నాగ్పూర్: ప్రతీ కుటుంబమూ సమాజంలో భాగమేనని, సమాజంలో ప్రతీ కుటుంబమూ కీలకమేనని రాష్ట్రీయ స్వయం సేవక్ సంఘ్(ఆర్ఎస్ఎస్) చీఫ్ మోహన్ భగవత్అన్నారు. జనాభా పెరుగుదల క్రమంగా క్షీణించడంపై ఆయన ఆందోళన వ్యక్తం చేశారు. ఈమేరకు ఆదివారం నాగ్పూర్లో జరిగిన ఓ కార్యక్రమంలో భగవత్ మాట్లాడారు. దేశంలో మొత్తం సంతానోత్పత్తి రేటు (టీఎఫ్ఆర్) కనీసం 3 శాతం ఉండాలని, అప్పుడే ఏ సమాజమైనా నిశ్చింతగా మనుగడ కొనసాగిస్తుందని చెప్పారు. ఫెర్టిలిటీ రేట్ 2.1 గా ఉంటే దానిని పాపులేషన్ రిప్లేస్ మెంట్ రేట్ అంటారని చెప్పారు.
అంటే నిర్ణీత కాలంలో దేశవ్యాప్తంగా జననమరణాలు సమానంగా ఉండడమని వివరించారు. దీనికంటే టీఎఫ్ఆర్ఎక్కువగా ఉంటే జనాభా పెరుగుతూ ఉంటుందని తెలిపారు. ఒకవేళ ఈ రిప్లేస్ మెంట్ రేట్ కన్నా టీఎఫ్ఆర్ తగ్గితే మాత్రం ఆ సమాజం నెమ్మదిగా అంతరించి పోతుందని భగవత్ వివరించారు. ఏ సమాజమైనా సరే అంతరించడానికి ప్రతిసారీ బయటి శక్తుల ప్రభావమే అక్కర్లేదని, టీఎఫ్ఆర్ తగ్గితే దానికదే చరిత్రలో కలిసిపోతుందని పేర్కొన్నారు.
