భద్రాద్రికొత్తగూడెం, వెలుగు : మాజీ మంత్రి వనమా వెంకటేశ్వరరావు ఇంట్లో బీఆర్ఎస్ అధినేత, మాజీ సీఎం కేసీర్ బుధవారం కొంతసేపు ఉన్నారు. ఖమ్మం లోక్ సభ బీఆర్ఎస్ అభ్యర్థి నామా నాగేశ్వరరావును గెలిపించాలని కోరుతూ కొత్తగూడెంలో మంగళవారం నిర్వహించిన రోడ్ షోలో కేసీఆర్ పాల్గొన్నారు. కొత్తగూడెంలోని సింగరేణి గెస్ట్ హౌస్లో రాత్రి బస చేశారు. ఖమ్మం, మహబూబాబాద్ లోక్ సభకు పోటీ చేస్తున్న బీఆర్ఎస్ అభ్యర్థుల గెలుపు కోసం చేపట్టాల్సిన అంశాలపై ఆయా నియోజకవర్గాల ముఖ్య నేతలతో కేసీఆర్ సమావేశం నిర్వహించారు.
బుధవారం సాయంత్రం సింగరేణి గెస్ట్ హౌస్ నుంచి మహబూబాబాద్ వెళ్తూ పాల్వంచలో వనమా వెంకటేశ్వర రావు కోరిక మేరకు ఆయన ఇంట్లో కొంత సేపు ఆగారు. కుటుంబ సభ్యులు ఆయనకు ఘన స్వాగతం పలికారు. కాగా పాల్వంచకు చెందిన ఓ కుటుంబం ఆత్మహత్య కేసులో రాఘవ ఉండడంతో ఆయనను బీఆర్ఎస్ పార్టీ నుంచి సస్పెండ్ చేసిన విషయం తెలిసిందే.
అయితే సస్పెండ్ అయి ఉన్నప్పటికీ పార్టీ కార్యక్రమాలను రాఘవ ముందుండి నడిపించారు. పార్టీకి ఆయన చేసిన సేవలను గుర్తించిన కేసీఆర్లోక్సభ ఎన్నికల్లో పనిచేయాలంటూ ‘రాఘవ గో హెడ్’ అంటూ భుజం తట్టి తనను ప్రోత్సహించారని రాఘవ తెలిపారు
