ఢిల్లీ మాజీ సీఎం, ఆమ్ ఆద్మీ పార్టీ కన్వీనర్ అరవింద్ కేజ్రీవాల్పై దాడి జరిగింది. శుక్రవారం (అక్టోబర్ 25) ఢిల్లీలోని వికాస్పురిలో పాదయాత్ర చేస్తోన్న కేజ్రీవాల్పై బీజేపీ గుండాలు దాడి చేశారని ఆప్ ఆరోపించింది. కేజ్రీవాల్పై దాడి సమయంలో పక్కనే ఉన్న పోలీసులు బీజేపీ కార్యకర్తలను ఆపలేదని ఆప్ ఆరోపణలు గుప్పించింది. ఢిల్లీ పోలీసులు బీజేపీ గుండాలతో కలిసి పోయారని విమర్శించింది. కాగా, కేజ్రీవాల్పై జరిగిన దాడి ఘటనపై ఢిల్లీ సీఎం అతిషి రియాక్ట్ అయ్యారు. శుక్రవారం ఆమె మీడియాతో మాట్లాడుతూ.. బీజేపీ రాజకీయాలు ఎంత నీచానికి దిగజారిపోతాయో ఢిల్లీ ప్రజలు చూశారన్నారు.
ఎన్నికల్లో కేజ్రీవాల్ ను, ఆప్ ను ఓడించలేమని.. ఈ విషయం బీజేపీకి తెలుసని.. అందుకే పాదయాత్ర చేస్తోన్న కేజ్రీవాల్ పై ఎటాక్ చేశారని ఆగ్రహం వ్యక్తం చేశారు. కేజ్రీవాల్‌ను చంపాలని బీజేపీ కుట్ర చేస్తోందని సంచలన ఆరోపణలు చేశారు. కేజ్రీవాల్పై దాడిని ఆప్ ఎంపీ సంజయ్ సింగ్ ఖండించారు. బీజేపీ తన గూండాల ద్వారా ఈ దాడికి పాల్పడిందని ఆయన ఆరోపించారు. కేజ్రీవాల్‌కు ఏదైనా జరిగితే పూర్తి బాధ్యత బీజేపీదేనని అన్నారు. ఇలాంటి దాడులకు మేం భయపడబోమని స్పష్టం చేశారు.
