నియంత్రణ కు కనిపించని టాస్క్ ఫోర్స్
కరీంనగర్ టౌన్,వెలుగు: సిటీలో ఫుట్ పాత్ లు ఆక్రమణకు గురవుతున్నాయి. చాలామంది వాటిని ఆక్రమించుకొని దుకాణాలు పెట్టుకున్నారు. దీంతో నడిచేందుకు జాగ లేక జనం ఇబ్బంది పడుతున్నారు. సిటీ అంతటా ఇదే పరిస్థితి ఉన్నా అధికారులు ఏమాత్రం పట్టించుకోవడం లేదు.
యాక్సిడెంట్లు అయితున్నయ్..
ఫుట్పాత్ల ఆక్రమణల వల్ల స్థానికులు రోడ్లపైనే నడుచుకుంటూ వెళ్లాల్సి వస్తోంది. దీని వల్ల ట్రాఫిక్ పెరుగుతోంది. తరచూ ప్రమదాలూ జరుగుతున్నాయి. కిందటి ఏడాది జరిగిన ఓ ప్రమాదం లో నలుగురు మృతి చెందారు. అప్పటి కప్పుడు అధికారులు స్పందించి ఫుట్పాత్లపై వ్యాపారాలను క్లియర్ చేశారు. వారం రోజుల పాటు టాస్క్ ఫోర్స్ అధికారులు హడావుడి చేసి, తర్వాత లైట్ తీసుకున్నారు.
కనబడని టాస్క్ ఫోర్స్..
రోడ్లపై వ్యాపారాలు చేసే వారితో పాటు, ఫుట్ పాత్ ఆక్రమణలను అరికట్టేందుకు అడిషనల్ కలెక్టర్ ఆధ్వర్యంలో టాస్క్ ఫోర్స్ టీమ్ను ఏర్పాటు చేశారు. పోలీస్, ట్రాఫిక్, విద్యుత్, రెవెన్యూ, మున్సిపల్ అధికారులు ఈ టీమ్లో ఉంటారు. తరచూ తనిఖీలు చేసి, రోడ్లపై రూల్స్ అతిక్రమించిన వారికి జరిమానాలు విధించారు. అంతేకాకుండా చిరువ్యాపారుల్లో కొంతమందిని ప్రత్యామ్నాయ స్థలాలకు తరలించి,మిగతా వారికి త్వరలో శాశ్వతంగా ఇంటిగ్రేటెడ్ మార్కెట్లకు తరలిస్తామని హామీ ఇచ్చారు. రోడ్లపై విక్రయాలు చేపడితే కఠిన చర్యలు తీసుకుంటామని హెచ్చరించారు. అయితే ఈ పని పది రోజులే సాగింది. ముఖ్యంగా కమాన్, టవర్ సర్కిల్, సివిల్ హాస్పిటల్,శివ థియేటర్ నుంచి యూనివర్సిటీ వరకు, మంకమ్మతోట, రాంనగర్ టీవీ టవర్ , కోర్టు నుంచి శివథియేటర్ వెళ్లే ఏరియాల్లో వీధులన్నీ నిండిపోతున్నాయి. అధికారులు, నాయకులు స్పందించి చిరు వ్యాపారులకు ప్రత్యామ్నాయ స్థలం లేదా ఇంటిగ్రేటెడ్ మార్కెట్ ఏర్పాట్లు చేసేందుకు కృషి చేయాలని కోరుతున్నారు.
