- జిల్లాలోనే మొదటిసారి
- స్మగ్లింగ్ కట్టడికి అధికారుల యత్నం
జన్నారం రూరల్, వెలుగు: కవ్వాల్ టైగర్ జోన్ పరిధిలో విలువైన టేకు కలపను అక్రమంగా తరలిస్తూ పలువురు స్మగ్లర్లు సొమ్ము చేసుకుంటున్నారు. అటవీ శాఖకు తలనొప్పిగా మారిన స్మగ్లింగ్ను కంట్రోల్ చేయడానికి అధికారులు రకరకాల ప్రయత్నాలు చేస్తున్నారు. స్మగ్లర్లు అధికారుల ఎత్తులకు పై ఎత్తులు వేస్తూ వారి కండ్లుగప్పి కలపను తరలిస్తున్నారు. ఈ స్మగ్లింగ్ అరికట్టడానికి, స్మగ్లర్ల పనిపట్టడానికి ఫారెస్ట్ ఆఫీసర్లు కొత్త పద్ధతులు అవలంభిస్తున్నారు. ఈ క్రమంలో జన్నారం డివిజన్ ఇందన్పల్లి రేంజ్‌లో ఎఫ్ఆర్వో కారం శ్రీనివాస్ కొత్త ప్రయోగానికి శ్రీకారం చుట్టారు. రేంజ్‌ పరిధిలో సిబ్బందితో కలిసి ఫారెస్ట్ మార్చ్ నిర్వహిస్తున్నారు. జిల్లాలోనే ఇక్కడ మొదటిసారిగా ప్రారంభించారు.
ఫారెస్ట్ మార్చ్ అంటే..
ఫారెస్ట్ మార్చ్లో భాగంగా అడవిలో స్మగ్లింగ్ను కంట్రోల్ చేయడానికి ముందస్తుగా తనిఖీలు చేస్తున్నారు. రేంజ్‌ పరిధిలోని సిబ్బంది మూకుమ్మడిగా అటవీ ప్రాంతంలోకి వెళ్లి ఒక బీట్ను ఎంచుకుని ఆ ప్రాంతాన్ని క్షుణ్నంగా పరిశీలిస్తున్నారు. ఆ ఏరియాలోని అన్ని కంపార్ట్మెంట్లలో తనిఖీలు చేపడుతూ నరికివేతకు గురైన చెట్ల వివరాలు సేకరిస్తున్నారు. నరికివేతకు కారణాలు తెలుసుకొని అరికట్టేందుకు చర్యలు తీసుకుంటున్నారు. పడిపోయిన కలప ఉంటే టింబర్‌ డిపోకు తరలిస్తున్నారు.ఇలా ప్రతి వారం ఫారెస్ట్లో పరేడ్‌ నిర్వహిస్తున్నారు. వారానికోసారి బీట్ల వారీగా ఫారెస్ట్ మార్చ్ చేపడుతున్నట్లు రేంజ్‌ఆఫీసర్
కారం శ్రీనివాస్ తెలిపారు.
స్మగ్లింగ్ను అరికట్టడమే లక్ష్యం
అడవులు, వన్యప్రాణుల రక్షణ విషయంలో సిబ్బంది అప్రమత్తంగా ఉండటానికి పారెస్ట్‌ మార్చ్ ప్రారంభించాం. సిబ్బంది ఎల్లవేళలా అలర్ట్గా, అందుబాటులో ఉండేలా చర్యలు తీసుకుంటున్నాం. ఉన్నతాధికారుల ఆదేశాల ప్రకారం వన్యప్రాణులను రక్షిస్తూనే అభివృద్ధి పనులతో పాటు స్మగ్లింగ్ నిరోధమే లక్ష్యంగా పనిచేస్తున్నాం. - కారం శ్రీనివాస్, ఎఫ్ఆర్వో, ఇందన్పల్లి
