నిర్మల్, వెలుగు: నిర్మల్ జిల్లాలో పదిమంది నకిలీ డాక్టర్లపై వివిధ సెక్షన్ల కింద ఎఫ్ఐఆర్ లు నమోదైనట్లు నేషనల్ మెడికల్ కౌన్సిల్ ఎథికల్ కమిటీ చైర్మన్ తోట కిరణ్ కుమార్, కమిటీ సభ్యులు డాక్టర్ శ్రీనివాస్, డాక్టర్ నరేశ్ ఓ ప్రకటనలో తెలిపారు. నిర్మల్ జిల్లా కేంద్రంలో నకిలీ డాక్టర్లు తాము ఆర్ఎంపీలుగా చెప్పుకుంటూ ప్రజలను మోసం చేస్తున్నారని సమాచారం అందడంతో ఇటీవలే ఆకస్మిక దాడులు చేసి పదిమందిపై చర్యలు చేపట్టామని, వారిపై నిర్మల్ టౌన్ పోలీస్ స్టేషన్లో ఎఫ్ఐఆర్లు నమోదైనట్లు చెప్పారు. నకిలీ డాక్టర్లపై దాడులు కొనసాగిస్తామని స్పష్టం చేశారు. కేవలం మెడికల్ కౌన్సిల్లో రిజిస్టర్ అయిన క్వాలిఫైడ్ డాక్టర్లు మాత్రమే బోర్డులు పెట్టుకోవాలన్నారు. క్వాలిఫైడ్ డాక్టర్ల వద్దనే వైద్య చికిత్సలు చేసుకోవాలని ప్రజలకు సూచించారు.
