- ఫైనల్‌ లిస్ట్‌ విడుదల చేసిన ఎన్నికల కమిషనర్‌
- అత్యధికంగా హనుమకొండ, అత్యల్పంగా సిద్దిపేట జిల్లాలో ఓటర్లు
- 12 జిల్లాల్లో 200 పోలింగ్ కేంద్రాలు ఏర్పాటు
నల్గొండ, వెలుగు : ఫిబ్రవరిలో జరగనున్న నల్గొండ, ఖమ్మం, వరంగల్ టీచర్స్‌ ఎమ్మెల్సీ ఎన్నికకు ఫైనల్‌ ఓటర్‌ లిస్ట్‌ విడుదల అయింది. మొత్తం 24,905 మంది ఓటర్లతో ఫైనల్‌ లిస్ట్‌‌‌‌ను సోమవారం నల్గొండ కలెక్టర్‌ ఇలా త్రిపాఠి విడుదల చేశారు. మొత్తం 24,905 మంది ఓటర్లలో 14,940 మంది పురుషులు, 9,965 మంది మహిళా ఓటర్లు ఉన్నారు. ఉమ్మడి వరంగల్, ఖమ్మం, నల్గొండ జిల్లాల పరిధిలో మొత్తం 12 జిల్లాలు ఉండగా అత్యధికంగా హనుమకొండ జిల్లాలో 5,098 మంది ఓటర్లు ఉండగా, నల్గొండలో 4,483 మంది, ఖమ్మం జిల్లా 3,955 మంది ఓటర్లతో తర్వాతి స్థానాల్లో నిలిచాయి. అత్యల్పంగా సిద్దిపేట జిల్లాలో 163 మంది ఓటర్లు ఉన్నారు.
పెరిగిన ఓటర్లు
2019లో జరిగిన టీచర్‌ ఎమ్మెల్సీ ఎన్నికలతో పోలిస్తే ప్రస్తుతం ఓటర్ల సంఖ్య భారీగా పెరిగింది. గతంలో మూడు ఉమ్మడి జిల్లాల్లో కలిపి 20,888 మంది ఓటర్లు ఉండగా, ప్రస్తుతం 4,017 మంది పెరగడంతో ఆ సంఖ్య 24,905కు చేరుకుంది. అప్లికేషన్లను పూర్తిగా నింపకపోవడం, సెల్‌‌‌‌నంబర్లు, అడ్రస్‌‌‌‌లు తప్పుగా నమోదు చేయడంతో మరికొందరి పేర్లు రిజక్ట్‌ అయ్యాయి. ఈ సారి జరిగే ఎన్నికల్లో పోలింగ్ కేంద్రాలను సైతం పెంచనున్నారు. గత ఎన్నికల్లో 181 పోలింగ్ స్టేషన్లు ఏర్పాటు చేయగా, ప్రస్తుతం ఓటర్ల సంఖ్య పెరగడంతో మరో 19 పోలింగ్ కేంద్రాలను కొత్తగా ఏర్పాటు చేస్తున్నారు. దీంతో 12 జిల్లాల్లో కలిపి మొత్తం 200 స్టేషన్లు ఏర్పాటు చేయనున్నారు.
జిల్లాల వారీగా ఓటర్ల వివరాలు
జిల్లా పోలింగ్ కేంద్రాలు పురుషులు మహిళలు మొత్తం
సిద్దిపేట 04 120 43 163
జనగాం 12 556 365 921
హన్మకొండ 15 2884 2214 5098
వరంగల్ 13 1381 844 2225
మహబూబాబాద్ 16 1083 535 1618
భూపాలపల్లి 07 211 112 323
ములుగు 09 394 218 612
భద్రాద్రి 23 1038 911 1949
ఖమ్మం 24 2300 1655 3955
యాదాద్రి 17 595 326 921
సూర్యాపేట 23 1690 947 2637
నల్గొండ 37 2688 1795 4483
మొత్తం 200 14940 9965 24905
