![నాలాలు కబ్జా.. పొలాల్లోకి వరద నీరు..!](https://static.v6velugu.com/uploads/2024/07/flood-water-enters-the-fields-occupied-by-canals_UC9zm30t2c.jpg)
- నాలాలు, వాగులు పునరుద్ధరించాలని రైతుల వేడుకోలు
జగిత్యాల, వెలుగు: జగిత్యాల జిల్లా కేంద్రానికి అనుకుని ఉన్న మోతె, అంతర్గాం, చింతకుంట, కండ్లపల్లి, గోవింద్ పల్లెల్లోని ఐదు గొలుసు కట్టు చెరువులను కలిపి ‘ఫైవ్ పాండ్స్ ఆఫ్ సిటీ’ గా ఉన్న పేరు కనుమరుగు కానుంది. సర్వే నంబర్ 406 లో 90.23 ఎకరాల విస్తీర్ణంతో ఉండే మోతె చెరువు కబ్జాకు గురై 40 ఎకరాలకు తగ్గింది. ఈ చెరువుకు అంతర్గాం నుంచి ధరూర్, నర్సింగాపూర్ మీదుగా కెనాల్స్ ద్వారా నీరు వస్తుంది.
ఇలా మోతె చెరువుకు వచ్చిన నీరు స్టోరేజీ తర్వాత కింద ఉన్న ముప్పారపు చెరువులోకి చేరుతోంది. కాగా ధరూర్, నర్సింగాపూర్ భూముల ధరలకు రెక్కలు రావడంతో కబ్జాలకు గురై 80 ఫీట్లు ఉన్న కెనాల్స్ 20-,40 ఫీట్లకు తగ్గి పోయాయి. ప్రస్తుతం ముప్పారపుచెరువుకు వెళ్లే మోతె, రఘరాములకోట గ్రామాల మీదుగా వెళ్లే నాలాలు, వాగులను కబ్జా చేసి ఫ్లాట్లు చేశారు. ఇప్పటికే 269 నుంచి 319 వరకు ఉన్న సర్వే నంబర్లలో 790 ఎకరాల శిఖంలో 60 ఎకరాలకు పైగా కబ్జాకు గురి కాగా, ఇందులో 300 వరకు ఇండ్లు కూడా నిర్మించారు.
దీంతో వానకాలంలో వరద చెరువులోకి వెళ్లే అవకాశం లేకపోవడంతో చుట్టుపక్కల ఉన్న పొలాల్లోకి చేరుతోంది. వరదపోటుతో రైతులు తీవ్రంగా నష్టపోతున్నారు. జగిత్యాల రెవెన్యూ డివిజన్గా ఉన్న టైంలో సబ్ కలెక్టర్గా పనిచేసిన శశాంక కబ్జాలకు గురైన నాలాలు, కెనాల్స్ ను వినియోగంలోకి తీసుకువచ్చారు. ప్రభుత్వం కబ్జాదారులపై చర్యలు తీసుకోవాలని పట్టణవాసులు కోరుతున్నారు.