- న్యాయం కోసం కొట్లాడుతానే ఉంటా
- రంగారెడ్డి కలెక్టరేట్లో విచారణకు హాజరైన మంచు మనోజ్
ఇబ్రహీంపట్నం, వెలుగు: తనపై ఎన్ని కేసులు పెట్టినా న్యాయం కోసం కొట్లాడుతూనే ఉంటానని సినీ నటుడు మంచు మనోజ్ స్పష్టం చేశారు. సీనియర్ సిటిజన్ యాక్ట్ కింద అతనిపై తన తండ్రి మోహన్ బాబు ఇచ్చిన ఫిర్యాదు నేపథ్యంలో రంగారెడ్డి కలెక్టరేట్లో అడిషనల్ కలెక్టర్ ఎదుట శనివారం ఆయన విచారణకు హాజరయ్యారు. అనంతరం మీడియాతో మాట్లాడుతూ.. తన అన్న కారణంగానే తగాదాలు జరుగుతున్నాయని, ఆస్తిపై కుటుంబంలోని అందరికీ హక్కు ఉంటుందన్నారు. సమస్యపై కూర్చుని మాట్లాడుకుందామని ఎన్నిసార్లు చెప్పినా ఎవరూ రావడం లేదన్నారు.
జల్పల్లిలో తన పాప ఇంట్లో ఉందని చెప్పినా తనను పంపకపోవడంతోనే ఇంట్లోకి ప్రవేశించినట్లు చెప్పారు. విద్యార్థుల సమస్యలపై మాట్లాడితే దాన్ని తప్పుగా చిత్రీకరిస్తున్నారన్నారు. తనపై తిరుపతిలో, పహాడీషరీఫ్లో ఎన్ని కేసులు పెట్టినా న్యాయం కోసం కొట్లాడుతానని, ఆఖరికి చంద్రమండలంలో కేసులు పెట్టినా కూర్చుని మాట్లాడేవరకు వదిలేదని స్పష్టం చేశారు.
