ముషీరాబాద్, వెలుగు: ముషీరాబాద్ బాపూజీ నగర్ లో మంగళవారం అగ్నిప్రమాదం జరిగింది. శ్రీకాంత్ నిఖిల దంపతులు తమ ఇంటికి తాళం వేసి బయటకు వెళ్లగా, షార్ట్ సర్క్యూట్తో మంటలు చెలరేగాయి. ఇంట్లో నుంచి దట్టమైన పొగలు వస్తుండడంతో స్థానికులు గమనించి వెంటనే తలుపులు పగలగొట్టి నీళ్లతో ఆర్పివేశారు. ఈప్రమాదంలో ఇంట్లోనే వాషింగ్ మిషన్, కూలర్, ఫ్యాన్, టీవీ, ఫ్రిజ్, దుస్తులు, నిత్యావసరాలు కాలి బూడిదయ్యాయి.
అల్వాల్: అల్వాల్లోనూ ఇటువంటి ఘటనే జరిగింది. ఓల్డ్ అల్వాల్ పంచశీల కాలనిలో నివసించే సంతోష్ పాశ్వాన్ అతని భార్యతో కలిసి మార్కెట్కు వెళ్లాడు. ఇంట్లో షార్ట్ సర్క్యూట్ కారణంగా మంటలు చెలరేగడంతో స్థానికులు ఫైర్ సిబ్బందికి సమాచారం ఇచ్చారు. దీంతో వారు ఘటనా స్థలానికి చేరుకొని మంటలను ఆర్పివేశారు. అప్పటికే ఇంట్లోని సామాగ్రి పూర్తిగా దగ్ధం అయినట్లు బాధితులు తెలిపారు.
