బాల్కొండ తెరపైకి..అన్నపూర్ణమ్మ!

బీజేపీ అభ్యర్థిగా బరిలో దింపే యోచనలో హైకమాండ్
మంత్రి ప్రశాంత్రెడ్డికి ధీటైనా క్యాండిడేట్గా భావిస్తోన్న పార్టీ

నిజామాబాద్, వెలుగు: మంత్రి ప్రశాంత్రెడ్డి ప్రాతినిధ్యం వహిస్తున్న బాల్కొండ నియోజకవర్గంలో అనూహ్యంగా మాజీ ఎమ్మెల్యే ఏలేటి అన్నపూర్ణమ్మ పేరు తెరమీదకు వచ్చింది. ఆమెను బరిలో నిలపాలని బీజేపీ యోచిస్తోంది. బీజేపీ నిర్వహించిన సర్వేలో మంత్రిని ఎదుర్కోగలిగే సత్తా అన్నపూర్ణమ్మకు మాత్రమే ఉన్నట్లు తేలిందని సమాచారం. మల్లికార్జున్రెడ్డి కూడా తన తల్లిని పోటీకి దింపడానికి సుముఖత వ్యక్తం చేసినట్లు తెలుస్తోంది.

గెలుపు వ్యూహంలో భాగం..

దివంగత మంత్రి ఏలేటి మహిపాల్రెడ్డి, అన్నపూర్ణమ్మ దంపతుల రాజకీయ వారసుడిగా వారి కొడుకు డాక్టర్ఏలేటి మల్లికార్జున్రెడ్డి పాలిటిక్స్లోకి ఎంట్రీ ఇచ్చారు. 2014లో తెలుగుదేశం అభ్యర్థిగా బాల్కొండ నుంచి పోటీ చేసి ఓడిపోయారు. 2019 లోక్సభ ఎన్నికల తర్వాత బీజేపీలో చేరారు.ఈ అసెంబ్లీ ఎన్నికల్లో బీజేపీ నుంచి పోటీ చేయడానికి రెడీగా ఉన్నారు. బీఆర్ఎస్ నుంచి మంత్రి ప్రశాంత్రెడ్డి పోటీ చేయనుండగా, కాంగ్రెస్ నుంచి పోటీ చేసే అభ్యర్థి విషయంలో బీజేపీ ఒక అంచనాకు వచ్చింది. దీంతో మల్లికార్జన్రెడ్డికి బదులు ఆయన తల్లి, మాజీ ఎమ్మెల్యే అన్నపూర్ణమ్మను పోటీ చేయిస్తే ఎలా ఉంటుందనే ఆలోచిస్తున్నట్లు తెలుస్తోంది. మహిళకు అవకాశం ఇవ్వడం వల్ల ఓటర్లలోనూ సానుకూలత వస్తోందని, గతంలో రెండు సార్లు ఎమ్మెల్యేగా పనిచేసిన అనుభవం పనికి వస్తోందని ఆ పార్టీ నేతలు భావిస్తున్నట్లు తెలుస్తోంది. అన్నపూర్ణమ్మ అనుచరులుగా ఇతర పార్టీల్లో ఉన్న పాత క్యాడర్ను, పార్టీలోకి తీసుకురావొచ్చని భావిస్తున్నారు.

ప్రశాంత్రెడ్డికి మేనత్త..

మంత్రి వేముల ప్రశాంత్రెడ్డి తండ్రి దివంగత వేముల సురేందర్రెడ్డి అన్నపూర్ణమ్మకు సొంత అన్న. అన్నాచెల్లి కుటుంబాల మధ్య మూడు దశాబ్దాలకు మించి రాజకీయ విరోధం ఉంది. పేరుకు బంధుత్వమే గానీ రెండు కుటుంబాల మధ్య పచ్చగడ్డి వేస్తే భగ్గుమంటుంది. ఆ వారసత్వం ఇంకా కొనసాగుతోంది. ప్రశాంత్రెడ్డిపై మేనత్త అన్నపూర్ణమ్మను పోటీకి దింపి, మంత్రికి బ్రేక్వేయాలని బీజేపీ ప్లాన్ చేస్తోంది.

జిల్లా రాజకీయాల్లో క్లీన్ ఇమేజ్..

వివాద రహిత నేతగా జిల్లా రాజకీయాల్లో అన్నపూర్ణమ్మకు పేరుంది. 1985లో ఆర్మూర్ నుంచి తెలుగుదేశం తరఫున ఎమ్మెల్యేగా గెలిచిన ఆమె భర్త ఏలేటి మహిపాల్రెడ్డి అటవీ శాఖ మంత్రిగా పనిచేస్తున్న సమయంలో హఠాన్మరణం చెందారు. ఆయన వారసురాలిగా పాలిటిక్స్లోకి ఎంటరైన అన్నపూర్ణమ్మకు మూడు దశాబ్దాలకు పైగా రాజకీయ అనుభవం ఉంది. 1994, 2009 ఎన్నికల్లో రెండుసార్లు ఆర్మూర్ ఎమ్మెల్యేగా పనిచేశారు. నియోజకవర్గాల పునర్విభజనతో బాల్కొండ నియోజకవర్గానికి మారారు.