కామారెడ్డి సబ్‌స్టేషన్ లో అగ్ని ప్రమాదం

• 33/11 కె.వి. సబ్​స్టేషన్​లో భారీ ఎత్తున చేలరేగిన మంటలు
• రూ. కోటిన్నరకు పైగా నష్టం

కామారెడ్డి, వెలుగు:  కామారెడ్డి జిల్లా కేంద్రంలోని సిరిసిల్ల రోడ్డు రాజీవ్  పార్కు​ పక్కన ఉన్న 33/11 కె.వి. సబ్​స్టేషన్​ మంగళవారం దగ్ధమైంది.  భారీ ఎత్తున చేలరెగిన మంటలతో సబ్ స్టేషన్​80  శాతంకు పైగా కాలిపోయింది.  మంగళవారం మధ్యాహ్నం తర్వాత  సబ్​ స్టేషన్ లో ఆకస్మాత్తుగా మంటలు చేలరేగాయి.  సబ్​స్టేషన్‌లో   8 ఎంవీఎ పవర్​ ట్రాన్స్​ఫార్మర్​లోని బూష్​కు స్పార్క్​ రావటంతో  ట్రాన్స్​ఫార్మర్​ పేలింది.  దీంతో పవర్​  ట్రాన్స్​ఫార్మర్​లో ఉన్న అయిల్​కు మంటలు అంటుకున్నాయి.  మంటలు భారీగా చెలరేగాయి. 8 ఎంవీఎ వపర్​ ట్రాన్స్​ఫార్మర్​,  5 ఎంవీఎ పవర్​ ట్రాన్స్​ఫార్మర్​తో పాటు,  సర్క్యూట్ బ్రేకర్లు, ఇతర పరికరాలు కాలిపోయాయి. సబ్​ స్టేషన్​ పూర్తిగా దెబ్బతింది.  రూ. కోటిన్నరకు పైగా ఆస్తినష్టం జరిగినట్లు అంచనా.

  రెండు గంటలకు పైగా మంటలు చెలరేగాయి.  మంటలు అంటుకున్న వెంటనే డ్యూటీలో ఉన్న ఆపరేటర్​ ఫైర్​స్టేషన్​కు,  ఎన్సీడీసీఎల్​ అధికారులకు సమాచారం ఇచ్చారు.   కామారెడ్డి పైర్​ఇంజన్​ వచ్చి మంటలు అర్పే ప్రయత్నం చేసినప్పటికీ అదుపులోకి రాలేదు.  రెండు పవర్​ ట్రాన్స్​ఫార్మర్​లో  6 నుంచి 8 వేల లీటర్ల వరకు అయిల్​ ఉండటంతో మంటల తీవ్రత పెరిగింది. ఎల్లారెడ్డి నుంచి మరో ఫైర్​ ఇంజన్​కు రప్పించారు. 2 ఫైర్​ ఇంజన్లతో మంటల్ని అదుపులోకి తీసుకొచ్చారు.  వెంటనే ఇక్కడకు ఎన్పీడీసీఎల్​ ఎస్​ఈ శ్రావణ్ కుమార్,  డీఈలు కల్యాణ చక్రవర్తి,  నాగరాజు, ఇతర అధికారులు, ఏఈలు, సిబ్బంది వచ్చారు.  ఈ  సబ్​స్టేషన్​ పరిధిలోని కామారెడ్డిటౌన్‌లోని ఆయా ఏరియాలకు గంట సేపట్లో  తిరిగి కరంట్​ సప్లయ్​ పునరుద్ధరించారు.   కామారెడ్డి కలెక్టరేట్,  హౌజింగ్​బోర్డు,  ఆరేపల్లి సబ్​స్టేషన్ల నుంచి 4 ఫీడర్లకు సప్లయ్​ అందించారు.  కాలిపోయిన ఈ సబ్​స్టేషన్​ తిరిగి పునరుద్ధరించేందుకు వారం, పది రోజులు పట్టవచ్చని అధికార వర్గాలు చెబుతున్నాయి.