ఈ కామర్స్ కంపెనీలైన ఫ్లిప్కార్ట్, అమెజాన్ బిగ్ బిలియన్ డేస్ అని, గ్రేట్ ఇండియన్ ఫెస్టివల్ అని భారీ డిస్కౌంట్లు ఇస్తున్నామంటూ సేల్స్కు తెరలేపాయి. దసరా పండుగ సందర్భంగా తీసుకొచ్చిన ఈ సేల్స్ వైపు వినియోగదారులను ఆకర్షించేందుకు ఫ్లిప్కార్ట్ ప్రమోషన్స్ ముమ్మరం చేసింది. అయితే.. ఈ ప్రమోషన్స్లో భాగంగా ఐఫోన్ 13 మోడల్ ఫోన్ కేవలం 11 రూపాయలకే పొందే అవకాశం అని ఊదరగొట్టింది. ఈ ఆఫర్కు సంబంధించిన సేల్ ముందే మొదలవుతుందని, సెప్టెంబర్ 22న రాత్రి 11 గంటలకు ఈ సేల్ లైవ్ లో అందుబాటులో ఉంటుందని ఫ్లిప్కార్ట్ చెప్పింది. ఐఫోన్ 11 రూపాయలకు పొందే అవకాశం వస్తే ఎవరు మాత్రం లైట్ తీసుకుంటారు చెప్పండి.
ALSO READ | ఇయర్ హుక్ డిజైన్తో.. నథింగ్ ఇయర్ బడ్స్ లాంచ్.. సూపర్బ్గా ఉన్నాయి
ఫ్లిప్కార్ట్ చేసిన ఈ ప్రచారానికి ఆకర్షితులైన చాలా మంది సెప్టెంబర్ 22న రాత్రి 11 గంటలకు ఫ్లిప్కార్ట్ వెబ్సైట్, యాప్ ఓపెన్ చేసి ఐఫోన్ 13ను 11 రూపాయలకు దక్కించుకునేందుకు తెగ ప్రయత్నించారు. ఆపసోపాలు పడ్డారు కానీ చాలామందికి ఆ 11 రూపాయల ఆఫర్ అందని ద్రాక్షగానే మిగిలిపోయింది. అలా సేల్ పెట్టిన వెంటనే Sold Out అని కనిపించే సరికి ఫ్లిప్కార్ట్పై అసహనాన్ని ఎక్కడ చూపించాలో అర్థం కాక కొందరు ‘ఎక్స్’లోకొచ్చి దుమ్మెత్తిపోశారు.
బజ్ క్రియేట్ చేయడానికి ఇలాంటి ప్రచారాలతో ఈ-కామర్స్ కంపెనీలు వినియోగదారులను వెర్రివాళ్లను చేస్తు్న్నాయని, ఇలాంటి ఫేక్ ప్రచారాలు చేస్తున్నందుకు ప్రభుత్వం చర్యలు తీసుకోవాలని కొందరు డిమాండ్ చేశారు. కొందరు వినియోగదారులు మాత్రం ఐఫోన్ 13ను ఫ్లిప్కార్ట్ ప్రచారం చేసినట్టుగానే 11 రూపాయలకే పొందామని స్క్రీన్షాట్లు షేర్ చేసి మరీ చెబుతున్నారు.
