కాలిఫోర్నియా: ఓ వ్యక్తి చేసిన పనితో అమెరికాలోని కాలిఫోర్నియాలో చెలరేగిన కార్చిచ్చు రెండింతలు పెరిగింది. 24 గంటల్లోనే ‘పార్క్ఫైర్’ అతివేగంగా వ్యాపిస్తున్నది. గంటకు 20 చ.కి.మీ. చొప్పున అడవిని కాల్చి బూడిద చేస్తున్నది. మంటలను ఆర్పేందుకు వేలాది మంది అగ్నిమాపక సిబ్బంది రంగంలోకి దిగారు. ఆగ్నేయ ఒరెగాన్లోని ఫాల్స్ఫైర్ సమీపంలో సింగిల్ ఇంజిన్ ట్యాంకర్ కూలిపోవడంతో ఓ అగ్నిమాపక సిబ్బంది మృతి చెందినట్టు యూఎస్ ఫారెస్ట్ సర్వీస్ తెలిపింది.
శనివారం సాయంత్రం నాటికి రాష్ట్ర రాజధాని నగరమైన శాక్రమెంటోకు ఉత్తరాన 144 కిలోమీటర్ల దూరంలో 3 లక్షల 50 వేల ఎకరాల విస్తీర్ణంలో అడవి కాలిపోయిందని కాలిఫోర్నియా డిపార్ట్మెంట్ ఆఫ్ ఫారెస్ట్రీ అండ్ ఫైర్ ప్రొటెక్షన్ (కాల్) వెల్లడించింది. శనివారం ఒక్క రోజే 1.5 లక్షల ఎకరాలు కాలిపోయినట్లు తెలిపారు. అగ్నిప్రమాదంలో 134 నిర్మాణాలు ధ్వంసమైనట్లు అధికారులు తెలిపారు.
కాగా, అడవికి ఓ వ్యక్తి నిప్పు పెట్టడం వల్లే ఈ కార్చిచ్చు ప్రారంభమైందని అధికారులు గుర్తించారు. లక్షల ఎకరాల అడవి బూడిదయ్యేందుకు కారణమైన ఆ వ్యక్తిని ఇదివరకే అరెస్ట్ చేశారు.
