సన్న బియ్యం పంపిణీకి సర్వం సిద్ధం .. రేషన్​ షాపులకు చేరుతున్న స్టాక్

మహబూబ్​నగర్, వెలుగు: ఉగాది నుంచి రేషన్​ కార్డు హోల్డర్లకు సన్న బియ్యం పంపిణీకి అధికారులు చర్యలు తీసుకుంటున్నారు. సన్న బియ్యం స్టాక్​ను అలాట్​ చేయాలని సివిల్​ సప్లయ్​ అధికారులకు ఆదేశాలు జారీ చేయగా.. వారు మూడు రోజుల నుంచి సన్న బియ్యం స్టాక్​కు అందిస్తున్నారు. ఆదివారం వరకు అన్ని రేషన్​ షాపులకు స్టాక్​ను అలాట్​ చేసి.. ఏప్రిల్​ ఒకటో తేదీ నుంచి సన్న బియ్యం పంపిణీని ప్రారంభించనున్నారు. దీంతో పేదలు, మధ్య తరగతి కుటుంబాలకు చెందిన వారు రేషన్​ షాపుల ద్వారా అందించే సన్న బియ్యంతో భోజనం చేయనున్నారు..

దిగొస్తున్న సన్న బియ్యం ధరలు..

సన్నాలకు బోనస్​ ప్రకటన తరువాత రాష్ట్రంలో పెద్ద మొత్తంలో రైతులు వరి సాగుకు మొగ్గు చూపారు. పెద్ద మొత్తంలో దిగుబడులు వచ్చాయి. డిమాండ్​కు సరిపడా సన్నాలు అందుబాటులోకి రావడంతో.. మార్కెట్​లో సన్న బియ్యం ధరలు దిగి వస్తున్నాయి. 2023 యాసంగిలో కొత్త బియ్యం క్వింటాల్​ ధర రూ.3,500 నుంచి రూ.3,800 వరకు ఉండగా.. ఆ ఏడాది సెప్టెంబర్​లో పాత బియ్యం క్వింటాల్​ రూ.4,200 నుంచి రూ.4,500లకు చేరింది. 2024లో వడ్లకు భారీ డిమాండ్​ ఏర్పడటంతో వ్యాపారులు ఒక్కసారిగా రేట్లు పెంచారు. 

అప్పటి వరకు క్వింటాల్​ రైస్​ను రూ.4,500 లోపు విక్రయించగా.. ఏకంగా రూ.1,500 నుంచి రూ.2 వేల వరకు పెంచారు. దీంతో క్వింటాల్​ సన్న బియ్యం రేట్లు రూ.5,800 నుంచి రూ.6,500కు చేరాయి. ప్రస్తుతం సన్నాల సాగు పెరగడంతో డిమాండ్​కు తగ్గ వడ్లు అందుబాటులో ఉండడంతో సన్నబియ్యం రేట్లు దిగి వస్తున్నాయి. కొత్త బియ్యం ధరలు రకాన్ని బట్టి రూ.4 వేల నుంచి రూ.5 వేల లోపు దొరుకుతున్నాయి. మరో నెలలో ఈ రేట్లు మరింత తగ్గే అవకాశం ఉన్నట్లు వ్యాపార వర్గాలు పేర్కొంటున్నాయి. 

అక్రమ రవాణాకు అడ్డుకట్ట పడేనా?

ఉమ్మడి పాలమూరు జిల్లాలో కొన్నేండ్లుగా రేషన్​ బియ్యం దందా జోరుగా సాగుతోంది. కొందరు లబ్ధిదారులు దొడ్డు బియ్యాన్ని తీసుకునే ఇంట్రెస్ట్​ లేక.. రేషన్​ షాపు యజమానులకే అమ్మేసుకుంటున్నారు. కిలోకు రూ.పది చొప్పున తీసుకుంటున్నట్లు చెబుతున్నారు. ఈ బియ్యాన్ని సేకరించిన కొందరు రేషన్​ షాపు నిర్వాహకులు వాటిని కర్నాటక రాష్ట్రానికి లేదంటే మిల్లర్లకు ఇస్తున్నారు. ఇందుకు వారికి కిలోకు రూ.12 చొప్పున చెల్లిస్తున్నట్లు సమాచారం. 

మరికొందరు ఆటోల్లో గ్రామీణ ప్రాంతాల్లో తిరుగుతూ పీడీఎస్​ బియ్యాన్ని సేకరించి డంప్​ చేసుకుంటున్నారు. సమయం చూసి ఈ బియ్యాన్ని బార్డర్​ దాటిస్తున్నారు. ఇటీవల ఉమ్మడి జిల్లాలోని పలు చోట్ల పెద్ద మొత్తంలో రేషన్​ బియ్యం అక్రమ రవాణా చేస్తున్న వాహనాలను ఆఫీసర్లు పట్టుకొని సీజ్​ చేశారు. కానీ, ఈ అక్రమ దందాను ఆఫీసర్లు అరికట్టలేకపోతున్నారు. రేషన్​ షాపుల్లో ఇక నుంచి సన్న బియ్యం జరగనుండడంతో లబ్ధిదారులు వాటిని తీసుకొనే అవకాశం ఉండడంతో అక్రమ రవాణా తగ్గుతుందని అంటున్నారు.

జిల్లా    రేషన్​ కార్డులు     బియ్యం కేటాయింపులు    రేషన్  షాపులు
(మెట్రిక్​ టన్నుల్లో..)    
మహబూబ్​నగర్​    2,44,578    5,229    506
నారాయణపేట    1,52,323    3,397    73

రికార్డు స్థాయిలో సాగు..

కాంగ్రెస్​ ప్రభుత్వం అధికారంలోకి వచ్చాక సన్నాలకు రూ.500 బోనస్​ ప్రకటించింది. గత వానాకాలం సీజన్​ నుంచి ఈ స్కీమ్​ను ప్రారంభించడంతో రాష్ట్ర వ్యాప్తంగా సన్నాల సాగు గణనీయంగా పెరిగింది. మహబూబ్​నగర్, నారాయణపేట జిల్లాల్లో వానాకాలంలో వరి సాధారణ సాగు విస్తీర్ణం 2.20 లక్షలు కాగా.. బోనస్​ ప్రకటించడంతో రికార్డు స్థాయిలో 3.55 లక్షల ఎకరాల్లో రైతులు సన్నాలను సాగు చేశారు. 

ఈ రెండు జిల్లాల్లో 8 లక్షల మెట్రిక్​ టన్నుల సన్నాల దిగుబడి వచ్చింది. యాసంగిలోనూ ఈ రెండు జిల్లాల్లో పెద్ద మొత్తంలో వరి సాగు ప్రారంభమైంది. ఈ సీజన్​లో వరి సాధారణ సాగు విస్తీర్ణం రెండు జిల్లాల్లో 1.80 లక్షల ఎకరాలు కాగా.. 2.30 ఎకరాల్లో వరి పంటలు సాగువుతున్నట్లు వ్యవసాయ శాఖ రికార్డులు చెబుతున్నాయి. దీంతో ఈ సీజన్​లో కూడా దాదాపు ఆరు లక్షల మెట్రిక్​ టన్నుల దిగుబడి వచ్చే అవకాశం ఉంది.