాలలో పనిచేసే వారో ఆమె రాణిభోగాన్ని చూశారు. సైలెంట్గా ఆ దృశ్యాలను మొబైల్లో రికార్డ్ చేసి సోషల్ మీడియాలో అప్లోడ్ చేశారు. ఇంకేముంది.. ఈ పంతులమ్మను నెటిజన్లు పొట్టుపొట్టు తిడుతున్నారు. ప్రభుత్వ పాఠశాలలపై, ఆ పాఠశాలల్లో విధులు నిర్వహించే టీచర్లపై ఇప్పటికే కొందరు తల్లిదండ్రుల్లో సదభిప్రాయం లేదని, ఇలాంటి టీచర్ల వల్ల కాస్తోకూస్తో నమ్మకం ఉన్నవాళ్లలో కూడా ఆ నమ్మకం సన్నగిల్లుతోందని నెటిజన్లు కామెంట్ చేశారు. ఇక్కడ కొసమెరుపు ఏంటంటే.. ఈ టీచరమ్మ పనిచేస్తున్న పాఠశాల ఉత్తరప్రదేశ్ విద్యా శాఖ మంత్రి సందీప్ సింగ్ నియోజకవర్గంలోనే ఉంది. ఈ ఘటన ఉత్తరప్రదేశ్లో ప్రభుత్వ పాఠశాలల పనితీరుపై అనుమానాలకు కారణమైంది. ఆ టీచర్ పై ఇప్పటివరకూ విద్యా శాఖ ఎలాంటి చర్యలు తీసుకోకపోవడం గమనార్హం.
