- దేశమంతటా ఒకేసారి ఎన్నికలు జరిపే విషయంపై చర్చలు
- కేంద్ర హోంమంత్రి అమిత్ షా సహా మొత్తం 8 మంది సభ్యులు
- ప్రత్యేక ఆహ్వానితుడిగా కేంద్ర న్యాయ శాఖ మంత్రి మేఘవాల్ హాజరు
న్యూఢిల్లీ : ఒకే దేశం ఒకే ఎన్నికలు’ పేరుతో దేశమంతటా ఒకేసారి ఎన్నికలు నిర్వహించాలని కేంద్ర ప్రభుత్వం భావిస్తోంది. దేశంలో జమిలి ఎన్నికల నిర్వహణ సాధ్యాసాధ్యాలపై అధ్యయనం చేసి సలహాలు, సూచనలు చేసేందుకు మాజీ రాష్ట్రపతి రామ్నాథ్కోవింద్ ఆధ్వర్యంలో 8 మంది సభ్యులతో ఉన్నత స్థాయి కమిటీని నియమించింది. లోక్ సభ ఎన్నికలకు సమయం దగ్గరపడుతుండడంతో ఈ కమిటీ వేగంగా స్పందించింది. ఈ నెల 23న కమిటీ తొలి భేటీ నిర్వహించనున్నట్లు ఓ ప్రకటనలో తెలిపింది. సాధ్యమైనంత త్వరగా జమిలి ఎన్నికలపై అధ్యయనం చేసి, వివిధ వర్గాలతో సంప్రదింపులు జరిపి కేంద్రానికి సూచనలు చేయనుంది. ఈ కమిటీకి మాజీ ప్రెసిడెంట్ రామ్ నాథ్ కోవింద్నేతృత్వం వహించనుండగా.. కేంద్ర హోంమంత్రి అమిత్ షా, లోక్సభలో ప్రతిపక్ష నేత అధీర్ రంజన్ చౌధురి, రాజ్యసభలో ప్రతిపక్ష నేత గులాం నబీ ఆజాద్, ఫైనాన్స్ కమిషనర్ మాజీ చైర్మన్ ఎన్ కే సింగ్ తదితరులు సభ్యులుగా ఉంటారు.
ALSO READ : ఐటీ ఉద్యోగాల్లో..బెంగళూరును దాటేశాం : మంత్రి కేటీఆర్
ఈ కమిటీ లోక్ సభ, వివిధ రాష్ట్రాల అసెంబ్లీ, మున్సిపాలిటీ, పంచాయతీలకు ఒకేసారి ఎన్నికలు జరిపే విషయంలో కేంద్రానికి సూచనలు చేయనుంది. వచ్చే శనివారం జరగనున్న ఈ కమిటీ భేటీకి కేంద్ర న్యాయ శాఖ మంత్రి అర్జున్ రామ్ మేఘవాల్ ప్రత్యేక ఆహ్వానితుడిగా పాల్గొంటారు. కాగా, జమిలిఎన్నికలకు రాజ్యంగ సవరణ అవసరమా కాదా.. అవసరమైతే దానికోసం రాష్ట్రాల అనుమతి తీసుకోవాల్సి ఉంటుందా.. తదితర న్యాయపరమైన చిక్కులపై కమిటీ సభ్యులు చర్చించనున్నారు. అదే సమయంలో జమిలిఎన్నికల తర్వాత హంగ్ ఏర్పడితే ఏంచేయాలనే విషయంతోపాటు అవిశ్వాస తీర్మానం కారణంగా ప్రభుత్వం కూలిపోయిన సందర్భంలో, ఇతరత్రా సమస్యలకు సరైన పరిష్కారం కోసం ఈ కమిటీ సూచనలు చేయనుందని సమాచారం.
