- కిచెన్లో చెలరేగిన మంటలు
- ఆపై బిల్డింగ్పైకి ఎగసిపడ్డ అగ్నికీలలు
- సకాలంలో ఆర్పివేసిన ఫైర్ సిబ్బంది
బషీర్ బాగ్, వెలుగు: హిమాయత్ నగర్లోని మినర్వా హోటల్లో ఆదివారం రాత్రి అగ్ని ప్రమాదం జరిగింది. హోటల్ రెండో అంతస్తులోని కిచెన్లో ఒక్కసారిగా మంటలు చెలరేగాయి. ఆపై కిచెన్ ఎగ్జాస్ట్ నుంచి హోటల్ బిల్డింగ్ పైకి మంటలు పెద్దఎత్తున ఎగసిపడ్డాయి. నిత్యం రద్దీగా ఉండే ప్రాంతం కావడం, చుట్టుపక్కల అపార్ట్మెంట్లు ఉండటంతో స్థానికులు తీవ్ర భయాందోళనకు గురయ్యారు.
స్థానికుల సమాచారంతో నారాయణగూడ పోలీసులు, ఫైర్ సిబ్బంది హుటాహుటిన సంఘటనా స్థలానికి చేరుకొని, సకాలంలో మంటలు అదుపు చేయడంతో అంతా ఊపిరి పీల్చుకున్నారు. హోటల్ కిచెన్లో చెలరేగిన మంటల కారణంగానే ఈ ప్రమాదం జరిగినట్లు నారాయణగూడ సీఐ వెంకటేశ్ తెలిపారు. ఈ ప్రమాదం లో ఏ మేరకు ఆస్తి నష్టం జరిగిందన్నది తెలియరాలేదు. మంటలు అదుపులోకి వచ్చిన అనంతరం హోటల్ యథావిధిగా కొనసాగింది.
