భారత ఆర్మీ, వాయుసేన సంయుక్తంగా ప్రపంచంలోనే తొలి పోర్టబుల్ హాస్పిటల్ను విజయవంతంగా ఒక మారుమూల ప్రాంతానికి డెలివరీ చేశాయి. సొంతంగా తయారు చేసిన ఈ పోర్టబుల్ హాస్పిటల్ను 15 వేల అడుగుల ఎత్తు నుంచి ఐఏఎఫ్కు చెందిన రవాణా విమానం ద్వారా అనుకొన్న లక్షిత ప్రాంతంలో ప్యారాచూట్ సాయంతో జారవిడిచింది.
మారుమూల ప్రాంతాల్లో ఆపత్కాల పరిస్థితుల్లో ప్రజల ప్రాణాలను కాపాడే లక్ష్యంలో భాగంగా నిర్వహించిన ఈ ఆపరేషన్లో ట్రామా కేర్ సదుపాయాలను ఏర్పాటు చేసేందుకు అవసరమైన ఆరోగ్య మైత్రి హెల్త్ క్యూబ్లను తరలించారు.
ప్రాజెక్ట్ బీహెచ్ఐఎస్హెచ్ఎం (భారత్ హెల్త్ ఇనీషియేటివ్ ఫర్ సహయోగ్, హిత, మైత్రి)లో భాగంగా ఈ హెల్త్ క్యూబ్ (పోర్టబుల్ హాస్పిటల్) లను దేశీయంగా అభివృద్ధి చేశారు. ఈ పోర్టబుల్ హాస్పిటల్ను తరలించేందుకు ఐఏఎఫ్ అధునాతన వ్యూహాత్మక సి–130జే సూపర్ హెర్క్యులస్ రవాణా విమానాన్ని వినియోగించింది. ఈ ఆపరేషన్లో ఆర్మీకి చెందిన పారా బ్రిగేడ్ కీలక పాత్ర పోషించింది.
