కామారెడ్డి, వెలుగు: ఇటీవల సర్వేలు చేయించుకున్న కేసీఆర్ కామారెడ్డిలో పోటీపై సందిగ్ధంలో పడ్డారని మాజీ మంత్రి షబ్బీర్అలీ పేర్కొన్నారు. ఆదివారం పాల్వంచ మండలం ఇసాయిపేటలో గడపగడపకు కాంగ్రెస్ కార్యక్రమంలో భాగంగా ఆయన ఇంటింటికీ తిరిగి ప్రచారం నిర్వహించారు.
అనంతరం ఏర్పాటు చేసిన ప్రోగ్రామ్లో ఆయన మాట్లాడుతూ.. కేసీఆర్ హైదరాబాద్ చుట్టుపక్కల భూములు దోచేకొని అమ్మేశారని, గజ్వేల్లోనూ దోపడి భూ దోపిడి చేశారన్నారు. అక్కడ ప్రభుత్వ భూములు లేక కామారెడ్డికి వస్తున్నారన్నారు. రైతుల బతుకులు మారుస్తానని ధరణి పోర్టల్ తీసుకొచ్చి, భూమి హక్కుదారు పేర్లు మార్చారన్నారు. ప్రభుత్వం ప్రజల నుంచి అసైన్డ్ భూములు లాక్కొని అమ్మేస్తోందన్నారు.
మరో మూడు నెలల్లో కాంగ్రెస్పార్టీ అధికారంలోకి వస్తుందని, గ్యారెంటీ పథకాలను అమలు చేస్తోందన్నారు. డీసీసీ ప్రెసిడెంట్ కైలాస్ శ్రీనివాస్రావు, పార్టీ మండలాధ్యక్షుడు గణేశ్నాయక్, లీడర్లు మద్ది చంద్రకాంత్రెడ్డి, ఇంద్రాకరణ్రెడ్డి, విష్ణువర్ధన్రెడ్డి, నౌషిలాల్, సుధాకర్ పాల్గొన్నారు.
తెలంగాణలో గంగాజమున తహజీబ్
తెలంగాణలో మొదటి నుంచి గంగాజమున తహజీబ్కొనసాగుతోందని, కులమతాలకు అతీతంగా ప్రతీఒక్కరు కలిసిమెలిసి జీవిస్తారని మాజీ మంత్రి షబ్బీర్అలీ పేర్కొన్నారు. ఆదివారం కామారెడ్డిలోని మదీనా మజీద్లో మర్క జే మిలాద్ కమిటీ ఆధ్వర్యంలో రక్తదాన శిబిరం నిర్వహించారు.
షబ్బీర్అలీ మాట్లాడుతూ.. ఈసారి వినాయక నిమజ్జనం రోజునే మిలాద్ఉన్నబీ రావడంతో టౌన్లో ర్యాలీ రద్దు చేసి, రక్తదాన శిబిరం నిర్వహించడం సంతోషంగా ఉందన్నారు.
